ACHINE 4 - Sumi Naga CL (Re-edited) Bible (BSI)

Axine Kümllagho Yezah

¹ Ampeu no Moses pütsa no pi,

² “Israelmi vilo pilo, Khuana no mthano Ampeu zakütsü lo shimo kepu lakhimu shive no küqüve aye,

³ momu nukisheve keu chineu no axine shive no timi mlo lo akipimi süghi aghi aye, pa ye pa kipimi ghenguno amshitsü lhothe tukutiye kühakeu pesü Ampeu lau axine kümllagho tsüni.

⁴ Pa no amshitsü sasü kuposhukulu phiki kulaghi lo ighi no pa u pesü tipau kütsü lo inape no Ampeu zülono heqhini.

⁵ Eno achineu no aji hami pesü kuposhukulu phiki alou iloni,

⁶ pa no akimthe-a kulaghi lo nhaqhiphi zülono aji lo pa uloti chosü no Ampeu zülo ghuthu tsüni küzüteni.

⁷ Tishino pa no aji hami pesü kuposhukulu phiki alou Ampeu zülo achekeu axokütsüngü kiptia lo akiboqo lo lesüni, eno aji achili thaqhü pa no pewo ti kuposhukulu phiki kulaghi lo akipti kümllagho khache bophi lo leqhiveni.

⁸ Tithiu pa no axine kümllagho shikeu mishitsü tha, amxu ngo aghükini kümtsü ikhipheni,

⁹ amchi lothi kini, ti küzüpe achekeu atha eno apuloshi, amchi lothi gholono ikhiphe luveni,

¹⁰ (külakishi kümllagho tsü kelo ghapheu lhoxü phi lono thime hipaqo luve cheke toi); eno achineu no ti kümtsü akiptia lono pitiveni.

¹¹ Ikemu ayiko eno ashicho gholono akütsü, apukhuqo, aboloshi, eno tübatüzü,

¹² achili thaqhü pa no xapusü aghazü nguno khalau ipeve no müdüniyi ke-a, ayevu peve chekeu, lo ami shino qhoi pitive ni. Ayevu shou asü shipiti akeu lono kümtsü pitiveni.

¹³ “Israelmi qoaho no mthano Ampeu zakütsü lo shimo kepu dolo lakhimu shive no küqüve, eno kutou no pano kipimi kümsü chilelu aye, pano xine no aqoaho kümtsü nhethe lono küsü luve aghimu,

¹⁴ kughou pano shikipimi xine huno aqha kighithi shiveni keno, axine kümllagho shinike aqoaho no amshitsü lakhi sasü kuposhukulu phiki zülo ighini.

¹⁵ Eno aqoaho lo layemi no pano u pesü amishi kütsü lo inape no Ampeu zülono tipau heqhini.

¹⁶ Achineu no amshitsü ji hami pesü kuposhukulu phiki lo iloni,

¹⁷ pa no nhaqhiphi zülono aji lo pa uloti chosü no Ampeu zülo ghuthu tsüni küzüteni.

¹⁸ Pa no aji hami itaghi pewo Ampeu zülo akiptia lo akiboqo lo lesüni, eno achili thaqhü pa no pewo kuposhukulu phiki kulaghi lo akipti kümllagho khache bophi lo leqhiveni.

¹⁹ Pa no atha kuchopu ikhipe akiptia lono pitiveni.

²⁰ Axine ghenguno amshitsü heqhipe mlla kelo toi, hipa kümllagho ghi titoi shini. Hitoi achineu no timiqo ghenguno lokichile shitsü no pano kipimi qhitsüni.

²¹ Amshitsü kumo ye pesü aghazü khalau ipeve no amshitsü atüghüu pitike ghola lono tilauno pitiveni; hi no aqoaho ghenguno axine kümllagho ke.

²² “Kughou sakipheu no mthano Ampeu pa Lhou zakütsü lo shimo kepu dolo lakhimu shive no küqüveni, eno kutou no pa kipimi kümsüchile luni keno;

²³ momu pa no axine kümla shive keu pa pelo ithive peni keno, pa ye anetsü tukutiye kühakeu lakhi pa kümllagho shi süghini,

²⁴ Eno pa u pesü ane kütsü lo inape no Ampeu zülo akipti kümllagho lhoxü heqhi cheke-a lono heqhini; hi no axine kümllagho ke.

²⁵ Tishino achineu no lhoxü ji hami pesü akipti khache lo akiboqo lo lesüni eno achili thaqhü pewo akipti kümllagho khache bophi lo leqhiveni.

²⁶ Külakishi kümllagho lo toi, atha kuchopu pewo akiptia lono pitiveni. Hitoi pa xine ghenguno achineu no lokichile shitsü no pa kipimi qhivetsü nani.

²⁷ “Inapüghami khuana no mthano Ampeu zakütsü lo shimo kepu lakhimu shive no küqüve, eno kutou no pa kipimi kümsü chilelu aye,

²⁸ momu pa no axine kümla shikeu pa pelo ithipe aye, pa xine ghenguno akümllagho shi pa ye anequ tukutiye kühakeu lakhi süghini.

²⁹ Pa xine ghenguno aghashi akeu lhoxü kütsü lo pa u pesü inape no akipti kümllagho-a lono heqhini.

³⁰ Achineu no lhoxü ji hami pesü akiptia khache lo akiboqo lo lesüni eno achili thaqhü akipti kümllagho khache bophi lo leqhiveni.

³¹ Külakishi kümllagho lo toi atha kuchopu pewo akiptia lono Ampeu lopushi mülüi keu xo tsünike pitiveni. Tishino achineu no pa ghenguno lokichile shitsü no pa kipimi qhivetsü nani.

³² “Tsala pa no pa xine kümllagho ghenguno ambe süghi aye, ti ye aqu tukutiye kühakeu shini

³³ eno pa no lhoxü kütsü lo inape no akipti kümllagho lhoxü hekiqhi-a lono heqhini.

³⁴ Achineu no lhoxü ji hami pesü akipti kümllagho khache lo akiboqo lo lesüni eno achili thaqhü pewo akipti kümllagho khache bophi lo leqhiveni.

³⁵ Külakishi kümllagho shikelo ambe ghapheu tha luve cheke toi achineu no atha kuchopu ikhipe Ampeu lau achuqupu kümllagho tsü chekeu kiptia shou no pitiveni. Tithiu achineu no timi hipau xine ghenguno lokichile shitsü no pa kipimi qhivetsü peni.