ACHINE 3 - Sumi Naga CL (Re-edited) Bible (BSI)

Külakishi Kümllagho Yezah

¹ “Milakhi no külakishi kümllagho tsünike Ampeu zülo amishi süghi aye, atsü aqu khikhiu namu tukutiye kühakeu shini.

² Pa no pa kümllagho lhoxü kütsü lo inape no kuposhukulu phiki kulaghi lono heqhini, eno Aaron nuli achinemi no aji pesü akiptia vehomxa leqhini.

³ Pa no külakishi kümllagho ghakishi lono Ampeu lau achuqupu kümllagho shi amxu ngo aghükini tsüni,

⁴ eno amchi lothi kini, ti küzüpe achekeu atha eno apuloshi aqo lono ikhiphe luveni.

⁵ Tishino Aaron nuli no akiptia lo piti mlla akeu shou no hipaqo kümtsü pitiveni; Ampeu lopu mülüi keu xo hino achuqupu kümllagho ke.

⁶ “Milakhi no külakishi kümllagho tsünike Ampeu zülo ambe süghi aye, atsü aqu khikhiu namu tukutiye kühakeu shini.

⁷ Pa no ambeti tsü aye, Ampeu lau süghini,

⁸ pa no lhoxü kütsü lo inape no kuposhukulu phiki zülono heqhini, eno Aaron nuli no aji pesü akiptia vehomxa leqhini.

⁹ Pa no külakishi kümllagho ghakishi hipau lono Ampeu lau achuqupu kümllagho shi atha eno ashomhi tha, ti ye ashomhibo kupuju luveni, eno amxu ngo aghükini,

¹⁰ amchi lothi kini, ti küzüpe achekeu atha eno apuloshi, amchi lothi gholono ikhiphe luveni.

¹¹ Eno Ampeu lau achuqupu kümllagho shi achineu no ti kümtsü ikhipe akiptia lono pitiveni.

¹² “Khuana kümllagho no ane shiaghi aye, pa ye Ampeu zülo ti süghini.

¹³ Pa no pa u pesü tipau kütsü lo inape no kuposhukulu phiki zülono heqhini, eno Aaron nuli no aji pesü akiptia vehomxa leqhini.

¹⁴ Tishino pa no pa kümllagho hipau lono Ampeu lau achuqupu kümllagho tsükeu shi amxu ngo aghükini kuchopu,

¹⁵ amchi lothi kini, ti küzüpe achekeu atha eno apuloshi, amchi lothi gholono ikhiphe luveni.

¹⁶ Eno achineu no mülüi keu xo shi ti kuchopu akiptia lono pitiveni. Atha thaqhü ye Ampeuw ke.

¹⁷ Nongu ye atha na aji namu chumoni, hi ye tiqheli kupuju lo nongu no küghüna chekeu-a kümtsü lo pimhe cheni keu yezah shivae.