ACHINE 27 - Sumi Naga CL (Re-edited) Bible (BSI)

Ashoqhi Ghenguno Ayezah

¹ Ampeu no Moses vilo pi,

² “Israelmi pütsa no pilo, Milakhi no timi lakhi pesü Ampeu lau ikhiphe tsüniye akimchi shoqhi shino ame kiqi lono kihiju aye,

³ kiptimi apunu mpe muku lono lhotsügho dolono achineki ghükayi ahu tüxa shini.

⁴ Totimi no ghükayi gram 300.

⁵ Kiptimi ampe pungu lono muku dolono ghükayi gram 200, eno totimi no ghükayi gram 100.

⁶ Anga kughunu aqhi lakhi lono ampe pungu dolo kiptimi no ghükayi gram 50, totimi no gram 30.

⁷ Kiptimi ampe lhotsügho nguno kunguu no ghükayi gram 150, eno totimi no gram 100.

⁸ Khuana no kumlhomi kehu ame tsümla aye, pa ye achinemi lau saghini, eno timi tipau no kutolu kepu qhemi lono achineu no ame betha tsüni.

⁹ “Tushokiqhi huno Ampeu lau akümllagho shi tsüni keu lhoxü shiaghi aye, pa no tsü akeu kümtsü akimthe shivae.

¹⁰ Pa ye alhoksa pesü akivi kili moni momu eno azüqhu shimoni; pa no tishi aye lhoxü kinikujo Ampeu sala ae.

¹¹ Ikemu tino mithekumo lhoxü Ampeu lau akümllagho shi tsüchemo keu shiaghi aye, timi huno achineu lau lhoxü sawuni.

¹² Achineu no akivi aküsa kiqi lono lhoxü me kiqiphe tsükeu luveni.

¹³ Ikemu timi huno ti qhüchile lunishi aye, ame shou saje pungu veqabe tsüni.

¹⁴ “Milakhi no pa ki ikhiphe pe akimthe shi Ampeu tsü aye, achineu no aki tipau kiviküsa kiqi lono ame betha tsükeu luveni.

¹⁵ Aki tipau tsü akeu no ti qhüchile lunishi aye, ame betha tsükeu shou saje pungu veqabe tsüno paw shiveni.

¹⁶ “Milakhi no pa mheghi luche hami pesü Ampeu tsü aye, ti ye ghile lukepu kiqi lono ame bethani. Barleythi ahu 400 luche no ghükayi ahu tüxa shini.

¹⁷ Pa no Jubilee mpe lono alu ikhiphe tsü aye, ame betha tsükeu luveni,

¹⁸ ikemu Jubilee thiu no tsü aye, ighini keu Jubilee kutolo ampe khije aphi keno tipau kiqi lono achineu no kiqiphe tsüni, eno tipau lono ame kümghü no betha tsüni.

¹⁹ Alu ikhiphe tsü akeu no qhüchile lunishi aye, pa ye ame betha tsükeu shou saje pungu veqabeni, tishino paw shiveni.

²⁰ Ikemu pa no qhüchile lunishi mono kütami vilo jesüve aye, pa ye khilemu tipau qhüchile lumoae.

²¹ Eno Jubilee lo alu tipau phekelo, ti ye Ampeu lau akimthe gho lakhi shiniae. Achinemi no sala amheghi shiniae.

²² Milakhi no pa mheghi kumo kemu pa no pa küqhü lu pesü Ampeu lau ikhiphe tsü aye,

²³ ighini keu Jubilee mpe kutolo achineu no ame khije shini keno kiqiphe tsüni, eno timi huno tipa tsala lono ame pesü Ampeu lau akimthe gho shi tsüveni.

²⁴ Alu küqhüu no Jubilee mpe lono khuu launo qhülu keno pa tsüchileni.

²⁵ Ame betha tsükeu kümtsü achineki lo peitha chekeu kiqi lono shini.

²⁶ “Ikemu lhoxü piti tüghüu ye Ampeu saje kehu khumu tipau pesü ikhiphe tsümoni; amishi na ambe namu Ampeuw ke.

²⁷ Ikemu mithekumo lhoxü ye betha tsükeu me kiqi lono tipa shou saje pungu veqabe no qhüchilelu nani, ti qhüchile lumo aye, betha tsükeu me lono jeveni.

²⁸ “Timi na lhoxü na atsüaqu na ayeghi namu Ampeu lau ikhiphe tsüve keu ye khunomu jemla momu qhüchile mlae; ti kümtsü Ampeu zülo shishe akimthe ke.

²⁹ Timi lakhi pesü ikhiphe tsüve keu ye khilemu xaphe mlae; pa ye thive masa nani.

³⁰ “Athi na, axathi namu ayeghi lo pekighi kümtsü chighi lo saje lakhi ye Ampeuw ke.

³¹ Milakhi no paw chighi saje qhüchile lunishi aye, pa ye chighi saje shou saje pungu vebeni.

³² Amishi eno ambe chighi lo lakhi ye Ampeu salae. Lhoxü achighiu thaqhü ye Ampeu lau akimthe shini.

³³ Apighiu ye akivi ngo alhoksa dolo kishe moni momu atheli shimoni, pa no tishi aye lhoxü kinikujo akimthe shiniae eno qhüchile lumoae.”

³⁴ Azakütsü hipaqo ye Israelmi ghenguno Ampeu no Sinai Toghi lono Moses tsükeu ke.