ACHINE 26 - Sumi Naga CL (Re-edited) Bible (BSI)

Aghokulu Kükümgha

¹ “Asü-atu julho, atsükucho momu atu yekütha koghe mlape tipa zülo itsaqi moni, kughengu Ni ye Ampeu nongu Lhou ke.

² Iw Sabbath eno I kungo phiki akimthe shi ikhilu lo: Ni ye Ampeu ke.

³ “Nongu no Iw pimheye pape eno I zakütsü gholu no tipaqo pelu aye,

⁴ I no ado achipi lono tsütsüghu nongu tsü nani, ayeghi lo tüxatini ikowolu nani, eno asüboqo no axathi pithi nani.

⁵ Now ghile no pofushi atsaithi ghile kutolo pekütsü khamla nani, eno atsaithi ghile no ghixu kutolo pekütsü khamla nani. Nongu ye kupukuno shi chusho no sükusho lono no yeghi lo xülu nani.

⁶ I no aghakhu lo iqüghai keu tsü nani, eno kiumu nongu shikümsa mono nongu no zühulu nani. I no aghakhu lono tüghashiqo haleve tsü nani, eno tile aghükishi küha nani.

⁷ Nongu no aghümi halelu no panongu ye ghüyi lono wonani.

⁸ Nongu mipungu no timi aqhe halelu nani, eno aqhe no qhethonhe chighi halelu nani, no ghümi ye ghüyi lono wove nani.

⁹ I no nongu kümgha tsüno atianuli kughuko tsü nani eno nongu sasü puloshoqhi shikeu peche nani.

¹⁰ Now ghile no apolu kehu akiye chukhamla aphi lono ghile lupusü ighi kelo aqau ye peve nani.

¹¹ I no nongu gholo I kimthe phiki shino ngo nani, Ni ye nongu milive mo nani.

¹² I no nongu gholo anani eno nongu Lhou shinani, nongu no Iw timi shinani.

¹³ Ni ye Ampeu khuu nongu pelo aqüaxemi shipe moniye Egypt lono saipeghi keno, nongu Lhou huke. I no now kuokhasü kuboleve tsüno nongu pelo akütsü peqhepe chewulu peke.”

Hekibide Ghime

¹⁴ “Ikemu nongu no I tsa inimo eno azakütsü hipaqo pemo aye,

¹⁵ eno Iw pimheye ngo akhuayeqo milive no I zakütsü papemo, Iw puloshoqhi kubove aye,

¹⁶ I no hitoi nongu lau shi nani: shithüghüi keu, anhethi kighicheve tsüno amlo küsapu shipivimla keu küsü nongu lau süghi nani. Nongu no adou lono apiti xusü nani, kughengu tipau pekighi ye no ghümi no chuve nani.

¹⁷ I no nongu mjochile nani, no ghümi nongu theqhive nani. No jumithi kemi no nongu shou ayepe nani, eno khunomu hachemo keghi nongu ye kuhapo nani.

¹⁸ Ishi keghi nongu no I gholumo aye, I no nongu xine ghenguno ghuthu tsüni küghüsü no ghime nani.

¹⁹ I no nongu qheküza shipühave tsü nani, atsütsü no tsüghu move no ayi kümka toi eno ayeghi no alazayi toive nani.

²⁰ Nongu no akaveshi mlakeu ye adou shive nani, kughengu no yeghi lo tüxatini ipeghi move, eno asüboqo no axathi pithi move nani.

²¹ “Nongu no I mjochile auve eno I gholu move aye, I no ghuthu tsüni no küghüsü no nongu ghime nani.

²² I no nongu lau tüghashiqo puwu no tipaqo no nongu tianuli, atsüaqu kütsave nani, eno nongu ye timi aghulo likhive nani, nongu laghiqo ye yenguyive nani.

²³ “Aghime hipaqo vecheo nongu no I lau ighimo no itaghi I mjochile auve aye,

²⁴ Ni ghi nongu mjochile nani, eno Ni ampi no ghuthu tsüni küghüsü no nongu ghime nani.

²⁵ Puloshoqhi kubove ke ghenguno I no nongu shou azütakikihi puku nani. Nongu no aphughi lo kumqo aye, I no püsa puwu nani, eno nongu pesü aghümi u lo süvetsü nani.

²⁶ No chuqupu laghi I no hekhave tsü kelo, totimi chighi no amiphoki lakhi lono asho shino aphiphi shi kije nani, nongu no tipau chukhave namu müzüthi nani.

²⁷ “Ishive keghi nongu no I gholu mono I mjochile auve aye,

²⁸ I no axukighide lono nongu mjochile nani, Ni ampi no ghuthu tsüni no küghüsü no nongu ghime nani.

²⁹ Nongu no no tianuli heqhi chunani.

³⁰ I no now qhemghaike-a kütsave tsünani, tsüngqüi keu kiptia hephove tsü nani, ajulho iluqi akeu shou nongu sükumo qhepuku nani, eno nongu milive nani.

³¹ I no no phughiqo xaleve tsünani, akümlla-a kütsaleve tsüno nongu ghakishi xo ikhilu tsümo nani.

³² Ni ampi no aghakhu kütsale nani eno no ghümi tile akemi no apuchopungo nani.

³³ I no nongu shou azütakikihi süghi no shiyeqo gholo nongu kuthole puwuve nani. No ghakhu eno aphughiqo ye ixapinyi küghüve nani.

³⁴ “Nongu no no ghümi yeghi lo akelono aghakhu ye yenguyi Sabbath kulhokiqhi ithulu nani.

³⁵ Nongu no ache kelo ayeghi no Sabbath ithumla no achekeu itehi ye pighive no yenguyi akulhokiqhi ithulu nani.

³⁶ No ghümi yeghi lono I no nongu xüakemi mlo shikulotive tsünani. Asü nipa fupe chekeu sütsa no panongu shikümsa azütakikihi zülo poche keshi kuha nani, eno khumu hachemo keghi iluqi nani.

³⁷ Khunomu hachemo keghi azütakikihi zülo poche keshi lakhino lakhi shou küpxa nani. Nongu ye aghümi puqhelu kepu küha nani.

³⁸ Nongu ye shiyeqo dolono pühave nani, eno no ghümi yeghi no nongu munove nani.

³⁹ Nongu xüaghi kemi ye nongu eno no puasü xine ghenguno no ghümi yeghi lono hauve nani.

⁴⁰ “Ikemu panongu no pano eno pano puasü pishikiqhi xine I shou shikeu eno I hebide keu piphe aye,

⁴¹ kughengu Ni ghi panongu mjochile no pano ghümi yeghi lo puwuve kehu, panongu no mtshaivü eno axine lhoaye shikithe aye,

⁴² I no Jacob, Isaac, eno Abraham sasü Iw puloshoqhi shikeu kümsülu nani, eno aghakhu kümsülu nani.

⁴³ Ikemu aghakhu lo küami ye ti qhive paghi masa, ayeghi ye timi kühano akulho qhilu masa, eno timiqo no I khuaye ngo Iw pimheye milive ke ghenguno shikithe masae.

⁴⁴ Tishimu panongu no aghümi yeghi lo akelo, Ni ye panoqo milivemo eno qhoi kütsave no panongu sasü shikeu Iw puloshoqhi kubove mo nani, kughengu Ni ye Ampeu pano Lhou ke.

⁴⁵ I no panongu ghenguno Iw puloshoqhi pano puasüqo sasü shikeu kümsü luni, I no pano Lhou shiniye shiyeqo nhethe lono Egypt lono saipeghi ke: Ni ye Ampeu ke.”

⁴⁶ Pimheye, akhuaye eno ayezah hipaqo ye Sinai Toghi lono Moses vecheo Ampeu ngo Israelmi dolo mlakeu ke.