ACHINE 25 - Sumi Naga CL (Re-edited) Bible (BSI)

Sabbath Mpe

¹ Ampeu no Sinai Toghi lono Moses pütsa no pi,

² Israelmi vilo pilo, “Kughou I no tsü akeu yeghi lo nongu no iloghi luveni keno, ayeghi ghi Ampeu lau Sabbath khuaye papeni.

³ Ampe tsügho dolo nongu no alu lo apiti xusü, eno atsailu chiphe no xolu nani.

⁴ Ikemu ampe akütsüniu loye aluza ghenguno iqüghai akulhokiqhi, Ampeu lau Sabbath shi tsüni. Alu lo apiti xusümo momu atsailu chimoni.

⁵ Pakutoshi no ipeghi keu xa jeli eno chiphemo keu tsaithi xolu moni. Ti ye ayeghi ghenguno akulhokiqhi mpe ke.

⁶ Tipa mpe lo ayeghi lono ipeghi keu chuqupu no nongu, no qemi, nongu no aju piqe kemi, inaghami no gholo xü akemi kümtsü saje shini,

⁷ eno now pichepighi ngo aluza lo tüghashi akeqo sala ghi shini: Tipau lo pekighi kümtsü chulu nani.”

Jubilee Mpe

⁸ “Ampe tsüni no ghuthu tsüni küghüsü kelo ampe lhobidi toku kihi lo.

⁹ Tishino aqhi akütsüniu atsala achighiu Lokichile Tsala lo aghakhu kuchopu lo afuko küigha lo.

¹⁰ Nongu ye ampe lhoapunguu kishe kütüta shi qhino aghakhu lo küami kümtsü lau kuqhokiphe sheshulo. Hi ye nongu ghenguno Jubilee ke, milakhi khino no pütüta mheghi ithulu chileveni eno pütüta lagha lo idewolu peni.

¹¹ Ampe lhoapunguu ye nongu ghenguno Jubilee ke; alu lo apiti xusü moni, eno pakutoshi no ipeghi keu lumo momu chiphemo keu tsailu lono pithi keu xomoni.

¹² Hi ye Jubilee ke nongu ghenguno akimthe shini. Nongu ye aluza lo pekighi jeli chuni.

¹³ “Jubilee mpe hipau lo nongu ye pütüta mheghi ithulu chileveni.

¹⁴ Israelmi aküsami vilo ayeghi jesü momu pa launo qhülu püaghi aye, lakhino lakhi lau akumou shimoni.

¹⁵ Jubilee mpe thiu ampe kikihi kiqi lono ame tsüchileni, eno pa ghi ghile hulu kepu mpe kiqi lono o lau jesüni.

¹⁶ Ampe kutomo aghi aye, ame pukulo, ikemu ampe aghulo aghi aye ame kümghü lo, kughengu pa ye ghile hulu kepu kiqi lono o lau jesü ani.

¹⁷ Lakhino lakhi lau akumou shimoni, ikemu nongu Lhou msalo, kughengu Ni ye Ampeu nongu Lhou ke.

¹⁸ “Tighenguno nongu ye Iw pimheye eno akhuaye papelo, tishiaye nongu ye aghakhu lo sükusho lono xülu nani.

¹⁹ Ayeghi no achuqupu tsüno nongu no aghakiqi shi chuno sükusho lono xülu nani.

²⁰ Nongu no ishi piluvi, ‘Nino xusümo eno ghile humo aye, ningu ye ampe akütsüniu kiu chuni kea?’

²¹ I no ampe akütsüghou lono Iw kükümgha nongu shou ighi penike azah tsüno ayeghi no ampe küthü kutolo achuqupu lukümkha shipe nani.

²² Kughou nongu no ampe akütacheu lo xusüni keno, nongu ye athi kithe ghile humoke dolo ampe atokuu kutolo athi akiye chu ani aphi.

Amheghi Qhüchilekulu

²³ “Ayeghi ye alhokuthu ghenguno jeve moni, kughengu ayeghi ye Iw eno nongu ye I yeghi lo inaghami eno kachenami ke.

²⁴ Nongu no amheghi shipe akeu ghakhu kümtsü lo ayeghi qhüchile lupe kepu shilo.

²⁵ “O thiküzümi lakhi no kumlhomi shive no pa yeghi hami jeve aye, pa bolomi no ighi no ti qhüchilelu pelo.

²⁶ Milakhi no qhüchile luni kemi abolomi kühave namu pa ampi no kinikülü shive no qhüchile lukepu laghi aghi aye,

²⁷ pa no jeveke mpe lono kihiju no ame pesü khuu lau jesüve keno tsüve püzü pa mheghi luchile luveni.

²⁸ Ikemu pa no qhüchile kulupu pisa lukümkha küha aye, ti ye Jubilee mpe tomoke kutolo qhüluve keu u lo tishi qhini. Jubilee lono tipau pheve no inahuu ampemi u lo idewoveni.

²⁹ “Milakhi no aliwo kuptu phughi lo aki jeve aye, pa ye ti jeveke mpe dolo ye qhüchile luveni keu chipiu ani.

³⁰ Ikemu tipa mpe lono qhüchile lumo aye, aki tipau ye tiqheli kupuju lo aküqhüu sala shivae; ti ye Jubilee lomu tsüchile moae.

³¹ Ikemu aliwo küha keu aphu lo akiqo ye alu kiqi lono kihini. Tipaqo ye qhüchilelu nani eno Jubilee lono pheveni.

³² Levi laghami ghengu ye, pano no phughi lo akiqo ye kugho kughomu qhüchilelu nani.

³³ Panongu no pano phughi lo aki jeve namu, Jubilee lono tsüchile lunani. Kughengu Levimi phughi lo aki akeqo ye Israelmi gholo tino pano mheghi ke.

³⁴ Ikemu Levimi phughi lo achu kümza yeghi ye jemoni; kughengu ti ye alholo pano mheghi ke.

Kumlhomi lau Kikimiye

³⁵ “No thiküzümi no kumlhomi shive no apo qemlave aye, pa ye inaghami eno kachenami lakhi toi nono pa tuchoni, eno no gholo xüni.

³⁶ Pa launo akighishe momu ala lumoni, ikemu O Lhou sümsa no pa pelo o gholo xüpelo.

³⁷ No ye akighishe lono pisa pa püna moni, momu ala shiniye achuqupu pa tsümoni.

³⁸ Ni ye Ampeu khuu Canaan yeghi pesü nongu tsüno nongu Lhou shinike Egypt lono nongu saipeghi keno, nongu Lhou huke.

³⁹ “No thiküzümi aphivilo akemi no kumlhomi shive no pa ampi pesü o vilo jesuve aye, no ye pa pesü aqüaxeu shimoni:

⁴⁰ pa ye aqe kiqemi eno kachenami shi o gholo Jubilee mpe kutolo ngoni.

⁴¹ Tithiu pa eno pa tianuli ye o qhive no pano lagha eno amheghi lo idewoveni.

⁴² Kughengu panongu ye I qemi, I no Egypt lono saipeghi ke; panongu ye aqüaxe shi jeve moni.

⁴³ Ayiküsa shi panoqo peitha moni ikemu nongu Lhou sümsalo.

⁴⁴ No qüaxemi kiptimi totimi ghengu ye: nongu sümxape akeqo shiye launo nongu no qhülu nani.

⁴⁵ Nongu no inaghami eno pano lagha nongu gholo akemi launo qhülu nani, ti ye no ghakhu punu kemi pano tianuli nongu no qhüpe no mheghi shilu nani.

⁴⁶ Nongu no tipaqo pesü amheghi shi alholo no tianuli lau qhitsülu nani. Nongu no panoqo pesü aqüaxe shilu nani, ikemu no thiküzümi Israelmi shou ye ayiküsa shi peitha moni.

Kumlhomi Qhüchilekulu

⁴⁷ “Inaghami momu kachenami no gholo akemi no kinimi shiveni, eno no thiküzümi no kumlhomi shive no pa ampi pesü inaghami momu pano laghami lau jesuve aye,

⁴⁸ pa jeve aghi namu pa thiküzümi no qhüchile luve kepu chipiu aphike.

⁴⁹ Momu pa thiküzümi, papu thiküzümi, eno pano bolomi no pa qhüchilelu nani. Tikumo mu pa no kinimi shive aye pa ampi qhüchile lunani.

⁵⁰ Pa ye pa küqhüu sasü pa jeveke mpe lono Jubilee mpe kutolo ame kihi juni. Pa mpeu gholo akeu me ye aqe kiqemi jume kiqi lono küghani.

⁵¹ Jubilee mpe tonike kushuo aghi aye, pa jeve keu me shou küpha no tsüni.

⁵² Ampe no aghulo likhive aghi aye, pa no kihiju no qeve keu kiqi lono tsüni.

⁵³ Ampe ampe kiqi lono aqe kiqemi peitha cheke toi pa peithani. Pa mpeu ye ayiküsa shi pa peitha moni.

⁵⁴ Hipa ghola lono pa qhüchile move aye, pa eno pa tianuli ye Jubilee mpe lono pheveni.

⁵⁵ Kughengu Israelmi ye I lau likhi aqemi ke. I no Egypt lono panoqo saipeghi ke: Ni ye Ampeu nongu Lhou ke.