ACHINE 24 - Sumi Naga CL (Re-edited) Bible (BSI)

Akulubo

¹ Ampeu no Moses vilo pi,

² “Israelmi vilo akulu ghenguno olive thazü kütsüghü süghi lopi azah tsülo, tishianguno akulu ye tamono iqü apeni.

³ Kuposhukulu phiki lo Puloshoqhi bohu akeu nhaqhiphi zülono Aaron no tsalakipetsü avelau no inaqhe kutolo akulu küqüpe qhini. Now tiqheli kupuju lo hi ye alholo acheni keu pimheye shivae.

⁴ Ampeu zülo ameshoyi akiviu kulu kibepu lo akulubo akeqo pa no jukutoni.

Akimthe-a lo Asho

⁵ “Ashomkhu akiviu pesü ashopa chighikini mlalo, ashopa lakhikhi lo ashomkhu ahu kini no mlani.

⁶ Ampeu zülo ameshoyi akiviu kibepu achekeu shou asho ajo kini shino tsüghogho qhini.

⁷ Achuqupu kümllagho Ampeu tsükeu gholo kümsükulu saje shinike müsüghüta akiviu pesü ajo lakhikhi lo qhilo.

⁸ Sabbath atsütsü lo Aaron no hitoi kithipe Ampeu zülo qhini; hi ye alholo Israelmi züqhushi puloshoqhi shi anie.

⁹ Asho ye Aaron ngo pa laghami sala, panongu no akimthe-a lono chuni, kughengu hi ye Ampeu tsükeu chuqupu kümllagho lono shishe akimthe saje ikhiphe keu ke.

Lhoupiküptha Ghenguno Ghime

¹⁰ Israelmi gholo timi lakhi, apu no Egyptmi aza no Israelmi, huno aphiki lono Israelmi sasü kimpilu.

¹¹ Timi huno Alhou Je pipütha no ghushove kehu panongu no Moses lau saghi. Pa za ye Dan shiaye lo Dibri nonga Shelomith.

¹² Ampeu pulou mtsümishei panongu vilo pitsü moke kutolo pa khathape qhive.

¹³ Tile Ampeu no Moses vilo pi,

¹⁴ “Timi tipau sasü aghazü khalau ipevelo, paw ghukusho chilu kemi no pa kütsü lo au beno thopi shivepe, eno aqoaho kuchopu no atu pesü veqhive lo.

¹⁵ Tithiu Israelmi vilo, Khukhumu pa Lhou ghusho keu ye pa makho xapuni.

¹⁶ Khuu no Ampeu ghushoni keno aqoaho kuchopu no atu pesü pa veqhiveni.

Anhethi Theli lo Anhethi

¹⁷ “Khukhumu kütami küxü luve tsükeu ye pithive nani.

¹⁸ Khuu no kütami pichepighi pithive tsüni keno aküxü theli lo aküxü tsüchileni.

¹⁹ Milakhi no kütami ghüzave aye pa no shike toi pa lau shini,

²⁰ asaghi theli lo asaghi, anhethi theli lo anhethi, ahu theli lo ahu; pa no kiu ghüzaku pipe keno pa lau tipau shitsüni.

²¹ Khuu no lhoxü pithini keno tipau theli lo tsüchileni, ikemu khuu no timi lakhi heqhiveni keno pa pithive nani.

²² Pimheye hi ye kachenami eno aghakütsami Israelmi kümtsü lau aphiphishi pimhe nani, kughengu niye Ampeu nongu Lhou ke.”

²³ Moses no hitoi Israelmi vilo pive kethiu panongu no ghukusho tsa pikeu timi sasü aghazü khalau ipeve no atu pesü veqhi pithive. Ampeu no Moses azah tsüke toi Israelmi no shive.