ACHINE 23 - Sumi Naga CL (Re-edited) Bible (BSI)

Ampeu lau Tiqhetini

¹ Ampeu no Moses vilo pi,

² “Israelmi pütsa no pilo, Ampeu lau tiqhetini hipaqo ye akimthe hoho kiqi lono sheshu lo; hipaqo ye I no kihitha tsüke.

Sabbath

³ “Atsala tsügho dolono akümla shini, ikemu atsala akütsüniu ye Sabbath kulhokiqhi hoho tsalae. Nongu ye akümla shimoni, Nongu no khile khile xünamu hi ye Ampeuw Sabbath ke.

Hechekulu

⁴ “Kihitha tsükeu tiqhetini hipaqo ghuloki lo sheshuni.

⁵ Ampeu lau Hechekulu ye aqhi atüghüu, atsala chighiabidiu khetsünhe ilove kethiu no huthuni.

⁶ Atsala chighiapunguu lono Kholaqhi sümokeu Sho Tiqhetini ikhiluni eno atsala tsüni kutolo nongu ye kholaqhi sümokeu sho chuni.

⁷ Atsala atüghüu lo nongu no akümlla hoho shini; nongu ye tsalakipe kümla shimoni.

⁸ Nongu ye atsala tsüni achuqupu kümllagho Ampeu tsüni. Atsala akütsüniu lo nongu ye akümlla hoho shini, eno tsalakipe kümla shimoni.

Ghile Amsüu Tiqhetini

⁹ Ampeu no Moses vilo pi,

¹⁰ “Israelmi vilo pilo, Kughou nongu no I no tsü akeu yeghi lo ilo ghile huni keno, aghipe kipiqhe atüghüu pesü achineu lau süghini.

¹¹ Pa no Sabbath shiwo thoghiu Ampeu lau akimchi kümllagho shi ti tsüno Ampeu pelo ikhilu tsüpeni.

¹² Nongu no athi akimchi kümllagho süghike tsalani akipti kümllagho shi ampe lakhi mbetsü tukutiye kühakeu pesü mllani.

¹³ Tipau gholo ashomkhu thazü pesü kunuve keu ahu kini pesü Ampeu lopushi mülüi keu chuqupu kümllagho tsüni, eno atsaizü kümllagho liter lakhi süghini.

¹⁴ Nongu no hipau kümllagho Alhou lau süghi mphi loye asho na, athi küxü na, save keu namu chumoni: hi ye tiqheli kupuju lo nongu no khile xüni keno alholo pecheni keu pimheye ke.

Ghile Tiqhetini

¹⁵ “Sabbath thiu nongu no Ampeu lau aghipe kipiqhe süghike tsalani no apine tsüni kihini.

¹⁶ Atsala lhopungu, ti ye Sabbath akütsüniu shiwo thoghiu, kutolo kihi no nongu ye athi kithe pesü athi kümllagho Ampeu lau tsüni.

¹⁷ Akibo lakhikhi no ashomkhu akiviu ahu kini pesü kholaqhi sükeu sho shipe akimchi kümllagho shi Ampeu lau süghini, ti ye ghile amsüu shi Ampeu lau tsüni.

¹⁸ Asho gholo ampe lakhi mbeti tsüni, amshitsü lakhi, eno anetsü kini tukutiye küha keu pesü tsülo. Hipaqo ye athi eno atsaizü kümllagho gholono Ampeu lopushi mülüi akipti kümllagho shi tsüni.

¹⁹ Anetsü lakhi axine kümllagho shi tsüni eno ampe lakhi mbetsü kini külakishi kümllagho shi tsüni.

²⁰ Achineu no asho gholo ambeti küma süno Ampeu lau akimchi kümllagho shi achinemi ghenguno tsüni, hipaqo ye akimthe ke.

²¹ Tipa tsala lo asheshu no aqoaho kumqoni, eno tsalakipe kümla shimoni. Tiqheli kupuju lo hi ye alholo acheni keu pimheye shivae.

²² “Nongu lulo ghile huke lo aluza phelo aghi akeqo gholu kevi, momu lukhamove keqo gholu kevilo. Tipaqo ye kumlhomi ngo kupokichemi ghenguno qhiveni: Ni ye Ampeu nongu Lhou ke.

Ampe Kithe Tiqhetini

²³ Ampeu no Moses vilo pi,

²⁴ “Israelmi pütsa no pilo, Aqhi akütsüniu atsala atüghüu lo akimchi kulhokiqhi tsala pinini, eno ti kümsükulu shi afuko ighani eno akimthe hoho shini.

²⁵ Nongu ye tsalakipe kümla shimono Ampeu lau achuqupu kümllagho tsüni.”

Lokichile Tsala

²⁶ Ampeu no Moses vilo pi,

²⁷ “Aqhi akütsüniu atsala achighiu ye Lokichile Tsala ikhiluni. Tipani ye kümvüni ke ghenguno kumqoni eno achuqupu kümllagho Ampeu lau tsüni.

²⁸ Tipani ye akümla shimoni, kughengu ti ye axine peve tsünike Ampeu lau Lokichile Tsala ke.

²⁹ Khuu no tipani kümvü moni keno pa ye Alhou timiqo gholono hapheveni.

³⁰ Khukhumu tipani akümla shive keu ye I no pithive nani.

³¹ Nongu ye kiu kümla mu shimoni. Hi ye tiqheli kupuju lo pecheni keu pimheye shivae.

³² Aqhi lo atsala atokuu khetsünhe ilove kethiu no huthusü thoghiu avela kutolo nongu ye Sabbath ikhiluni. Hi ye akimchi Sabbath kulhokiqhi shini eno nongu ye kümvüni.”

Apusho Tiqhetini

³³ Ampeu no Moses vilo pi,

³⁴ “Israelmi pütsa no pilo, Aqhi akütsüniu atsala chighiapunguu lono huthusü atsala tsüni kutolo Apusho Tiqhetini ikhiluni.

³⁵ Atsala atüghüu lo akimthe hoho shini eno tsalakipe kümla kiumu shimoni.

³⁶ Atsala tsüni dolo achuqupu kümllagho pesü Ampeu tsüni. Atsala akütacheu lono akimthe hoho shino Ampeu lau achuqupu kümllagho tsüni. Ti ye akimchi hoho kehu nongu ye kiu kümla mu shimoni.

³⁷ “Kihitha tsükeu tiqhetini hipaqo ye Ampeu salake nongu ye achuqupu kümllagho, akipti, athi, eno atsaizü kümllagho pesü avehupu shikeu tsalani no Ampeu tsünike sheshu no kumqoni.

³⁸ Akümllagho hipaqo ye Ampeuw Sabbath gholo nonguw ashoqhi kümllagho eno pulokini kümllagho Ampeu tsükeu gholo küqhani.

³⁹ “Aqhi akütsüniu atsala chighiapunguu lo nongu no ghile lupusü ighi luve kelono tiqhetini hipau atsala tsüni pinini. Atsala atüghüu ngo akütacheu ye akimchi kulhokiqhi shini.

⁴⁰ Tipani nongu xathibo lono axathi akiviu hami xoni, amsabo loka, asüminipho loka, eno tsüzüsü loka pesü Ampeu nongu Lhou zülo atsala tsüni alovini.

⁴¹ Atsala tsüni tiqhetini shi hipau pinini. Tiqheli kupuju lo aqhi akütsüniu lo nongu ye pimheye hipau peche masae.

⁴² Israelmi kümtsü no atsala tsüni apusho lo ngoni,

⁴³ tishianguno nongu polo kughukomi pelo I no Egypt lono Israelmi saipeghi kelo panongu ye apusho lo ngope kepi ithi peni: Ni ye Ampeu nongu Lhou ke.”

⁴⁴ Ampeu no kihitha tsükeu tiqhetini vehu hipaqo Moses no Israelmi vilo sheshu.