ACHINE 22 - Sumi Naga CL (Re-edited) Bible (BSI)

¹ Ampeu no Moses pütsa no pi,

² “Aaron ngo pa nuli pelo Israelmi no akimthe kümllagho I lau ikhiphe tsükeu shipütha mono agigihupu shi peithalo pilo: Ni ye Ampeu ke.

³ Panongu vilo pilo, ‘Tiqheli kupuju lo no laghami khuu no mithemo pülaghi Israelmi no akimthe kümllagho I lau ikhiphe tsükeu kupunu ighini keno, pa ye I zülono hapheve nani: Ni ye Ampeu ke.

⁴ Aaron polo kughukomi apügha küsü momu aphi lono azü ipeghi kemi khumu mithelu moke kutolo akimthe kümllagho chumoni. Khukhumu akithi kumo, momu aphizü ipeghi keu buluke lono mithe move,

⁵ momu mithekumo lhoxü na timi namu buluke lono mithe move keu ye

⁶ avela kutolo mithemo niae eno azü kuchhuve moke kutolo pa ye akimthe kümllagho lakhimu chumoni.

⁷ Khetsünhe ilove kethiu no pa ye mithelu nani eno tithiu no pa no akimthe kümllagho pa chuqupu shi chulu nani.

⁸ Pa ye lhoxü akutoshi no thive keu momu tüghashi no tsüve keu shi chumoni; tino pa pelo mithe move peni ake: Ni ye Ampeu ke.

⁹ Achinemi ye I no azah tsükeu papeni, tikumo aye panongu no akipimi shive no thive nosae: Ni ye Ampeu panongu shikimthe chekeu ke.

¹⁰ “Achineu bolomi likhi no thono pa kilo inami momu aqe kiqemi khumu akimthe kümllagho chumlae.

¹¹ Ikemu achineu no paw pisa pesü qhüluve kemi aqemi eno pa ki lono punu kemi no chulu nani.

¹² Achinemi nga no achinemi kumomi sasü küghüna aye, li ye akimthe kümllagho chumlae.

¹³ Ikemu achinemi nga no chimemi shive momu akibo ixave papu kilo ideighive aye, li ye ti chulu nani; ikemu kütami ye chumlae.

¹⁴ Khuana no mthano ti chuve aye, pa ye tipau lo saje pungu lo lakhi süküpha no achineu lochileni.

^15-16 Israelmi no Ampeu lau akimthe kümllagho tsükeu kütami no chupusü akipimi xapuve no kitiqe nosa kehu achinemi ye panongu shikitiqe moni: kughengu Ni ye Ampeu nongu shikimthe chekeu ke.”

Ikhikulupu Kümllagho

¹⁷ Ampeu no Moses pütsa no pi,

¹⁸ “Aaron ngo pa nuli eno Israelmi kümtsü vilo pilo, Israelmi momu inaghami lakhi no ashoqhi momu pulokini kümllagho ghenguno Ampeu lau akipti kümllagho süghi kelo,

¹⁹ ti ikhilutsü peni kehu amishi na ambe na ane namu atsü tukutiye kühakeu shini.

²⁰ Kiu kiumu tukutiye akeu lhoxü pesü mlla keu ye ikhilu tsümoe.

²¹ Milakhi no ashoqhi shikupu niye momu pulokini kümllagho shi külakishi kümllagho ghakishi Ampeu tsü kelo, ti ye tukutiye kühakeu lhoxü shini.

²² Lhoxü anhethi iche, aphiau iche, kinitave keu, apiyi iji, ayiko ipucho momu ilhamui keu pesü Ampeu tsümoni, momu achuqupu kümllagho shi akiptia lo Ampeu tsümoni.

²³ Pulokini kümllagho loye nongu no lhoxü thuwumo momu kupukülai mokeu tsüluvi, ikemu ashoqhi kümllagho lo ti ye ikhilutsü mlae.

²⁴ Kiukiu lhoxü mu aphighü thi shipüsave, chishiphove, hexüve, momu ghithave keu pesü Ampeu mlla moni. No ghakhu loye tishi mlae,

²⁵ momu inaghami launo küqhükili shi saghi keu lhoxü pesü no Lhou chuqupu shitsü mlae. Tipaqo ye tukutiye ani kehu ikhilu tsümo nani.”

²⁶ Ampeu no Moses vilo pi,

²⁷ “Kughou amshiti, ambeti, momu aneti pitini keno, atsala tsüni dolo aza gholo qhini, eno tithiu ye achuqupu kümllagho shi ikhilutsü nani.

²⁸ Ikemu amshiqu momu ambequ ngo ati ye atsala lakhi lono heqhi moni.

²⁹ Kughou nono Ampeu lau shikimthikütsü ghakishi shini keno, ti ye ikhilu kulupu shi tsüni.

³⁰ Ti ye tipa tsalani no chuveni eno thanau sala kitila mu qhimoni.

³¹ “I zakütsü kümtsü gholu no papelo; Ni ye Ampeu ke.

³² I je kimthe shipixi moni, kughengu Israelmi zülo Ni ye akimthe kepi ithi masae. Ni ye Ampeu nongu shikimthe chekeu,

³³ nongu Lhou shinike I no Egypt lono nongu saipeghie: Ni ye Ampeu ke.”