ACHINE 21 - Sumi Naga CL (Re-edited) Bible (BSI)

Akimthepu eno Achinemi

^1-3 Ampeu no Moses vilo pi, “Aaron nuli achinemi vilo pilo: Achinemi khumu abolomi, aza, apu, apuanga, athiküzüu, momu achepu athathe (külaumo no pa gholo akeu) thive kelono kumo aye akumo buve no mithe move keu shimoni.

⁴ Külakupu lono kütshükime akeqo kithi vecheo pa pesü mithe move keu shimoni.

⁵ Achinemi khumu akütsüsa, akichimhi miye moni, momu aphi ghipu moni.

⁶ Panongu ye pano Lhou lau akimthe shini eno Pa shipütha moni. Kughengu panongu no Ampeu chuqupu kümllagho pesü mlla cheni kehu akimthe shini.

⁷ Panongu ye kitiqeve kemi küsalhami momu akibo ixave kemi sasü külakupu shimoni; pa ye Alhou lau akimthe shimasae.

⁸ Achinemi ye akimthe kepi kihilo, kughengu pa no achuqupu kümllagho pesü nongu Lhou tsücheni; nongu shikimthe chekeu Mpeu ye akimthe kehu achinemi ye akimthe kepi kihilo.

⁹ Achineu nga no küsalhami shive aye li no papu shipütha ani; li ye ami no pitiveni.

¹⁰ “Achinetou ye pa kütsü lo nukikishe thazü lepukuvae eno achinemi phimini pepu penike kishekimtheve akehu, pa ye amloksa piye ghi asa xemono qhimoni momu aphimini süxü moni.

¹¹ Pa ye pa puaza shiaghi namu akumo akeu kilo ilo no mithe move keu shimoni.

¹² Pa ye akimthe-a lono ipe moni, tikumo aye pa Lhou kimthe-a shikitiqe nosae, kughengu Alhouw kishekimthe keu thazü no pa shou auvae: Ni ye Ampeu ke.

¹³ Pa ye ilithathe pesü pa nipu shini.

¹⁴ Pa ye chimemi, kitiqeve keu totimi, momu kütüqhalimi pesü pa nipu shimoni. Ikemu pano laghami ilithathe sasü külauni,

¹⁵ tishikeu lono pa tianuli shikitiqe monani, kughengu Ni ye pa shikimthe chekeu Ampeu ke.”

¹⁶ Ampeu no Moses pütsa no pi,

¹⁷ “Aaron vilo pilo, Tiqheli kupuju lo nongu polo kughukomi aphimpi lo tukutiye akemi khumu achuqupu kümllagho I lau süghi moni.

¹⁸ Aphimpi lo tukutiye hipaqo akemi khumu aphivilo ighi moni: anhechemi, apukhu kighichemi, aju shipüsave kemi, momu alho vimo kemi,

¹⁹ aphiau kinita kemi;

²⁰ aghütsü kughukomi, alu kughukhomi; anhethi lakhi likhi kemi, ayiko küsü akemi eno shokomi.

²¹ Achineu Aaron polo kughukomi aphimpi lo tukutiye akemi khumu achuqupu kümllagho I lau süghi moni.

²² Pa ye Alhou chuqupu chulu nani, achuqupu kümllagho ngo shishe akimthe chuqupu ghi chulu nani,

²³ ikemu pa ye aphimpi lo tukutiye ani kehu nhaqhiphi phivilo momu akiptia kupunu ighi moni. Pa ye I kimthe nhemgha shipixi moni, kughengu Ni ye tipaqo shikimthe chekeu Ampeu ke.”

²⁴ Ikehu Moses no Aaron ngo pa nuli eno Israelmi kümtsü vilo pive.