ACHINE 20 - Sumi Naga CL (Re-edited) Bible (BSI)

Hekibide Ghenguno Aghime

¹ Ampeu no Moses pütsa no pi,

² “Israelmi vilo pilo, Nongu gholo momu inaghami nongu gholo akemi khuu no pa tianuli pesü Molekh mllave peniye tsüni keno, aqoaho kümtsü no atu pesü veqhiveni.

³ Pa no pa tianuli pesü Molekh tsükeu lono I kimthe-a shipixi eno I je kimthe shipütha kehu, I no pa launo I gi kughove nani eno Iw timiqo gholono hapheve nani.

⁴ Ikemu aqoaho no pa no mlakeu kughuchove no pa pithimo aye,

⁵ pa eno pa lagha eno Molekh papemi kümtsü launo I gi kughove no Iw timiqo gholono hapheve nani.

⁶ “Khuana no tumumi momu kithixashemi küsütsa eno tipaqo lau wu aye, I no pa launo I gi kughove no Iw timiqo gholono hapheve nani.

⁷ Tighenguno nongu kishekimthe no akimthe shilo, kughengu Ni ye Ampeu nongu Lhou ke.

⁸ Iw pimheye papelo; Ni ye nongu shikimthe chekeu Ampeu ke.

⁹ Khukhumu pa puaza ghusho keu ye pithiveni; pa kithi ye pa makho shini.

Asalha Ghenguno Aghime

¹⁰ “Timi lakhino aküsami Israelmi lakhi nipu sazüve aye, pa ngo atotiu gha pithiveni.

¹¹ Milakhi no pa pu nipu gholo lakhi sazüve aye, pa pu shipütha anike pama gha pithiveni. Pama kithi ye pama makho shini.

¹² Milakhi no pa mukishiu sazüve aye pama gha pithiveni. Pama ye akumou lhoaye shivae; pama kithi ye pama makho shini.

¹³ Kiptimi lakhi no kiptimi sazüve aye, pama ye aphikümqhüpu shivae; pama gha pithiveni. Pama kithi ye pama makho shini.

¹⁴ Milakhi no pa nipu ngo li paza pama gha küghüna aye, ti ye küthakügha ke nongu gholo tikithipu shipemo nike pano küthü gha ami no pitiveni.

¹⁵ Timi lakhi no lhoxü sasü ipa aye, kinikujo pithiveni.

¹⁶ Totimi lakhi no lhoxü sasü ipa aye, kinikujo pithiveni. Panongu kithi ye pano makho shini.

¹⁷ “Timi lakhi no pa chepu momu pa chepukishe sasü külakupu shi aye pama ye aqha zülono shikukujo no aqoaho gholono hapheveni. Pa ye pa chepu sazüvae, ti ye atichepu, eno pa ye aghime xapu nani.

¹⁸ Timi lakhi no totimi no atüqhüdo ighi akelono lono ashiaji küqha aye pama kinikujo aqoaho lono hapheveni.

¹⁹ Timi lakhi no paza tsünipu momu papu chelimi sazüve aye, akiphikumo tipau ghenguno pama ye aghime xapuni.

²⁰ Timi lakhi no papu thiküzüu nipu sazüve aye, papu thiküzüu shipüthave anike pama ye tipau ghenguno atianuli shimono thinani.

²¹ Timi lakhi no pa thiküzümi nipu sasü külau aye ti ye mithekumo ke, eno pa thiküzüu shipüthave akehu pama ye atianuli shimo nani.

Nongu ye Akimthe Shilo

²² “Iw pimheye eno akhuaye kümtsü pelulo, tishianguno I no nongu sasü ilo chekeu yeghi lo nongu ye xülu no puqule monani.

²³ I no nongu zülono hapheve akeu shiye khuayeqo pape kevilo, kughengu panongu no thime hipaqo shicheni kehu I no mithi cheni.

²⁴ Ikemu I no nongu vilo pivae, ‘I no nongu mheghi shi akichhizü ngo akhingozü qowu akeu yeghi hipau pesü nongu tsüni.’ Ni ye Ampeu khuu ashiayeqo launo nongu kishe kütüta shitsü keno, nongu Lhou huke.

²⁵ Tighenguno nongu ye ashi aghau khipaqo no akimthe eno mithekumo keno mtsümishei kütüta shini. Ashi aghau mithemo keu ye chumoni. I no tipaqo ye mithemo kepi pivae eno tipaqo chukeu lono nongu ye mithe move nani.

²⁶ Nongu ye I lau akimthe shini, kughengu Ni Ampeu ye akimthe ke, Iw shiniye I no ashiayeqo launo nongu kishe kütüta shike.

²⁷ “Kiptimi na totimi namu tumumi momu kithixashemi küsütsa keu ye atu no veqhiveni; pa kithi ye pa makho shini.”