ACHINE 2 - Sumi Naga CL (Re-edited) Bible (BSI)

Athi Kümllagho Yezah

¹ “Khuana no akümllagho shi Ampeu lau athi kümllagho süghi kelo, ti ye ashomkhu akiviu shini. Pa no thazü ngo müsüghüta zü pesü tipau lo süni,

² eno Aaron nuli achinemi lau süghini. Akümllagho qhoi pitipe Ampeu mllavae pi kümsülu apenike achineu no ashomkhu au kiye lakhi, thazü eno müsüghüta kuchopu ikhipe akiptia lono pitiveni, mülüi keu xo hino Ampeu lopu ke.

³ Amkhu nguno alau athi kütau achili thaqhü ye Ampeu lau agha shive keu saje eno kümtsü dolo akimtheu shive akehu Aaron ngo pa nuli sala shini.”

⁴ “Khuana no akümllagho shi amikülü lono wochhe keu sho peighi aye, ti ye ashomkhu akiviu no shikeu eno kholaqhi sümono thazü pesü kunuve keu, momu ipumhei keu shopa kholaqhi sümono thazü no nuküxü no shikeu shini.

⁵ Tsala akümllagho no akhosali lono wochhe keu sho shiaghi aye, ti ye ashomkhu akiviu no shikeu eno kholaqhi sümono thazü pesü kunuve keu shini.

⁶ Asho tipau ye süthape amuno shive no thazü pesü tipaqo shou lepukuni; tino athi lo pekighi kümllagho ke.

⁷ Akümllagho no asho kibe shiaghi aye, ti ye ashomkhu pesü thazü lono kunuve keu sho shini.

⁸ Nongu no athi lo pekighi kümllagho hipaqo pesü Ampeu lau ighi kelo achineu no ikhipe akiptia lo ighini.

⁹ Achineu no kümsükulu saje aghulo süthape akiptia lono pitini. Mülüi keu xo hino Ampeu lopu ke.

¹⁰ Akümllagho kütau achili thaqhü ye Ampeu lau agha shikeu saje eno kümtsü dolo akimtheu shive akehu Aaron ngo pa nuli sala shini.”

¹¹ “Ampeu lau akümllagho jeli süghi keu lakhi lomu kholaqhi sümoni, kughengu kiukiu ghakishi lomu kholaqhi momu akhingozü ye akümllagho shi pitipe Ampeu tsümlae.

¹² Ghile lo amsüu kümllagho shi nongu no tipaqo Ampeu lau süghini, ikemu ti ye mülüi keu xo shi pitive moni.

¹³ Nonguw athi kümllagho ye ado ghuloki puqhelu apenike amti pesü kiteni; nongu ye nongu Lhou sasü amti puloshoqhi shipüani ke khilemu no kümllagho lo tülalove kevilo. Nongu kümllagho kümtsü lo amti peithani.”

¹⁴ “Nongu no Ampeu lau athi amsüu kümllagho süghi aye, ti ye xüthilei anileshi lupughi keu ami lono küsave no apikhi lono shesüve keu shini.

¹⁵ Tipau lo thazü eno müsüghüta lesüni. Tino athi kümllagho ke.

¹⁶ Tithiu achineu no kümsükulu saje shesüve keu tikishi ngo thazü aghulo eno müsüghüta kuchopu ikhipe pitiveni: hino Ampeu lau achuqupu kümllagho ke.”