ACHINE 19 - Sumi Naga CL (Re-edited) Bible (BSI)

Ampeu ye Akimthe

¹ Ampeu no Moses pütsa no pi,

² “Israelmi qoaho vilo pilo, Akimthe shilo, kughengu Ni Ampeu, nongu Lhou ye akimthe ke.

³ Nongu ye I no azah tsüke toi pütüta puaza sümsa lo eno Sabbath pelulo: Ni ye Ampeu nongu Lhou ke.

⁴ I qhive no ajulho mlla kevilo; ayi pesü alhou julho shisü no tipaqo mlla kevilo: Ni ye Ampeu nongu Lhou ke.

⁵ “Kughou nongu no kuposhukulu kümllagho lhoxü heqhini keno, I no ayezah nongu tsükeu pelulo eno I no akümllagho ikhilu tsü nani.

⁶ Lhoxü heqhi kelo ashi ye heqhike tsala momu thoghiu tsala lono chuvelo. Aküthüni kutolo aghikeu shi ye pitivelo,

⁷ kughengu ti ye mithe moae, eno khuu no tipau chuni keno Ni ye akümllagho ikhilu tsümo nani.

⁸ Khuu no tipau chuni keno ti ye Ampeu lau ikhiphepe tsüve keu kehu akipimi shivae, ikehu pa ye timiqo gholono hapheveni.

O Kisüghümi O toi Kimiye lo

⁹ “Kughou nongu no ghile huni keno, alu phelo aghibo akeu gholu kevilo eno aghipe qhive keu idewo gholu kevilo.

¹⁰ Nongu tsailu lo atsaithi ikiqive keu kichelu nike athiu idewo kevilo; tipaqo ye kumlhomi ngo inaghami ghenguno qhive tsülo: Ni ye Ampeu nongu Lhou ke.

¹¹ “Pükaqhi, pishiqhi momu miki kevilo.

¹² Nono pemla kepushi kümsü aghi aye I je lono ashoqhi shikevilo, ti ye shipütha keu I shou süghi anie: Ni ye Ampeu nongu Lhou ke.

¹³ “No ye o kisüghüu nedaqoda momu pükaqhi kevilo. Nono piqe akemi jume kijili lakhi ghenguno pinamu süchileve kevilo.

¹⁴ Akini kughupomi ghusho kevi momu anhechemi pelo küpxalu penike pa zülo kiumu qhitsü kevilo. I sümsalo: Ni ye Ampeu nongu Lhou ke.

¹⁵ “Küghaki lo achipi kumo shimoni. Kumlhomi lau agiju no kinimi saphuve moni, ikemu amikucho lono akisüghüu shou xathani.

¹⁶ Now timi gholo akimki tsa veküpha wumoni, timi lakhino pa küxü ghenguno atsakügha akelo pa lachile moni: Ni ye Ampeu ke.

¹⁷ “O mlo lo o thiküzümi mithi moni, ikemu pa sasü kiqikuto lulo, tikumo aye pa ghenguno nou no axine shilu nosae.

¹⁸ No ye amkhülu moni momu now timi mithi moni, ikemu o likhi o toi o kisüghüu kimiyelo: Ni ye Ampeu ke.

Iw Pimheye Pelulo

¹⁹ “I no azah tsükeu gholulo. Atsüaqu alho kütüta keqo sawo küghüpa moni. Alu lakhi lo axa jeli kini yisü moni. Aye kütüta kini no ghokeu phimini pepu moni.

²⁰ “Milakhi no pa qeliu pesü kütami nipu amishiu shi penike jesüve akemu li xakipheme tsümono aghi, eno kütami no ayiliu sasü kikivive aye, pama ghimeni thono pithi moni.

²¹ Ikemu timi tipau ye ambetsü lakhi pesü tha-lo keu kümllagho shi kuposhukulu phiki kulaghi lo süghini,

²² eno achineu no tipau pesü pa shikimthe ghi Ampeu zülo tsüno pa xine ikhive tsüni.

²³ “Kughou nongu no Canaan yeghi lo iloghive no axathi sübo jeli shosüni keno, ampe küthü dolo axathi ye mithemo no anani. Tipa ghuloki lo nongu ye ti chumoni.

²⁴ Ampe abidiu lono nongu xathi kümtsü akimthe shi Ampeu shikimthi ghi akümllagho tsüni.

²⁵ Eno ampe apunguu lono nongu no axathi chuni. Nongu no hi kümtsü shilu aye nongu xathibo no axathi alau pithi nani: Ni ye Ampeu nongu Lhou ke.

²⁶ “Ashi lo aji apülaghi chumoni. Küdüu jeli kiumu shimoni.

²⁷ Nongu kütsüsa hothapu kevi momu akichimhi tsapüsa moni.

²⁸ Kithimi ghenguno nongu phi ghile kevi momu aphimpi ghipu moni: Ni ye Ampeu ke.

²⁹ “Nongaqo pesü kütüqhalimi shipe moni, tikumo aye aghakhu shipüthave no kixikila likhive nosae.

³⁰ Sabbath pelulo eno I kimthe-a gihulo: Ni ye Ampeu ke.

³¹ “Tumumi momu kithixashemi lau wumoni; panongu vecheo nongu shikitiqe moni: Ni ye Ampeu nongu Lhou ke.

³² “Kitemi zülo sükümsa shi puthughoni eno kichimi agigihu tsüni, I sümsa lo: Ni ye Ampeu ke.

³³ “No ghakhu lo kupokichemi akemi peitha püsa moni.

³⁴ O küsami Israelmi toi pa peithani eno o likhi o toi pa kimiyeni. Kughengu nongu ghi Egypt lo kupokichemi shiche ke: Ni ye Ampeu nongu Lhou ke.

³⁵ “Akumou kimghipu süta momu ahu peitha no pishiqhi moni.

³⁶ Nongu ye akimghipu süta, ahu, ashoghi, eno abohu achipiu peithani: Ni ye Ampeu khuu Egypt lono nongu saipeghi keno, nongu Lhou huke.

³⁷ Iw pimheye eno ayezah kümtsü papeni: Ni ye Ampeu ke.”