ACHINE 18 - Sumi Naga CL (Re-edited) Bible (BSI)

Akhuaye Kumo Kikivi

¹ Ampeu no Moses pütsa no pi,

² “Israelmi vilo pilo, Ni ye nongu Mpeu Alhou.

³ Nongu no Egypt lo ache kelo panongu no xüche keu ghola pape kevilo, momu Canaanmi yeghi khile I no nongu sawu cheni keno, tipaqo ghola pape kevilo. Nongu ye pano khuaye pape xümoni.

⁴ Nongu ye I khuaye papeni eno I no azah tsükeu peni, Ni ye nongu Lhou Ampeu ke.

⁵ Tighenguno nongu ye I no tsükeu khuaye eno ayezah papeni; nongu no tishilu aye aküxüpu anani: Ni ye Ampeu ke.

⁶ “Nongu khumu abolomi sasü kikivi kevilo, Ni ye Ampeu ke.

⁷ O pu shipütha ghi o za sazü kevilo, li ye o za ke no ye li shipütha moni.

⁸ No ye o za sazü moni, ti ye o pu shipütha keu paphie.

⁹ No ye o chepu momu o chepu shi ghi akibo lakhi lono saputhu keu sazü moni.

¹⁰ O nulimi nga sazü kevilo, kughengu ti ye o shipütha anie.

¹¹ O chepukishe sazü kevilo, kughengu li ye o chepuke.

¹² O pu chepu na o za tsünipu namu sazü kevilo; kughengu li ye o ni limi ke.

¹³ O za tsünipu sazü kevilo, li ye o za ke.

¹⁴ O pu thiküzüu nipu sazü kevilo; li ye o bolomi ke.

¹⁵ O mukishiu sazü kevilo, li ye o nu nipu ke.

¹⁶ O thiküzüu nipu sazü kevilo, ti ye o thiküzüu shipütha anie.

¹⁷ Nono totimi khuu sasü kikivi cheni keno li nga momu li tilimi sazü kevilo; panongu ye abolomi ke eno ti ye kixikilae.

¹⁸ O nipu no xüaphi lono li tsünipu pesü o nipu shinike lu kevilo.

¹⁹ “No ye totimi lakhi no atüqhüdo ighi akelono sazü moni.

²⁰ No ye o kisüghüu nipu sazüve no li gholono o shikitiqe moni.

²¹ No ye o tianuli lakhimu pesü Molekh mllave penike tsükeu lono O Lhou je shipütha moni: Ni ye Ampeu ke.

²² No ye totimi sazü keshi kiptimi sazü moni; ti ye Alhou zülo aphikümqhüpu ke.

²³ No ye kiu lhoxü mu sasü küghüpa keu lono no ampi shikuchhube moni, ti kumono totimi namu lhoxü sasü küghüpa moni; ti ye tuchighive keu lhoaye ke.

²⁴ “Thime hipaqo kiunomu nongu shikitiqepe kevilo, kughengu I no nongu zülono shiye haphe akeqo ye hipaqo vecheo mithe movae,

²⁵ eno ayeghi shikitiqeve ke, tishi kehu tipau xine ghenguno I no ghimeqhi eno ayeghi no tile küxümi puquleve ke.

²⁶ Ikemu nongu na inami no gholo küami namu I yezah eno akhuaye hipaqo peni, eno aphikümqhüpu thime lakhimu pape moni

²⁷ (kughengu nongu züu hipa ghakhu lo akeqo ye aphikümqhüpu hipaqo shiche kehu ayeghi ye mithe moveke),

²⁸ tikumo aye ayeghi no nongu züu timiqo puquleve keshi nongu puqule nosae.

²⁹ Kughengu aphikümqhüpu hikithipu shiche kemi kümtsü panow timi gholono hapheve nani.

³⁰ Tighenguno I no azah tsükeu gholulo eno nongu züu timi khunono aghakhu lo ache keno tipaqow aphikümqhüpu ghushoghili pape kevilo, eno tikithipu shikeu lono nongu ampi shikitiqe kevilo; Ni ye nongu Lhou Ampeu ke.”