ACHINE 17 - Sumi Naga CL (Re-edited) Bible (BSI)

Aghakishi-a

¹ Ampeu no Moses pütsa no pi,

² “Aaron ngo pa nuli eno Israelmi kümtsü vilo pilo, Ampeu no azah hipau tsü ani.

^3-4 Israelmi lakhino Ampeu lau aghakishi kümllagho tsünike kuposhukulu phiki kulaghi lo Ampeu phiki zülo süghi mono aghazü lono momu aghazü khalau no amshitsü, ambe momu ane heqhive aye, aji peleve keu kipimi pa shou pukuni. Pa ye aji peleve akehu aqo gholono hapheveni.

⁵ Hi ye Israelmi pelo khalau no aghakishi lhoxü heqhi süghi mono kuposhukulu phiki lo achineu lau süghi no Ampeu lau külakishi kümllagho shipeniye ke.

⁶ Achineu no aji pesü kuposhukulu phiki kulaghi lo Ampeu kiptia küzüteve no atha mülüi pitipe Ampeu lopushi tsüni.

⁷ Tishikeu lono panongu ye ane kimihi ghawu, khuu panoqo no sasü küzüvü acheni keno, pa lau aghashi auve monani. Tiqheli kupuju lo hi ye Israelmi ghenguno alholo pimheye shivae.

⁸ “Itaghi panongu vilo pilo, Israelmi na, inami nongu gholo akemi namu khuu no akipti kümllagho momu aghakishi shino

⁹ Ampeu mllani ke kuposhukulu phiki kulaghi lo süghi moni keno, pa ye paw timi gholono hapheveni.

Lhoxü ji Chumoni keu Yezah

¹⁰ “Israelmi na inaghami pano gholo akemi khukhumu lhoxü ji chukeu ye I no pa launo I gi kughove nani eno paw timiqo gholono hapheve nani.

¹¹ Kughengu aküxü ye aji lo ani, eno tino akiptia lono timiqo xine lovetsü penike I no azah shitsüe, aji huno timi xine tha-lovetsü cheni.

¹² Tighenguno I no Israelmi vilo pike, Nongu na inaghami no gholo akemi namu khumu aji chumoni.

¹³ “Israelmi na inaghami no gholo akemi khukhumu chukulupu shi-aghau veqhi kelo, pa ye ayeghi shou aji kighijive no ayeghimkhu no ti jonhaveni.

¹⁴ Kughengu lhoxü kümtsü ghenguno aküxü ye aji lo ani, aji huno aküxü ke. Tighenguno I no Israelmi vilo pivae, Nongu ye kiu lhoxü ji mu chumoni, kughengu tipaqo küxü ye aji lo ani, khukhumu ti chukeu ye hapheveni.

¹⁵ Khukhumu lhoxü thive keu momu tüghashi no heqhive keu chuve aye, Israelmi na inaghami namu azü kuchhuve no aphimini ishiveni, eno avela kutolo mithemo niae; tithiu no pa ye mithelu nani.

¹⁶ Ikemu pa no tishimo aye, pa ye akipimi ghenguno aghime puni.”