ACHINE 16 - Sumi Naga CL (Re-edited) Bible (BSI)

Lokichile Tsala

¹ Aaron nu pama no Ampeu zülono thive kethiu Ampeu no Moses pütsa,

² eno pi, “O mu Aaron vilo ado kümtsü lo nhaqhiphi thiu Akimthe-a lo Puloshoqhi bohu shou kimiyekini lakhü zülo ighi kevilo pilo, tishikeu lono pa ye thimo nani. Kughengu Ni ye tipa shou khüngküsü lono ipeghi nani.

³ Ikemu pa ye hitoi Akimthe-a lo ighini: axine kümllagho ghenguno amshitsü lakhi eno akipti kümllagho ghenguno ambetsü lakhi süghini.

⁴ Pa ye azü kuchhuve no akimthe phimini hipaqo pepuni: phepheike phiküzü eno alou phiküzü, apokha eno akütsü shonha phi; hipaqo ye akimthe ke.

⁵ Israelmi qoaho launo axine kümllagho ghenguno anetsü kini, eno akipti kümllagho ghenguno ambetsü luni.

⁶ “Aaron no pa eno kibolomi ghenguno lochile tsü penike amshitsü pesü axine kümllagho shitsüni.

⁷ Tithiu pa no anetsü küma sasü kuposhukulu phiki kulaghi lo Ampeu zülo ighini.

⁸ Pa no ane kini, lakhino Ampeu sala, eno lakhiu no Azazel sala, shou asaqhi beni.

⁹ Pa no Ampeu sala shou asaqhi belu keu netsü pesü axine kümllagho shini,

¹⁰ ikemu Azazel sala qhibelu keu ye Ampeu zülo aküxü no tsüno timi xine lochile tsü penike asayeqha lo Azazel lau puwuveni.

¹¹ “Aaron no pa kibolomi ngo pa sala ghenguno amshitsü pesü axine kümllagho shinike amshitsü heqhini.

¹² Pa no ata kiptibo lo amibalu chhitoi süni eno tsüngqüi keu ta au kiye kini pesü nhaqhiphi thiu süghini,

¹³ eno tsüngqüi keu ta pesü Ampeu zülo ami lo süni, tipau michhi no Puloshoqhi bohu shou kimiyekini lakhü küzü luve nani, tishianguno pa ye thimo nani.

¹⁴ Pa no amshitsü ji hami pesü auloti chosü no kimiyekini lakhü zülono kipela küdau ghuthu tsüni küzüteni.

¹⁵ “Tishino pa no timiqo ghenguno axine kümllagho shi ane ghiqhi no aji pesü nhaqhiphi thiu ilo no amshitsü ji pesü shike toi kimiyekini lakhü shou eno agizüu küzüteni.

¹⁶ Hitoi pa no Israelmi kimthe kumo eno pano xine kümtsü ghenguno Akimthe-a shikimtheni. Kuposhukulu phiki khikhi panow mithekumo gholo ani keno tipau ghengu ghi hitoi shini.

¹⁷ Pa no Akimthe-a lo ilo no ipeghi püzü pa ngo pa kibolomi eno Israel qoaho kümtsü ghenguno lokichile shimoke kutolo khunomu kuposhukulu phiki lo ngomoni.

¹⁸ Pa no Ampeu zülo akiptia lo wuno tipau ghenguno lokichile shini, amshitsü ji eno anetsü ji hami pesü akiptia cheku lo akiboqo lo lesüni.

¹⁹ Pa no auloti pesü akiptia shou aji ghuthu tsüni küzüte no Israelmi xine lono tipau kishekimthe pe akimthe shitsüni.

²⁰ “Kughou Aaron no Akimthe-a, kuposhukulu phiki, eno akiptia shikimthe taveni keno, pa no ane küxü süghini.

²¹ Pa no au kinikujo pesü ane kütsü lo inape no Israelmi kixikila, hekibide, eno axine kümtsü tipau shou pi pukuni. Pa no tipaqo pesü ane kütsü lo pukuve tsüno timi lakhi pichebe püakeu no ane hasasü asayeqha lo wuveni.

²² Ane no panongu xine kümtsü xapusü timi küghünamo ke-a lo wuveni, tilau no pa no kuqho pheveni.

²³ “Tithiu Aaron no kuposhukulu phiki lo ilo no pa no Akimthe-a lo iloni ye pepu keu phepheike phi hu xaqhipe tile qhiveni.

²⁴ Pa no akimthe-a lono azü kuchhuve no pa phimini pepusü ipeghi püzü pa eno timiqo ghenguno akipti kümllagho tsüni.

²⁵ Eno axine kümllagho lhoxü tha pesü pa no akiptia lono pitini.

²⁶ Timi khuu no asayeqha lo Azazel tsükeu ne hasasü wukeno, pa ye aphimini ishive no azü kuchhuve kethiu no aghazü lo ideighini.

²⁷ Axine kümllagho lo peitha keu mishitsü ngo anetsü khipa ji pesü lochile tsünike Akimthe-a lo süiloghi keno, tipaqo kumo ye aghazü khalau xapu ipeve no ayiko, ashicho, eno tübatüzü kümtsü pitiveni.

²⁸ Timi khuu no tipaqo pitini keno pa phimini ishive no azü kuchhuve kethiu no aghazü lo ighini.

²⁹ “Hi ye alholo nongu ghenguno pimheye shini: Aqhi akütsüniu, atsala achighiu lo Israelmi eno no gholo inaghami akemi ye akümla kiumu shimo no kümvüni.

³⁰ Kughengu hipa tsalani no nongu shikimthe nike lokichile shitsüni, eno nongu ye Ampeu zülo axine kümtsü lono mithelu nani.

³¹ Ti ye Sabbath kimthe tsala ke nongu ye kümvüni; hi ye alholo pimheye ae.

³² Achineu khuu no papu thisülu nike kishekimtheve akeno pa no phepheike phi kimthe pepusü lochileni.

³³ Pa no akimthe-a, kuposhukulu phiki, akiptia, achinemi, eno aqoaho timi kümtsü ghenguno shikimthe tsüni.

³⁴ Hi ye nongu ghenguno alholo pimheye ae: Israelmi xine kümtsü shikimthe tsünike ghenguno ampe lo ghuthu lakhi lokichile shini.” Ampeu no azah tsüke toi Moses no shike.