ACHINE 15 - Sumi Naga CL (Re-edited) Bible (BSI)

Aphi lo Mithekumo

¹ Ampeu no Moses ngo Aaron vilo pi,

² “Israelmi pütsa no pilo, Timi lakhi phighü lono azü ipeghi aye, ti ye mithekumo ke.

³ Tipau ghenguno ayezah ye hike: aphighü lono qoipeghi aghi na tave aghi namu ti ye mithemoe.

⁴ Azüa khipa shou pa no züni momu khile iqani keno ti ye mithe movae.

^5-6 Timi khuu no pa züa buni, momu timi tipau no iqave keu shou iqani keno pa ye azü kuchhuve no aphimini ishiveni eno avela kutolo mithemo niae.

⁷ Timi khuu no pa diluni keno pa ye aphimini ishive eno azü kuchhuveni eno avela kutolo mithemo niae.

⁸ Azü ipeghi akeu timi huno mithe akeu timi shou müsüte pukulu aye, timi tipau ghi aphimini ishive eno azü kuchhuveni eno avela kutolo mithemo niae.

⁹ Aküghüqa-a khipa shou azü ipeghi akeu timi huno iqani keno ti ye mithemo niae.

¹⁰ Khuu no timi tipau no iqakeu mu diluni keno pa ye avela kutolo mithemo niae. Tipau ikhiqhe keu ye aphimini ishive eno azü kuchhuveni eno avela kutolo mithemo niae.

¹¹ Azü ipeghi akeu timi huno au mtsü mono khuu buni keno pa ye aphimini ishive no azü kuchhuveni eno avela kutolo mithemo niae.

¹² Timi tipau no ayeghi li dilu keu kümtsü kuboveni eno asü nhemgha kümtsü küsü kimtheveni.

¹³ “Azü ipeghi akeu timi shikimthe luve kethiu pa ye atsala tsüni kheni, eno azü küxü pesü pa phimini ishive no azü kuchhuveni eno pa ye mitheve niae.

¹⁴ Atsala akütacheni pa ye aqhewo momu amiqhi kini pesü kuposhukulu phiki kulaghi lo Ampeu zülo ighi no achineu tsüni.

¹⁵ Achineu no lakhi pesü axine kümllagho eno lakhiu no akipti kümllagho shi tsüni, eno timi tipau shikimthe tsüni.

¹⁶ “Timi lakhino aphizü ipeghi aye, pa ye paphi kümtsü qhuveni eno avela kutolo mithemo niae.

¹⁷ Aphi momu ashiyiko nhemgha kiukiu shoumu aphizü ikuve keu ye ishiveni eno ti ye avela kutolo mithemo niae.

¹⁸ Ashiaji küqhave kethiu akiptiu ngo atotiu pama gha azü kuchhuveni eno avela kutolo mithemo niae.

¹⁹ “Kughou totimi no alhoaye tüqhüdo ighini keno, li ye atsala tsüni kutolo mithemo niae, khuu no li diluni keno avela kutolo mithemo niae.

²⁰ Li no atüqhüdo ighi akelo kiukiu shou iqa momu zü namu ti ye mithemo niae.

^21-23 Khuu no li züa momu li no iqakeu diluni keno pa phimini ishive no azü kuchhuveni eno avela kutolo mithemo niae.

²⁴ Khuu no li tüqhüdo ghuloki lono li sasü ashiaji küqhani keno, li kimthe kumono pa shipixive ake pa ye atsala tsüni mithemo niae, eno pa züa ye mithemo niae.

²⁵ “Totimi lakhino atüqhüdo ighi chekeu tsala kiyeve ghi aji pole auve aye, ti kutolo li ye mithemo niae.

²⁶ Li no zükeu lüpa eno khile iqani keno ti ye mithemo niae.

²⁷ Khuu no tipaqo diluni keno mithemo niae, pa ye aphimini ishive no azü kuchhuveni, eno avela kutolo mithemo niae.

²⁸ Ikemu li no aji tave aye, tileno atsala tsüni kihini, eno tithiuno li ye mithe luveni.

²⁹ Atsala akütacheni li no aqhewo momu amiqhi kini pesü achineu lau kuposhukulu phiki kulaghi lo ighini.

³⁰ Achineu no lakhi pesü axine kümllagho shini eno lakhiu no akipti kümllagho shino li shikimthe tsüni.

³¹ “Mithemo no akemi no Ampeu kungo-a shipixi luno thive nosa kehu no ye panongu pesü Israelmi launo kütüta shi qhi masae.”

³² Hi no timi khuu no azü ipeghini, momu aphizü ipeghi no mithe moveni keno pa ghenguno ayezah ke;

³³ itaghi totimi no atüqhüdo ighi kelo mithe move keu, momu tipa tüqhüdo lono timi no li sasü ashiaji küqha keu yezah ke.