ACHINE 14 - Sumi Naga CL (Re-edited) Bible (BSI)

Apügha Shikimthe kepu Yezah

¹ Ampeu no Moses vilo pi,

² “Apüghami shikimthe ke tsalani pimheye hitoi ani. Pa sasü achineu lau ighini,

³ achineu no aghazü khalau pa saipe no jukutoni. Aküsüu philo apügha vive aghi aye,

⁴ achineu no mqhamqhi keu ghau kini gholo cedar sü tachu lakhi, ayeho kipili huchuyi keu, eno ayilo loka ishi süghi penike azah tsüni.

⁵ Ayeghi li lo azü anileshi akeu shouno aghau lakhi heqhi penike achineu no azah tsüni.

⁶ Pa no aghau lakhiu cedar sü tachu, ayeho kipili huchuyi keu, eno ayilo loka kümtsa pesü aghau heqhive keu ji lo chosüni.

⁷ Eno apüghami khuu shikimthe niye ani keno pa shou ghuthu tsüni aji küzüteni. Tishino pa ye mithe luvae pi shuphe tsüno aghau küxü ye aluza lo phe puwuveni.

⁸ Timi huye pa phimini ishive, pa kütsüsa kümtsü miyeve no azü kuchhuve eno mithe luve niae. Pa ye aghazü lo iloghilu nani kemu pa phiki khalau atsala tsüni ngoni.

⁹ Atsala akütsüniu lo pa kütsüsa ngo akichimhi, anhekita-sa, eno aphi lo asa kütau kümtsü miye kitheni, eno aphimini ishive no azü kuchhuve aye mithe luve niae.

¹⁰ “Atsala akütacheni pa no tukutiye kühakeu mbetsü kini, ampe lakhi mbequ lakhi, ashomkhu thazü pesü kunuve keu ahu küthü, eno thazü ajukhu lakhi süghini.

¹¹ Achineu no kuposhukulu phiki kulaghi lo Ampeu zülo aküsüu ngo pa kümllagho saghini.

¹² Eno ambetsü lakhi pesü thazü gholono akipimi kümllagho tsüni, eno tipaqo pesü Ampeu lau akimchi kümllagho shi tsüni.

¹³ Pa no ambe pesü axine kümllagho ngo akipti kümllagho ghiqhi chekeu akimthe-a lono ghiqhini. Kughengu axine kümllagho toi, akipimi kümllagho ye achineu salae; ti ye shishe akimthe ke.

¹⁴ Achineu no ambe ji hami pesü timi khuu shikimthe niye ani keno pa kini aniqe ajeu ngo auloqu ajeu eno apukhuloqu ajeu ditsüni.

¹⁵ Achineu no thazü hami pesü pa umza piyiu lesüni,

¹⁶ eno pa uloti ajeu lakhi tile chosü no Ampeu zülo ghuthu tsüni küzüteni.

¹⁷ Pa no pa umza piyiu thazü akeu hami eno ambe ji hami pesü timi shikimthe niye akeu kini aniqe ajeu ngo auloqu ajeu eno apukhuloqu ajeu ditsüni.

¹⁸ Pa umza lo thazü achili pesü timi hu kütsü lo sütsüni. Tishino achineu no pa ghenguno Ampeu zülo lochile tsüni.

¹⁹ Pa no timi shikimthe niye akeu ghenguno lochile tsünike axine kümllagho tsüni. Tithiu pa no akipti kümllagho ghiqhini,

²⁰ eno tipau gholo athi kümllagho pesü akiptia lono mllani. Hitoi achineu no timi ghenguno lochile tsüno pa ye mithe luveni.

²¹ “Ikemu timi huno kumlhomi eno tijehi tshamla aye, pa ye akipimi kümllagho ghenguno ambeti atsü lakhi, ashomkhu ahu lakhi thazü gholo kunuve keu, eno thazü ajukhu lakhi süghini;

²² itaghi axine kümllagho ngo akipti kümllagho ghenguno lakhikhi tsü kepushi aqhewo kini momu amiqhi kini, pa no shikulu süghini.

²³ Atsala akütacheni pa shikimthe kepushi pa no aphiki kulaghi lo Ampeu zülo tipaqo süghini.

²⁴ Achineu no ambeti ngo thazü pesü akimchi kümllagho shi Ampeu zülo qhitsüni.

²⁵ Pa no ambeti ghiqhi no tipau ji hami pesü timi kini aniqe ajeu ngo pa uloqu ajeu eno pa pukhu loqu ajeu ditsüni.

²⁶ Achineu no thazü hami pa umza piyiu lesüni,

²⁷ eno pa uloti ajeu lakhi pesü chosü no Ampeu zülo ghuthu tsüni küzüteni.

²⁸ Pa no timi kini aniqe ajeu, auloqu ajeu, eno apukhuloqu ajeu aji pesü ditsü keu-a lo thazü hami pesü ditsüni.

²⁹ Pa umza lo thazü achili akeu pesü timi kütsü lo sütsü no pa ghenguno Ampeu lau lochile tsüni.

³⁰ Tishino pa no aqhewo momu amiqhi, pa no shikulu, pesü athi kümllagho gholono axine kümllagho shi tsüni,

³¹ lakhi no axine kümllagho eno lakhiu no akipti kümllagho. Hitoi achineu no shikimthe tsüni.

³² Ayezah hi ye khuu no apügha küsü ani kemu pa shikimthe nike akümllagho tsü kümlapu shi ani keno pa ghenguno ke.”

Aki lo Akughumho Yezah

³³ Ampeu no Moses ngo Aaron vilo pi,

³⁴ “Kughou I no amheghi shi tsükeu Canaan yeghi lo nongu no ighini, eno tilau aki lo akughumho aghini keno,

³⁵ aki mpeu no ti aghikeu ithulu kelo achineu vilo, ‘I kilo akughumho aghi kepu toi ani,’ ipini.

³⁶ Achineu no akughumho jukuto mphi lono aki tipau lo anhemgha kümtsü khalau ikhipheve penike azah tsüni, tikumo aye aki alou ake thaqhü mithemo niae. Tithiu achineu no aki lo ilo no

³⁷ akughumho jukutoni. Tsala tino aki kupuwu lo atsünipa ju momu huchuyi shi chupüha ilo cheghi aye,

³⁸ pa no ipeve no atsala tsüni ghenguno aki tipau khathape qhiveni.

³⁹ Atsala akütsüniu lo pa no ideighi no chhejuni. Tsala akughumho no phawo aghi aye,

⁴⁰ atu khipau lo akughumho aghi keno tipau ikhipe aphughi khalau mithekumo-a lo peve penike azah tsüni.

⁴¹ Tithiu pa no aki kupuwu alou nuda püakeu kümtsü kixipe aphughi khalau mithekumo-a lo peveni.

⁴² Tishino atu ikhive ke-a lo kütau pewo süve no nuda kitheveni.

⁴³ “Atu ikhive no kixilepe akithe nudave kethiu ghi akughumho ipeghi aye,

⁴⁴ achineu no wuno juni. Tino phawo aghi aye, aki ye mithe movae.

⁴⁵ Aki tipau ye xaleveni, tipau lo asüpa, atu, eno nudakeu kümtsü pesü aphughi khalau mithekumo-a lo pewuveni.

⁴⁶ Tinguno alau, aki tipau khatha püake lono khuu no iloni keno, pa ye avela kutolo mithemo niae,

⁴⁷ eno khuu no aki tile züni momu chuni keno pa phimini ishiveni.

⁴⁸ “Ikemu achineu no ighi no jukelo, aki tipau lo akughumho phawo mono aghi aye, pa no mithe ani kepi shuphe tsüni, kughengu akughumho ye qhoi ikhive ake.

⁴⁹ Aki tipau shikimthe nike pa no aghau kini, cedar sü, ayeho kipili huchuyi keu eno ayilo loka luni,

⁵⁰ eno ayeghi li lo azü anileshi süpüakeu shouno aghau lakhi heqhini.

⁵¹ Pa no cedar sü, ayilo, ayeho kipili huchuyi keu eno aghau küxü pesü tipaqo aghau heqhive keu ji eno azü küxü lo chosü no aki tipau shou ghuthu tsüni küzüteni.

⁵² Hitoi pa no aghau ji ngo azü küxü, aghau küxü, cedar sü, ayilo, eno ayeho kipili huchuyi keu pesü aki shikimtheni.

⁵³ Pa no aghau küxü pesü aphughi khalau aluza phe puwuveni. Hitoi pa no aki shikimthe no ti ye mithe luveni.”

⁵⁴ Hino aküsü jeli hipaqo lo ghenguno ayezah: ayiko küsü,

⁵⁵ aphimini momu aki lo akughumho,

⁵⁶ aphi lo amishe momu ingu ipeghi keu,

⁵⁷ hi ye mithe akeu momu mithemo keu kimchi niye ke.