ACHINE 13 - Sumi Naga CL (Re-edited) Bible (BSI)

Apügha Küsü Yezah

¹ Ampeu no Moses ngo Aaron vilo pi,

² “Kughou milakhi no ayiko lo apiyi momu amishe ipeghi püzü tino apügha küsü shiveni keno, pa sasü achineu Aaron momu pa nuli lau ighini,

³ eno achineu no timi tipau philo aküsü phujuni. Tsala apiyi qhalo amhi no metsüghoi eno apiyi no ayiko nguno thonhei ilove aye, ti ye apügha küsü ae. Achineu no phujuve kethiu timi huye mithe movae pi shupheni.

⁴ Ikemu apiyi qhalo phalai keu thono amhi metsüghoi mo, eno ayiko nguno thonhei qüilo püaghimo aye, achineu no timi tipau pesü atsala tsüni khathape qhiveni.

⁵ Atsala akütsüniu lo achineu no pa chhejuni, eno aküsü no qhawomo aye, itaghi aküsüu pesü atsala tsüni khathape qhini.

⁶ Tithiu achineu no itaghi atsala akütsüniu lono chhejuni, eno apiyi no hailove no a-a kütau qhawo püaghimo aye, ti ye amishe kehu achineu no aküsüu ye mithe luvae pi shupheni. Eno aküsüu huno pa phimini ishive no mithe luveni.

⁷ Ikemu pa shikimthe tsü penike pa ampi pesü achineu piyeve kethiu apiyi no ayiko kümtsü qhawove aye, pa ye itaghi achineu lau wuni.

⁸ Achineu no pa chheju no ayiko lo qhawove aghi aye, ti ye apügha küsü akehu achineu no pa ye mithe movae pi shuphe tsüni.

⁹ “Kughou milakhi no apügha aghini keno, pa ye achineu lau saghi masae,

¹⁰ eno achineu no pa chhejuni. Apiyi akeu qhalo ayiko no phalai, amhi no metsüghoi eno ani pu aghi aye,

¹¹ ti ye pa phimpi lo apügha küsü ikughive akehu achineu no pa ye mithe movae pi shuphe tsüni. Pa ye mithemo keu mtsümisheive akehu phuju idenike khathape qhimoni.

¹² Ikemu apügha kimihi ayiko küsü no akütsü lono apukhu kutolo qhawove aye,

¹³ achineu no itaghi chheju no tino aphi kuchopu qhawove no metsüghoi aghi aye, ti ye viwo chea kehu pa ye mithe luvae pi shuphe tsüni.

¹⁴ Ikemu apiyi ipeghi kemtsa pa ye mithe move ake.

¹⁵ Achineu no pa jukuto no apiyi ipeghi keu phulu aye timi huye mithe movae pi shuphe tsüni. Apiyi ipeghi keu ye apügha eno ti ye mithekumo ke.

¹⁶ Ikemu apiyi vive no metsüghoi kitheve aye, pa ye achineu lau ighini,

¹⁷ achineu no pa jukutoni, eno apiyi no metsüghoi aghi aye, timi huye achineu no pa ye mithevae pi shuphe tsüni.

¹⁸ “Milakhi no amishe puaghi no viveni,

¹⁹ eno tipa-a lo metsüghoi ingu momu huchuyi ipeghi aye, pa ye achineu piyeni.

²⁰ Achineu no pa jukuto no tipa-a lo ayiko itanhei ilove aghi eno amhi metsüghoi aghi aye, pa ye mithe movae pi shupheni. Ti ye amishe lono ipeghi keu apügha küsü ae.

²¹ Ikemu achineu no chheju kelo tile amhi metsüghoi keu küha eno ayiko nguno alou ilomo no hailove aghi aye, atsala tsüni pakütashi qhini.

²² Tino phawove aye, pa ye mithe movae pi achineu no shupheni, ti ye aküsü auvae.

²³ Ikemu tino athoshi auve eno phawomo aye, ti ye amishe zaku kehu achineu no timi huye mithe ani kepi shuphe tsüni.

²⁴ “Milakhi philo ami no pitikeu zaku lono huchuyi momu metsüghoi ipeghi aye,

²⁵ achineu no pa jukutoni. Tipa-a lo amhi no metsüghoi eno ayiko no itanheive aghi aye, ti ye ami no pitike-a lono apügha ipeghive akehu achineu no timi huye mithe movae pi shuphe tsüni.

²⁶ Ikemu amhi no metsüghoi mo eno ayiko nguno alou ilomo no hailove aghi aye, achineu no atsala tsüni pakütashi qhini.

²⁷ Atsala akütsüniu lono achineu no pa jukutoni, tino phawove aghi aye, apügha küsü akehu achineu no mithe movae pi shupheni.

²⁸ Ikemu tino phawo mono hailove aghi aye, ti ye pitive ke-a lono ingu keu kehu achineu no mithe ani kepi shuphe tsüni.

²⁹ “Kiptimi na totimi namu milakhi kütsü lo momu agimuchu lo apiyi aghi aye,

³⁰ achineu no jukutoni. Tino ayiko nguno alou ilove no amhi phalai eno ipumhei aghi aye, ti ye apügha küsü akehu achineu no mithe movae pi shuphe tsüni.

³¹ Achineu no pa jukuto kelo apiyi no ayiko nguno alou ilomo eno tile amhi tsübui keu küha aye, pa ye atsala tsüni ghenguno khathape qhiveni.

³² Atsala akütsüniu lo achineu no apiyi chheju kelo tino phawo mono aghi, phalaike mhi küha, eno ayiko nguno alou ilomo no aghi aye,

³³ pa ye apiyi do kumo aye asa miyeveni, eno achineu no atsala tsüni pa khathape qhiveni.

³⁴ Atsala akütsüniu lo achineu no apiyi jukuto no phawomo eno ayiko nguno alou ilomo no aghi aye timi huye mithe luvae pi shupheve tsüni. Timi huno pa phimini ishive no mithe luveni.

³⁵ Ikemu mithe luve kethiu no apiyi phawove aye,

³⁶ achineu no pa jukuto no apiyi phawove aghi aye, phalai keu sa ju akepu kühavae, timi huye mithe movae.

³⁷ Ikemu apiyi phawomo, asa tsübui thuwu aghi, eno apiyi vive aghi keu achineu no michilu aye, pa ye mithe anie pi achineu no shupheni.

³⁸ “Kiptimi na totimi namu ayiko lo metsüghoi aqe-aqe shi aghi aye,

³⁹ achineu no timi jukutoni, eno phughüi aghi aye ti ye ayiko lo aküsü ipeghi keu kehu mithe anie.

^40-41 “Milakhi no akütsü lo eno akishe lo asa ipive no aboghe ishove keu ye mithemo keu kumoe, pa ye mithe anie.

⁴² Ikemu pa sa ipive keu lo apiyi huchuyi ipeghi aye, ti ye apügha küsüe.

⁴³ Achineu no pa jukuto no pa kütsü lo huchuyi apügha toi aghi aye,

⁴⁴ pa ye mithe movae pi shuphe tsü masae, pa kütsü lo apügha küsü auvae.

⁴⁵ “Timi khuu no apügha küsü aghini keno, pa ye aphi küixü pepu no pa kütsüsa mthomghoi qhini, eno pa kichi nhapusü ishi ighani, ‘Mithekumo, mithekumo.’

⁴⁶ Aküsü puake tivilo pa ye mithekumo lo anani, pa ye lomoshi aghazü khalau ngoni.

⁴⁷ “Kughou aphimini lo imho aghini keno, amhi phi, phepheike phi lona,

⁴⁸ akugho phi, momu ashiyiko nhemgha lo namu,

⁴⁹ tino atsünipa ju momu huchuyi aghi aye, ti ye phawoni keu kughumho kehu achineu piyeni.

⁵⁰ Achineu no ti jukuto no atsala tsüni ghenguno khathape qhini.

⁵¹ Atsala akütsüniu lo pa no jukutoni. Akughumho phawo aghi aye, anhemgha ti ye mithe movae.

⁵² Achineu no pitiveni, ti ye phawo keu kughumho ke ami no pitiveni.

⁵³ “Ikemu achineu no chheju kelo akughumho no anhemgha shou phawo mono aghi aye,

⁵⁴ tipau qhuve penike azah tsüni, eno itaghi atsala tsüni qhini.

⁵⁵ Ti qhive kethiu pa no jukuto no akughumho no aju kilimo eno phawomo namu ti ye mithe movae. Akughumho no azüu na athiu aghi namu, anhemgha ti ye pitiveni.

⁵⁶ “Ikemu achineu no tipau jukuto kelo akughumho hauve aghi aye, aphimini momu ashiyiko tipado süthave lo.

⁵⁷ Akughumho no ipeghi kithe aye, ti ye phawo kithe ani kehu kiukiu nhemgha mu pitive lo.

⁵⁸ Ikemu akughumho akeu nhemgha qhuve kethiu hauve aye, itaghi qhu kitheni, eno ti ye mithe luve niae.”

⁵⁹ Amhi phi, phepheike phi lona, akugho phi momu ashiyiko nhemgha lo namu, akughumho aghi kelo mithe ani kemo keno kimchilu kepu yezah hike.