ACHINE 12 - Sumi Naga CL (Re-edited) Bible (BSI)

Apunu Thiu Shikimthe

¹ Ampeu no Moses pütsa no pi,

² “Israelmi vilo pilo, Mishipu chekeu totimi lakhi no kiptimi punuve aye, alhoaye lo totimi tüqhüdo ighi kelo mithe move cheke toi, li ye atsala tsüni mithe move niae.

³ Anu phighü yiko ye atsala akütacheu lono ghave tsüni.

⁴ Tithiu itaghi li ye aji shikütsüghü luve penike ishokibe atsala shighi küthü kheni. Ikehu tipa tsalaqo kupu moke kutolo li ye akimthe thime thaqhü kiumu bumoni momu akimthe-a kupunu wumoni.

⁵ Ikemu li no totimi punuve aye, alhoaye tüqhüdo ighi kelo toi, li ye apinedo kini mithe moveni. Tithiu li ye aji shikütsüghü luve penike ishokibe atsala lhotsügho tsügho kheni.

⁶ “Kughou tipa tsala kupuni keno, kiptimi na totimi namu li no punu püakeu ghenguno akipti kümllagho tsünike ampe lakhi mbe eno axine kümllagho ghenguno amiqhi momu aqhewo lakhi pesü kuposhukulu phiki kulaghi lo ighi no achineu tsüni.

⁷ Achineu no Ampeu zülo süghi no li ghenguno lokichile shitsüni. Tishino li ye aji chiji akeu lono mithe luve nani. Hi no totimi khukhumu atianuli punu keu ghenguno ayezah ke.

⁸ Li no ambe qhümlave aye, aqhewo kini, momu amiqhi süghini, lakhi no akipti kümllagho eno lakhiu no axine kümllagho shini. Achineu no li ghenguno lokichile shitsüni, eno li ye mithe luve nani.”