ACHINE 11 - Sumi Naga CL (Re-edited) Bible (BSI)

Mqhamqhi eno Mithekumo Lhoxü

¹ Ampeu no Moses ngo Aaron pama vilo pi,

² Israelmi vilo pilo, Ayeghi lo aküxüküa lhoxü hipaqo nongu no chulu nani.

³ Lhoxü kiu kiumu apukhumtsü shobapu eno akhakile chekeqo ye chulu nani.

⁴ Tishimu tipaqo dolo ghi hipaqo ye chumoni: sayeshi, kughengu ti ye akhakile cheni kemu apukhumtsü shobamo kehu mithe movae;

⁵ achighi, tighi akhakile cheni kemu apukhumtsü shobamo kehu mithe movae;

⁶ eno ajighi, tighi akhakile cheni kemu apukhumtsü shobamo kehu mithe movae.

⁷ Awo ghi chumoni, kughengu ti ye apukhumtsü shoba kemu akhakile chemo kehu nongu ghenguno mithe movae.

⁸ Nongu ye hipaqo shi chumoni, eno akumo mu bumoni, tipaqo ye nongu ghenguno mithekumo ke.

⁹ Azüghi lona aghoki lo namu muluküba eno ayikola kupu lhoxüqo ye nongu no chulu nani.

¹⁰ Ikemu muluküba eno ayikola kühakeu lhoxü loji thaqhü ye nongu ghenguno niqhinilai ke chumoni.

¹¹ Tipaqo ye niqhinilai kepi kihini; nongu ye tipaqo shi kitilamu chumoni, eno ashikumo ghi ju kuchhubeni.

¹² Azü lo lhoxü muluküba eno ayikola kühake thaqhü ye nongu ghenguno niqhinilai ke.

¹³ Aghau hipaqo ye niqhinilai ke chumoni: alhuqu, aluküzüva, eno tipa jeli;

¹⁴ Alhaqü, kithimi lhuqu eno titoike jeli;

¹⁵ agha jeli kümtsü;

¹⁶ ostrich, alhuqu kimihi putho ghau, azüghau,

¹⁷ aqhaqho kije kitila kümtsü;

¹⁸ azü lo yeilo achuqupu mighi luve chekeu ghau, ashikumo mighi chekeu aluküzüva,

¹⁹ ahu alisa toikeu ghau, minitügha eno ashuqha.

²⁰ “Achishibo eno apukhu bidi kupu tikha ninga kümtsü nongu ghenguno niqhinilai ke.

²¹ Tishimu lhoxü khipaqo no ikawu kepu pukhu ala acheni keno nongu no chulu nani.

²² Tipaqo dolo nongu no leusü, awusho, eno atikha kiukiumu chulu nani.

²³ Ikemu kütau achishibo eno apukhu bidi kupu tikha ninga thaqhü ye nongu ghenguno niqhinilai ke.

²⁴ “Nongu ye hipaqo vecheo mithe move nani: Khukhumu lhoxü hipaqo shikumo buvekeu ye avelau kutolo mithemo niae,

²⁵ eno lhoxü tipaqo shikumo lono kiuala ikhipe cheghi keu ye aphimini ishiveni, eno avelau kutolo mithemo niae.

²⁶ Lhoxü dolo apukhumtsü shobapu aghimu xapha kütüta shimo, momu akhakilemo keqo ye nongu ghenguno mithe movae. Tipaqo buvekeu ye mithe movae pi kihini.

²⁷ Apukhu bidi kupu lhoxü dolo apukhumza küdau no alache keqo ye nongu ghenguno mithe moke. Tipaqo shikumo buvekeu ye avelau kutolo mithemo niae,

²⁸ eno tipaqo shikumo pecheghi keqo ye aphiküzü ishiveni eno avelau kutolo mithemo niae, nongu ghenguno tipaqo ye mithekumo ke.

²⁹ “Ayeghi izakiche lhoxü hipaqo ye nongu ghenguno mithemoe: idelaghu, ajifu, aji, asüke lo achekeu aniza akijeu,

³⁰ aki lo aghalo aniza, eno atoqhe jeli.

³¹ Lhoxü jeli hipaqo ye nongu ghenguno mithemo kehu thi aghi kelo bulukeu ye avelau kutolo mithemo niae.

³² Aki lo tinhemgha akütsa shi peitha chekeqo, asü no mlakeu na, aphimini na, ashiyiko nhemgha na, kumshophi namu, khipaqo shou lhoxü hipaqo no iku thi aghini keno, thime tipau ye nongu ghenguno mithe move akehu azü lo sümasae, tishiaye avelau kutolo thono tithiu ye mitheve niae.

³³ Tsala lhoxü hipaqo khikhiu mu ayeghi li lo ikiqi ilove aye, tipau lo kiukiu aghimu qhoi mithemo niae, eno ali tipau ye kuboveni.

³⁴ Tile azü aghi no teküpha pe kütau achuqupu shou ikuve aye, achuqupu tipaqo ghi mithemo niae. Azü qhipüa keu li shou pinamu teküphave aye, tighi mithemo niae.

³⁵ Amiphoki momu amibo lo lhoxü kithi kumo kiukiu saje mu aghi aye, ti ghi mithemo niae. Ami kishi-a ghi atachu shi kuboveni. Ti ye mithe movae, eno nongu ghenguno mithekumo shi ache nani.

³⁶ Tishimu azüpuki momu azü tughuko lo thi aghi kelo khukhumu buvekeu ye mithe moveni keu kumo aye tipaqo ye mithe anani.

³⁷ Apiti lothi yisüni ye akeqo shou lhoxü kithi kumo kiukiu saje aghi namu ti ye mithe ani,

³⁸ ikemu apiti lothi lo azü lesü akelono lhoxü kithi kumo ghi ikiqi ilove aye, ti ye mithe movae.

³⁹ “Tsala nongu no chuluni keu lhoxü khikhiu mu thive kelo, tipau bulu keu ye avelau kutolo mithemo niae,

⁴⁰ eno khukhumu tipau shi chuve aghi, momu tipa kithi kumo pecheghi keu ye aphimini ishiveni eno avelau kutolo mithemo niae.

⁴¹ “Ayeghi lo itikiche eno lülüshi keu lhoxü thaqhü ye niqhinilai ke kiumu chumoni.

⁴² Itikiche, momu apukhu bidi kupu chuninhei keqo, eno apukhu kutomo kupu thaqhü ye niqhinilai ke nongu ye chumoni.

⁴³ Lhoxü hipaqo pesü nongu ampi shikitiqe moni, eno tipaqo launo kitiqeve no mithemo keu shive moni.

⁴⁴ Ni ye Ampeu nongu Lhou ke. Tighenguno nongu kishekimthe pe akimthe shilo, kughengu Ni ye akimthe ke. Ayeghi lo itikiche eno lülüshi keu lhoxü jeli pesü nongu ampi shikuchhube moni.

⁴⁵ Ni ye khuu Egypt yeghi lono nongu saipeghi keno, Ampeu nongu Lhou huke. Tighenguno nongu ye akimthe shilo, kughengu Ni ye akimthe ke.”

⁴⁶ Hi no tüghashi, aghau eno aküxüküa lhoxü jeli khikhi azü lo eno ayeghi lo acheni keno kümtsü ghenguno ayezah ke,

⁴⁷ ti ye mithekumo ngo mqhamqhi keu dolo, aküxüküa lhoxü chuluni keu ngo chumlani keu küma dolo alaküxa shi ithi kütüta shilu peniye ke.