ACHINE 10 - Sumi Naga CL (Re-edited) Bible (BSI)

Nadab ngo Abihu Kithi

¹ Aaron nuli Nadab ngo Abihu pama no ata kiptibo aküphashi pesü ami tsasü eno tsüngqüi keu ta süno Ampeu no azah tsümo keu mi pesü Pa zülo ighi.

² Ikelo Ampeu zülono ami ipeghi no pama pitive, eno pama ye Ampeu zülono thive.

³ Moses no Aaron vilo pi, “Ampeu no pikeu ye hike: ‘Khunono I zülo ighini keno, Ni ye akimthe kepi ithi masae, eno timi kümtsü zülo I juküvü piye masae.’” Aaron ye inaqhoi ngove.

⁴ Tile Moses no Aaron papu thiküzümi Uzziel nu Mishael ngo Elzaphan kuno pi, “Hilau ighilo, eno no tilimi sükumo pesü akimthe-a lono aghazü khalau ipevelo.”

⁵ Ikehu pama no aphiküzü lono tsüqüpe Moses no azah tsüke toi aghazü khalau pewuve.

⁶ Moses no Aaron eno pa nuli Eleazar ngo Ithamar vilo pi, “Nongu kütsüsa mthomghoi qhi kevi, eno aphimini süxü kevilo, tikumo aye thive nani eno aqoaho kümtsü shou aloghu ikughive nani, ikemu no thiküzümi Israelmi kümtsü no Ampeu no ami no pitive keu ghenguno qamlo lo.

⁷ Kuposhukulu phiki khalau ipe kevilo, tikumo aye thive nosae, kughengu AMPEUw nukikishe thazü ye nongu shou anie.” Panongu no Moses tsa luve.

⁸ Tithiu Ampeu no Aaron vilo pi,

⁹ “Kughou nongu no kuposhukulu phiki lo iloni keno, no shiaghi na o nuli namu atsaiji momu akümka ji sho kevilo, tikumo aye nongu ye thive nosae. Hi ye tiqheli kümtsü lo acheni keu pimheye shini.

¹⁰ Nongu ye kiu no akimthe eno balha, kiu no mithekumo eno mqhamqhi keno ithi kütüta shi masae,

¹¹ eno Ampeu no Moses vecheo Israelmi tsükeu pimheye kümtsü pesü panoqo shikalo.”

¹² Moses no Aaron eno pa nuli Eleazar ngo Ithamar pütsa: “Ampeu sala achuqupu kümllagho achili lono athi kümllagho tsülo, eno kholaqhi sümono akiptia phivilo no chulo, kughengu ti ye shishe akimthe ke.

¹³ Akimthe-a lono ti chuni, kughengu ti ye Ampeu sala achuqupu kümllagho lono nongu no ithulu masa keu saje ke, eno tipau za I tsü püani.

¹⁴ Ikemu akimchi gho amlashi eno aluko küqhaphe tsükeu ye no eno o tianuli kiptimi totimi kümtsü o gholono müdüniyi ke-a lono chuni, kughengu ti ye Israelmi no külakishi kümllagho lono no eno o nuli saje shi tsükeu ke.

¹⁵ Aluko eno amlashi ye panongu no akipti kümllagho lono atha ikhiphelu keu gholono Ampeu zülo akimchi gho tsünike süghini, eno tipaqo ye Ampeu no azah tsüke toi alholo no eno o nuli saje shini.”

¹⁶ Moses no axine kümllagho ghenguno ane vehu ighiju kelaye ti ye pitive aghi! Ikehu pa no Aaron nuli Eleazar ngo Ithamar pama ju amlo ideve no pi,

¹⁷ “Kushiye nongu ye axine kümllagho hipau akimthe-a lono chuvemo kea? Kughengu ti ye shishe akimthe eno nongu tsükeu ye aqoaho xine xapu luve tsüno Ampeu lau lokichile shitsü peniye ke.

¹⁸ Tipau ji ye akimthe-a bokütha alou süiloghi püamoe. Nongu ye mtsüqheino I no azah tsükeu kiqi lono akimthe-a lono ti chuve kepu shiae.”

¹⁹ Tile Aaron no Moses vilo pi, “Julo, ishi panongu ye pano xine kümllagho eno akipti kümllagho shipe Ampeu tsüvae, ikeghi hitoi keu ye itaghi I lau shi aphie! Tsala ishi I no axine kümllagho chuveke aye, Ampeu ye tishilo pini chekema?”

²⁰ Moses no ti chilu no pa mloqive.