ACHINE 1 - Sumi Naga CL (Re-edited) Bible (BSI)

Akipti Kümllagho Yezah

¹ Ampeu no Moses kuno kuposhukulu phiki lono pa pütsa no pi,

² “Israelmi pütsa no pilo, Kughou nongu khuana no Ampeu lau akümllagho shi lhoxü süghini keno, nongu kümllagho tipau ye amishi momu ambe shiaghi masa.”

³ “Tsala pa no kuchopu kipti kümllagho shinike amishi süghi aye, ti ye atsü tukutiye kühakeu shini. Ampeu no ikhilu tsü penike pa no tipau sasü kuposhukulu phiki kulaghi lo ngoni.

⁴ Pa no pa u pesü piti mlla niye akeu lhoxü kütsü lo inapeni, eno pa ghenguno lochile tsü penike süghi keu pa kümllagho ikhilu tsüni.

⁵ Tishino pa no Ampeu zülono lhoxü heqhini, eno Aaron nuli achinemi no aji pesü kuposhukulu phiki kulaghi lo akiptia kümtsü vehomxa leqhini.

⁶ Pa no kuchopu kipti kümllagho lhoxü yiko lhave no aleqhi shi gheni,

⁷ tileno achineu Aaron nuli no akiptia lo ami süno asü ghepukuni.

⁸ Aaron nuli achinemi no ashileqhi, akütsü, eno atha, pesü iqü akeu sü shou beni;

⁹ ikemu kighinoli eno apukhuqo ye azü lono qhuveni. Achineu no tipaqo kuchopu akiptia lono achuqupu kümllagho, Ampeu lopu mülüi keu xo shi ghi pitiveni.”

¹⁰ “Tsala pa kipti kümllagho no ambe momu ane shiaghi aye, ti ye atsü tukutiye kühakeu shini,

¹¹ Ampeu zülono pa no akiptia ahuu küdau no heqhini, eno Aaron nuli achinemi no tipau ji pesü akiptia vehomxa leqhini.

¹² Pa no ashi kuchopu, akütsü eno atha ghi süküqha no aleqhi shi gheveni, eno achineu no tipaqo pesü akiptia lo asü iqü akeqo shou kithipe qhini,

¹³ ikemu kighinoli eno apukhuqo ye pa no azü lono qhuveni. Tishino achineu no tipaqo kuchopu ikhipe pitiveni; Ampeu lopu mülüi keu xo hino akipti kümllagho ke.”

¹⁴ “Tsala Ampeu lau pa kümllagho no aghau kipti kümllagho shiaghi aye, pa ye aqhewo momu amiqhi süghini.

¹⁵ Achineu no akiptia lo tipau peighi no akütsü süthape ami lono pitiveni. Eno aji qhoi akiptia vehomxa leqhini.

¹⁶ Tishino pa no akole eno tipau alou akeqo kuchopu ikhipe akiptia kipelau ayevu qhiche ke-a lo vepheveni.

¹⁷ Pa no tipau chishibo tsüqüpe no sülaveni, ikemu sütha kütüta shimono akiptia lo ami iqü akeu lono pitiveni. Ampeu lopu mülüi keu xo hino akipti kümllagho ke.”