3 John 1 - Sumi Naga CL (Re-edited) Bible (BSI)

Pethakütsü

¹ Alayeu no kimiyekicheu Gaius, khuu I no kuchou no kimiye cheni keno, pa lau yelu ani.

² I qhuu, no ye tilau thokha kümtsü akivishi aghi nani eno o ngulho no akumtoshi aketoi o shiaji ghi vithai aghi nani kepi I no pülü ani.

³ Kughou athiküzümiqo no ighi püzü nono kuchou küxü lo puthugho achekeu pesü ashepe shi keno, ni ye shishe alovive, kughengu mtsüqheino no ye kuchou küdau checheni ke.

⁴ Ni ye I tianuliqo no kuchou küdau chechenie pi chilu keu lokivi nguno akijeu kütau kühae.

Sakuphu eno Lakichile

⁵ I qhuu, athiküzümi hipaqo ye inaghami keghi nono aka-agha shi panoqo ghenguno kiu shicheni keno ti ye pükhükulupu kümla ke,

⁶ panongu no ow kikimiye ghili pesü akukuhou lau ashepe shivae. Panongu kicheghüzü ghenguno nono akivishi aghili kuto puwutsü aye Alhou zülo ameküapu shinani.

⁷ Kughengu panongu ye Khristo je ghenguno wuve akeke Alhou pülümo kemi launo kiumu lumo nani.

⁸ Tighenguno ningu ghi kuchou ghenguno mlaküqha chekemi shikulupu shi timi hitoi keqo saphutsü kepue.

⁹ Ni ye akukuhou lau kiuala yepuwu, ikemu Diotrephes, khuu no pa ampi pesü atüghüu shinishi cheni keno, pa no Alhouw kükagha ni u lo akeu kihitsü chemoe.

¹⁰ Ikehu I no ighi aye pa no kiu shi ani keno, ningu shou küsakügha tsa zalepuku püakeqo lhephe nani. Tiu ghi aghaqimo no pa ye athiküzümi sasüni keu lachile cheni, eno kütami no sasünie pi keghi pa no lakhave püzü akukuho lono panoqo hapheve cheni.

¹¹ I qhuu, akivi kühakileni thono alhoksa kühakile kevilo. Khukhumu akivi mla chekeu ye Alhou laumi; khukhumu alhoksa mla chekeu ye Alhou ithulu mphie.

¹² Demetrius ye timi kümtsü launo, eno timi lolo kuchou achekeu launo ashepe kivi ithuluvae. Ningu ghi ni shepe küqhatsü ani, eno ni shepe ye kuchou kepi nono ithi ani.

Kishekha Petha

¹³ Ni ye o lau kutomo yelu kepu ae, ikemu yesüta ngo kiyezü pesü ye akepu ye taveni.

¹⁴ Ni ye kighithe o sasü kusholu no nikujo agi kinheqhe ghi küptsa luni ke laju ani.

¹⁵ Aloino keu o gholo alo. Aküsamiqo no petha o tsü ani. Tilau aküsamiqo lakhikhi jeku petha tsülo.