2 Tim. 4 - Sumi Naga CL (Re-edited) Bible (BSI)

Atsa pesü Sheshulo

¹ Alhou eno Khristo Jisü khuu no küxümi ngo kithimi shou küghaküthau shinani keno, pama zülono eno Khristo pephe piye keu ngo pa kükaqha zülono, I no o hakite ani:

² ado ghuloki akivi na monamu atsa pesü sheshulo, thokha lo kutuukulu eno shiküka pesü shikithetsü, sakiyi eno shikumto tsülo.

³ Kughengu timi no kuchou shiküka lumoni keu ghuloki cheni, ikemu mthomzai keu kini xapu panongu gho-apulou shipenishi kelauno panongu no ini nishi akeu likhi pipeni kemi shikükami sawo qhinani,

⁴ eno kuchou tsa inini keu lono tsüghuve no küghakiche tsa lo amlo tsüuve nani.

⁵ Ikemu nou ye alhokuthu lo tsaqütsalei lo, aghime puqhelo, tsavipemi kümla shilo, eno Alhou qemi kümlapu shikupu lo.

⁶ Kughengu niu ye atsaizü kümllagho toi I küghape leqhi ayae, eno ni ye wuve kepu do tovae.

⁷ Ni ye aghükishi kivi shivae, ni ye akupo lo ashe tovae, ni ye aküpülü pewo tovae.

⁸ Hinguno hilau ye I ghenguno tokulu saxü amikucho kütsükuqho ani, ti ye achipiu xaküthau Ampeu no tipa Tsala lono I tsü nani, eno I likhi kumono pa ikighi kimiye chekemi kümtsü tsü nani.

Lomo Tsa

⁹ Mtazü I lau ighini ke pükapütsalo,

¹⁰ kughengu Demas ye hipa yeghi kimiyeuve püzü I qhive no Thessalonica lo wuvae. Cresens no Galatia lo wuvae eno Titus no Dalmatia lo wuvae.

¹¹ Luke likhino I gholo ani. Mark sasü o gholono ighilo, kughengu pa ye Ampeu kümla lo ighono I kuphulu cheni.

¹² I no Tychicus pesü Ephesus lo puwuvae.

¹³ Kughou nono hilau ighini keno, Troas lo Carpus gholo I no hebephi qhive keu, kaku eno akhoto no ashiyiko lo yepuku püakeqo süghilo.

¹⁴ Ayikiyiqiu Alexander no ighono I kijipüsae; Ampeu no pa kümla kiqi lono tsüchile nani.

¹⁵ No ampi ghi pa launo kutokupui lo, kughengu pa ye akumtoshi ningu kükütsü küla püani.

¹⁶ Iw sükusho tsa kükügha atüghüu loye khunomu I gholo puthugho move, kümtsü no I qhive. Alhou no pano nguku pemoniu!

¹⁷ Ikemu Ampeu no I gholo puthugho no I shikumto tsüe, tishikeu lono I vecheo atsakiviu qhoi shuphelu no Jewkumomi kümtsü pelo inilu peke. Ikehu abongshuu baxa lono I xaphelue.

¹⁸ Ampeu no alhoksa jeli kümtsü lono I xaphelu nani eno Paw kungugha yekipe lo I sasü ilo nani. Alho lono alholo ajuküvü Pa tsülo! Amen.

Ashekhau Petha

¹⁹ Prisca ngo Aquila eno Onesiphorus kibolomi lau petha tsülo.

²⁰ Erastus ye Corinth lo ngove eno Trophimus no sü auve kehu, I no Miletus lo pa qhive.

²¹ No ye süsü tusho züuno ighi nike pükapütsa lo. Eubulus, Puden, Linus, Claudia eno athiküzümi kümtsü no petha tsüpuwu ani.

²² Ampeu no o ghungu gholo apeniu. Ampeuw Küpükini no o gholo apeniu.