2 Tim. 3 - Sumi Naga CL (Re-edited) Bible (BSI)

Ashekhalau Tsala

¹ Ikemu hi vethalu lo, ashekha tsala loye aveküsa ghuloki ighi nani.

² Kughengu timiqo no ishi xüuve nani: alikhi ampi kimiye kemi, pisa kimnemi, aqheküza, akuchhomami, kütami thogha, apuaza hekibide, shikimthi kükühami, mithemo keu,

³ amlo kümkami, hasümla kemi, xikishi, ampi ghasükümla, ayiküsa, akivi kimiyemo kemi,

⁴ pishikiqhi, kutokupui mokemi, aqheküza no tsütsüngoju kemi, Alhou kimiye nike züqhulo alikhi aghapiqikulu kimiye kemi,

⁵ ju keloye Alhou sükümsami toi kemu Alhou küka milive kemi. Timi hitoi keqo launo putosü lo.

⁶ Hipaqo gholo khami ye mqümgha shi akiqo lo ilo no, miqemlei kemi totimi, axine makho no qaqhipe akeqo, alaghi jeli lono minemighei keu pesü zü sawuve cheni,

⁷ alhokuthu shikalu acheni kemu kuchou kighithi lo khilemu ighilu chemo keqo.

⁸ Jannes ngo Jambres pama no Moses mjochile ketoi, timi hipaqo ghi kuchou mjochile cheni. Timi hipaqo ye amlo lo küsaküghami eno aküpülü lo kihisü mlave kemi ke.

⁹ Ikemu panongu ye khitohi mu wumla nani, kughengu hu pama shou kishive keno, titoi timi kümtsü lau hipaqo ghüzü piye nani.

Kuchoyesü ye Alhou Tuthukishe

¹⁰ Ikemu no ye hipaqo lo I pape luvae: Iw shiküka, ghushoghili, I küxü kimji, I küpülü, Iw kutuukulu, I kikimiye, I no ithamo keu,

¹¹ Antioch, Iconium, eno Lystra lo I shikighime keu eno I ghime kümtsü, I no kishi ghichheghime puqhe eno Ampeu no ti kümtsü lono I xaphe keno nono ithi ani.

¹² Kuchou no Khristo gholo xükimepe Alhou sükümsa küxü xünishi kemi kümtsü shikimighi nani;

¹³ ikemu alhoksami ngo keghilishi kemi ye kütami pishikiqhi eno pano ampi ghi pishiqhi keu lono alhoksa shikithe nani.

¹⁴ Ikemu nou ye khikhi o shikave eno nono mtsüqhei pülü ani keno, tipau lo chechelo, eno khuu launo ti shikalu keno ithilo,

¹⁵ nono iti küxü lono kishi Kuchoyesü ithiche keno, tino Khristo Jisü lau aküpülü akeu vecheo xakulupu küdau o sawu kepu lokütsü tsünani.

¹⁶ Kuchoyesü kümtsü Alhou no müzüphe tsüe, ti ye kuchou shiküka lo, sakiyi keu lo, shikithekütsü lo eno amikucho qokiphe kümtsü lo peithalu nani,

¹⁷ tishianguno Alhou timi pelo shitsa shilu no akümla kivi kümtsü lo kupukülailu peniye ke.