2 Tim. 2 - Sumi Naga CL (Re-edited) Bible (BSI)

Khristo Jisü Ghüshimi Kivi

¹ Tishiaye, I nu, no ye Khristo Jisü gholo küpükini akeu vecheo mtotoi shilo,

² eno thopimi kutomo küa lono I no pikeu, nono chilu püakeu tsaqo pesü pükhükulumi khunono kütami shikalu nani keno, tipaqo pichebe lo.

³ Khristo Jisü ghüshimi kivi toi aghime lo asaje lulo.

⁴ Ghüshimi khumu aqoaho küxü lo xukütshü chemoe, kughengu pa kimji ye pa kishesü keu pulou shinikeu ke.

⁵ Pokuxu kelo iloni kemi ye pimheye kümtsü pelumo aye asaxü qemlae.

⁶ Alukichiu ichheime mla chekeu huno ghile hukelo asaje atüghüu ithulu masae.

⁷ I no kiu piani keno kümsükuto julo, kughengu Ampeu no o pelo thokha vethalupe nani ke.

⁸ David laghami, Jisü Khristo, akithi lono xüthughive keu hu, I no Atsakiviu lono pikülha chekeu kümsülu lo,

⁹ Hi ghenguno ni ye ime ani ke, ayikichhe no heqhi-buqhi kemi toi tshüpe ani. Ikemu Alhou tsa ye tshü püamoe,

¹⁰ Tighenguno ni ye Alhouw kishekiphemi ghenguno thokha puqhe luvetsü ani, tishianguno panongu ghi Khristo Jisü launo lhokta juküvü gholo xakulu ithulu peniye ke.

¹¹ Ishi pichekeu tsa ye kuchoue, kughengu: “Nino pa gholo thive aghi aye, ningu ghi pa gholo xü nani;

¹² nino puqhekulu shi aye, ningu ghi pa gholo ka nani; nino pa milive aye, pa ghi ningu milive nani;

¹³ nino aküpülü küha namu Pa ye pükhükulupu ke kughengu pa ye pa ampi milive mlae.

Ikhikulupu Kümla Kishiu

¹⁴ Panongu vilo hipau pesü ghutulo, Alhou zülono panoqo vilo atsa pesü kighekile kevilo pi azah tsülo. Ti ye akivipu kiumu shimlae ikemu ini akemi shipüsani keu likhie.

¹⁵ Tolukivi thaqhülo no ampi pesü kishekiphe, kujo-ighümo keu kümlau hutoi achipi lono kuchou tsa pepimhe no Alhou zülo piyelo.

¹⁶ Ikemu Alhou sümo keu tsa küghakile keu lo chhosü kevilo, kughengu ti ye alau timi sasü Alhou sümokeu lo wuve cheni,

¹⁷ eno pano tsapi ye apiyi no qhawoke toike. Tipaqo gholo Hymenaeus ngo Philetus pama ghi ani.

¹⁸ Pama no xüchilekulu ye hechevae pi püzü kuchou laghi lono tsüghüsü wuvae. Tino timi khami küpülü shipüsa tsü ani.

¹⁹ Ikemu Alhouw akumto boqha ye puthugho ani. Eno ti ye amchipu ishi ani: “Khunono Ampeuw keno, Pa no ithi ani,” eno “khunono Ampeu je pini keno, panongu kümtsü alhoksa lono putosüve lo.”

²⁰ Aki kuloghi lakhi lo ameshoyi ngo ghükayi nhemgha likhi achemoe, ikemu asü ngo ayeghi no shikeu ghi acheni, hami ye agigihupu vehu lo peitha cheni ikemu hami ye balha vehu lo peitha cheni.

²¹ Tighenguno khukhumu alhoksa lono pa shikimthe luve aye, pa ye akhoto vehu lo peitha chekeu thime toi kishekimthepe aki Mpeu vehupu lo peitha kivishi akümla kivi ghenguno kutope qhinani.

²² Ikehu alhothe lo minemighei keu launo putosü lo eno amlo kimthe lono Ampeu kuche kemi gholono amikucho, aküpülü, kikimiye, eno aloinokeu phulo.

²³ Mbomzü, akükümsü küküha kikighe lo chhosü kevilo, ti ye mtomshu keu iqüphe cheni kepi nono ithi ani.

²⁴ Ampeu qemi ye mtomshu kepu kumoe, ikemu kümtsü lau kikimiye piye kepu, shikükami shilu masa, kheakulu shimasa,

²⁵ eno mtshaminhei pa mjochile kemi shikithe tsü masae. Ishiake Alhou no pano pelo amlo xaidelu no kuchou ithilupe nani,

²⁶ eno panoqo no kümsüchilelu püzü tüghami no pano mepe qhino pa gho-apulou shipe chekeu lichhe lono poluve nani.