2 Tim. 1 - Sumi Naga CL (Re-edited) Bible (BSI)

Pethakütsü

¹ Alhou pulou vecheo eno Khristo Jisü lau aküxü akeu tsünike tushoqhi püakeu kiqi lono, Khristo Jisüw apostol Paul no,

² I qhuu, anu Timothy lau ye ani. Apu Alhou eno ni Mpeu Khristo Jisü launo küpükini, kimiyekini, eno aloinokeu tsü ani.

Bemakho Tsü püakeu Süsholo

³ I no putho-pucho lo akighini shike kümtsü, I mlo mtsümishei shino, ni eno I puasüqo no qe chekeu Alhou shikimthi ghi o kümsülu acheni.

⁴ I no o nhezü kipiji kümsülu aye, ni ye alokivi no chhitoi nishi kelauno, o sasü kushoni ke khelho cheni.

⁵ Ni ye o mlo tsüqhiyi keu küpülü kümsülu acheni, khikhi atüghüshi o püza Lois ngo o za Eunice pama gholo ache keno, eno itehi ye, o lolo aküpülü tipau ani kepi, I no pülü ani.

⁶ Hi ghenguno I no o shou kükümgha betsü kelono Alhou no agho o tsükeu hu iqü ipeghi penike o piputo ani.

⁷ Kughengu Alhou no ni tsükeu ghungu ye, msaichi peniye ke kumoe, ikemu aküka kumto, kikimiye eno alikhi aghasülukeu ghungu ke.

⁸ Tishiaye, ni Mpeu shepe shinike ghenguno kujomza kevilo momu pa ghenguno I no akughushi akeu jupe kujomza kevilo, ikemu atsakiviu ghenguno aghime shikeu lo Alhou küka kumto lono asaje lulo,

⁹ kughengu Pa no ni xalu eno kulu keu ye, ni kümla ghenguno kumoe, ikemu Pa kimji eno küpükini Pa no, ado-aghuloki huthu mphi züuno, Khristo Jisü vecheo, ni tsükeu ghenguno ke,

¹⁰ eno itehi ye, ni xakuluu Khristo Jisü ipeghikeu vecheo, tihu pephe piye eno tishikeu vecheo akithi küka kishekhave tsüno aküxü ngo thimonikeu küka Atsakiviu vecheo aküvü lo saipeghi tsüke.

¹¹ Atsakiviu hipau hu pikülha penike I pesü akükütsüu, apostolmi eno shikükau shi süküsü shi,

¹² tighenguno ni ye ishi aghime shi ani. Ikemu ni ye kujo chemoe, kughengu I no khuu pülü cheni keno ithi ani, eno I no thebei ithi anike kihitha püakeu tsala tomoke kutolo, I lau kiu pichebe püani keno, tipau Pa ye süshope qhinani.

¹³ Khristo Jisü gholo aküpülü eno kikimiye akeu vecheo, nono I launo chilu püakeu kuchou tsaqo papelo.

¹⁴ Aghungu Kimthe ni lolo akeu vecheo, agho kivi o pichebe püakeu jukutolo.

¹⁵ Nono ithi anike, Asia yeghi lo akemi kümtsü no I qhivae, eno tipaqo gholo Phygelus ngo Hermogenes pama ghi ke.

¹⁶ Ampeu no Onesiphorus kibolomi shou küpükini tsü peniu, kughengu ghuthu kutomo lo pa no I ghüthi püxütsü eno I no akughu yikichhe lo akeu jupe kujomzave moe;

¹⁷ ikemu kughou pa no Rome lo ighi keno pa ye khekulho shi I phusü ighi no I sasü kusholue.

¹⁸ Tipa tsala lo pa pelo Ampeu launo küpükini ithulu peniu! Pa no Ephesus lo akümla kivi thokha shi keqo nono akivishi ithi ani.