2 Thes. 3 - Sumi Naga CL (Re-edited) Bible (BSI)

Ni ghenguno Inikhu Tsülo.

¹ Ashekhashi athiküzümiqo, ni ghenguno inikhu tsülo, tishianguno nongu gholo shike toi Ampeu tsa pesü azüu veküpha wolu eno gihulu peni,

² eno kixikilami ngo lhoksami launo ningu xaphelu peni. Kughengu kümtsü no aküpülü anike kumoe.

³ Ikemu Ampeu ye pükhükulupu ke. Pa no alhoksa lono nongu iqhi kumto eno khekuto tsü nani.

⁴ Nino azah nongu tsüke toi nongu ye mla ani eno tishi anani kepi nongu ghenguno Ampeu lau amlo mtotoi ani.

⁵ Alhouw kikimiye eno Khristow kutuukulu lo Ampeu no nongu mlo kiche sawu peniu.

Akipichimi Kütüghü

⁶ Athiküzümiqo, itehi ningu no Ampeu Jisü Khristo je lono azah nongu tsü ani, khunono akipichi shi xücheni eno nongu no ni launo ikhilu keu kükütsu kiqi lono xüchemo keno, panongu launo tsüghüve lo.

⁷ Kughengu nongu ye kishi ni kimihi shi xükepu keno nongu ampi no ithi ani, nino nongu gholo akelo ningu ye akipichi shi püamoe,

⁸ momu ame tsümono khuno vilomu khuchu püamoe, ikemu nongu khuu shoumu amakho betsümo nike ningu ye putho pucho aghimeshi mla cheke.

⁹ Ningu ye akukuphu ithuluni keu chipiu küha yeke kumoe, ikemu ni toi shi peniye kichekipiye shitsü ke.

¹⁰ Kughengu nino nongu gholo aghi namu azah hipau nongu tsüniche: Khuana no mlani shimo aye, pa ye chu kepu kumoe.

¹¹ Kughengu nongu gholo khami ye akipichi shi xücheni, akümla lo azükini kühano kütami küpüna ke likhie pi nino chilu ani.

¹² Titoi kemi lau nino Ampeu Jisü Khristo je lono azah tsüno hakite akeu ye panongu ye iqüghai pütüta küxü ghenguno mla chulo.

¹³ Athiküzümiqo, akivi kümla shini keu lo aghüthisü kevilo.

¹⁴ Khuana no niw yesü hipau lo kiu piani keno agholumo aye, timi tipau jukimchipe qhilo, pa gholo kuloji kevilo, tishino pa pelo kujove pelo.

¹⁵ Ikemu athiküzümi toi pa kütüghüni thono aghümi toi kihi kevilo.

Kükümgha Kighini

¹⁶ Itehi ye aloino keu Mpeu ampi no ado kümtsü lo eno alaghi kümtsü lo alokiqipu nongu tsü peniu. Ampeu no nongu gholo apelo.

¹⁷ Ni, Paul ampi no I u pesü petha hipau yelu ani. Iw yesü kümtsü lo hi no kuchoue pikeu michipu ke; ni ye hipa ghola lono ye cheni.

¹⁸ Ampeu Jisü Khristow küpükini nongu kümtsü gholo apeniu.