2 Thes. 2 - Sumi Naga CL (Re-edited) Bible (BSI)

Ayezah Heküxa Timi

¹ Ni Mpeu Jisü Khristo ikighi eno ningu no Pa gholo kumqoni keu vehulo nino nongu qhüiniju ani athiküzümiqo,

² atsa chikulu lono pina, aghungu momu akichi lo tsa, eno niw yesü kimihi lono pinamu Ampeu tsala ighivae pino pai amlo süküthü momu thüghüive kevilo.

³ Kiu gholau nomu khuana pelo nongu pishiqhipe kevilo. Kughengu kütsakungo nu, ayezah heküxau eno hekibideu paghi ighi moke kutolo Ampeu tsala ighimo nani,

⁴ pa no alhou ipi chekeu momu ajulho kümlla jeli mjochile no tipaqo shoqa nani, eno pa ampi pesü Alhou kepi sheshu no Alhou chineki lo pa kungo-a shinani.

⁵ I no nongu gholo akelono hi kümtsü nongu vilo pikeu kümsü luamo keshea?

⁶ Itehi kiu no pa lakhape ani keno nongu no ithi ani, tishianguno ado achipi lono pa pephe piye nani.

⁷ Kughengu ayezah heküxau ye tuqhou no akümla shi ayae, ikemu pa hakhape akeu ikhive moke kutolo tishi ani aphi.

⁸ Tishino ayezah heküxau pephe nani, ikemu Ampeu Jisü ipeghi kelono Pa kichi lo atuthu huno pa pithive nani eno pa ye kiumu kumove nani.

⁹ Ayezah heküxau ikighi ye Satan kümla lono ke, pa no aküka, eno kichile michipu ngo akichiqhipu kümla peitha nani,

¹⁰ eno kixikila pishikiqhi jeli pesü pühave niye akemi pishiqhi nani, kughengu panongu no kuchou kimiye no xaluve peni keu milive ke.

¹¹ Tighenguno Alhou no kübangü keu panongu lau puwu nani, eno panongu no kichileu pülü nani,

¹² tishikeu lono khunono kuchou pülümo no amikuchokumo lo aghakiqi shi cheni keno kümtsü kileve nani.

Mtotoi Puthugho lo

¹³ Ikemu Ampeu no kimiye kichemi athiküzümiqo, ningu ye nongu ghenguno alhokuthu Alhou shikimthi masae, kughengu Aghungu no shikimthe tsü eno kuchou shou pülülu keu vecheo Alhou no nongu xalu niye amsüu xathi shi kishelue.

¹⁴ Ningu tsakiviu vecheo hipau lo nongu kulue, tishikeu lono nongu pelo ni Mpeu Jisü Khristo juküvü ithulu peniye ke.

¹⁵ Ikehu, athiküzümiqo, ni tsapi momu yesü lonomu nongu shikave keu khuaye lo mtotoi puthugho lo.

¹⁶ Itehi ye ni Mpeu Jisü Khristo ampi, eno ni Pu Alhou, khuu no ningu kimiye no küpükini vecheo lhokta lokughuno eno lajupu kivi ni tsü keno,

¹⁷ Pa no akümla eno atsa kivi pesü nongu mlo lokughuno tsüno shikumto tsü apeniu.