2 Thes. 1 - Sumi Naga CL (Re-edited) Bible (BSI)

Pethakütsü

¹ Paul, Silvanus, eno Timothy no, Thessalonia lo ni Pu Alhou eno Ampeu Jisü Khristo kukuhou lau:

² Ni Pu Alhou eno Ampeu Jisü Khristo launo küpükini ngo aloino keu tsü ani.

Shikimthikütsü

³ Athiküzümiqo, ningu ye alhokuthu nongu ghenguno Alhou shikimthi tsü akepu, ti ye achipi ke, kughengu nongu küpülü ye alau thuiku ani, eno lakhino lakhi lau kikimiye akeu ikowolu ani.

⁴ Tighenguno nongu kijipüsa eno shikighime keu kümtsü lo nongu no aküpülü itha mono kutuulu keu pesü ningu no Alhou kukuhouqo lo ni qheküzapu shi picheni.

Khristo Ikighi lo Küghakütha

⁵ Hi kümtsü Alhouw küghakütha ye achipi kepi mtsüqhei shitsü ani, tishianguno nongu no Alhou yekipe ghenguno ime akeu lo tile ilolu peniye ke.

⁶ Alhou ye achipi; khunono nongu ghime ani keno Pa no aghime pesü lochile nani,

⁷ eno aghime sholu akemi ngo ningu lau ghi Pa no alokughuno tsü nani. Hi ye kungugha lo Ampeu Jisü, Paw kungumi akumtomi gholo pephe kelono tishi nani.

⁸ Pa no amiküqü pesü Alhou mtha kemi eno ni Mpeu Jisü tsakiviu gholumo kemi shou amkhülu nani.

⁹ Panongu ye lhokta kütsakungo keu ghime sholu nani, Ampeu zülono eno Pa kumto jekipi lono hapheve nani,

¹⁰ tipa tsalani Ampeu no Paw akimthemi zülo ajekipi eno Pa küpülümi gholo agigihu ithuluni ke ighi kelono tishi nani. Hile nongu ghi süküqha ani, kughengu nongu no ni shepe pülüe.

¹¹ Hi ghenguno nino nongu ghenguno alhokuthu inikhu tsü cheni, tishianguno ni Lhou no nongu kulu keu ameküapu shitsü peni eno Pa küka lono aküpülü kümla kümtsü akivipu ghenguno shikupu tsüpeni,

¹² tishikeu lono ni Lhou eno Ampeu Jisü Khristow küpükini kiqi lono nongu gholo ni Mpeu Jisü jepipi tsü peni, eno nongu no Pa gholo apeni.