2 Peter 2 - Sumi Naga CL (Re-edited) Bible (BSI)

Kichile Tungkupmi eno Kükütsümi

¹ Ikemu timiqo gholo kichile tungkupmi ghi ipeghi ketoi nongu gholo kichile kükütsümi ighi nani. Panongu no tuqhou no shiküpsapu kichile kükütsü süghi nani, eno Khuu no panoqo qhüchilelu keno pano Mpeu ghi milive nani, tishianguno pano shou shiküpsapu ke-i süghi nani.

² Kutomo no ashi lo pitipüza keu pape wuve no tipaqo ghenguno kütami no kuchou laghi pipütha nani.

³ Eno pano lakimne lono akimki tsa pesü nongu launo ala shinike mqüqhi nani. Khaghi nomu panongu kipimi ye xüthilei püatsü aphi, eno pano kütsave kepu ye kike püaphie.

⁴ Kughengu kungumi thotsü axine shive kelo Alhou no süchile mono panoqo pesü küghakütha tsala tomoke kutolo ayikha no tshüpe aküzü qokutho lo qhive aye;

⁵ momu tsala Pa no achipiu mikucho sheshuu Noah gholo pano tsüni kumo aye mulholo Alhou kümthami yeghiqha qhoi züqozü lono ghülu püaghimo aye;

⁶ tsala Sodom ngo Gomorrah phughiqo pesü ayevu kughulhove tsükeu lono panoqo püghavetsü, eno pano pesü Alhou kümthami lau kiu ighi nani keno kichekipiye shi püaghi aye;

⁷ eno tsala Pa no kixikilamiw pitipüza keu kümla lono amikuchou Lot xaphelu püaghi aye

⁸ (kughengu amikuchou no tsalakipe timi tipaqo gholo xüche kelo pano kümla lhoksa ithulu eno chilupe pa ngulho ghuju cheke);

⁹ ikehu Ampeu ye puju-peju keu lono Pa ithi kemi kishi xaphelu kepu keno ithi cheni, eno küghakütha tsala tomoke kutolo amikucho kumomi pesü ghimeni keu ithi cheni,

¹⁰ eno ti ye akhotoshi khunono pano shiaji lo ngosükümla kükümsü pape no yepemi jukünatha cheni keno tipaqo pi ani. Msaighümo mithe panoqo no amlo kumto eno aqheküza shi ajuküvüpu lo akemi thaigha cheni,

¹¹ ikelo kungumi ye hipaqo nguno shishe akumtou eno akughushuu keghi panongu ye Ampeu zülo thaigha keu tsa pichemoe.

¹² Ikemu timi hipaqo ye akükümsü küha keu tüghashiqo paphishi sü-i khavi kiukiu mu shive chekeqo, küghape pithiveni keu kimji lono püxü püani, eno kiumu mthamithe keu vehu lo ghi pano no thaigha cheni kehu hi kümtsü pesü kütsave nani,

¹³ pano kümla lhoksa ghenguno tipau jume aghimepu tsü nani. Atsala küvü lono panongu shiaji ghapiqi keu no pano pulou ke. Panongu ye panow pishikiqhi lono aghakiqi shi nongu gholo akukujopu eno tichetighepu shi chusho acheni.

¹⁴ Panongu ye asalha nhethi xapu ghasümla mithe axine shinishi cheni. Panongu no timi tsaqütsaleimo kemi züluve cheni. Panongu ye alakimne lono qopheve keu mlo xapu ani, Ghushove keu ti-anuliqo!

¹⁵ Panongu ye achipiu laghi pheve no ala ghüzü lo itsü wuvae. Panongu ye Beor nu Balaam papesü wuvae, pa ye alhoksa kümla lono ala kighishe lunishi che,

¹⁶ ikemu pa ampi xine ghenguno pa pesü sakiyi; atsa pikümlau khurha no atsa pi eno timi sütsa lono tungkupu ghüzü-nikha lakha ke.

¹⁷ Timi hipaqo ye qhaive keu züpuki eno pasapagha no khüngküsü fupe chekeu toike. Akumou küzü kutho-a ye pano ghenguno kuto püatsü ae.

¹⁸ Kughengu mbomzüshi ighale atsa pikeu lono panongu no ashi lo ngosükümla xine pesü alhoksami launo pokaluni ke akushukulu ipeche keqo müsü sailove cheni.

¹⁹ Panongu no khaqhikiphe ghili picheni, ikemu pano ampi ye shiküpsapu qemi. Kughengu kiukiu nomu timi shou qhasü luve aye, timi huye tipau qüaxemi ake.

²⁰ Kughengu panoqo no ni Mpeu eno Xakuluu Jisü Khristo ithilu keu vecheo ayeghiqha lo kitiqe keu jeli lono pokaluve kethiu itaghi tipaqo gholo küptshü luve aye, pano ye püzüu atüghü lo nguno ashekhalau no alhoksa shikitheve cheni.

²¹ Timi hipaqo no amikucho laghi ithive püzü akimthe zakütsü panoqo tsükeu launo idewove keu ye inahuu no amikucho laghi ithi move keu pavini cheke.

²² Kuchou holetsa no kiu pive akeno pano lau shikupuvae: “Atsü no puquleve no idewo ti chuve cheni, eno awo no azü kuchhuve kethiuno idewo aniba lo ihi cheni.”