2 Peter 1 - Sumi Naga CL (Re-edited) Bible (BSI)

Pethakütsü

¹ Jisü Khristo qeu eno apostol, Simeon Peter no, Ni Lhou eno ni Xakuluu Jisü Khristo mikucho lono khunono ni sasü kümghülu ghi aküpülü ye ithuluve akeno panoqo lau ye ani:

² Alhou eno ni Mpeu Jisü ithikuthulu keu vecheo nongu lau küpükini eno aloino keu küghüsülu apeniu.

Nongu Kukulu eno Kishekulu

³ Alhou Khuu no Pa kimthe juküvüpu eno akighichepu lo ningu kuphelu keno, Pa kimthe küka huno aküxüpu eno Pa toilu kepu kighithi kümtsü pesü ningu tsüvae;

⁴ tipau vecheo Pa no Paw akughupu eno pikiqhitsa kije pesü ningu tsüvae, tishianguno tipaqo pesü nongu no ayeghiqha hipau lo pitipüza keu xine jeli ghenguno shiküpsa achekeu launo poluve peniye ke.

⁵ Hi ghenguno, tolukivi thaqhü pükapütsa no nongu küpülü gholo xükipivi pesü veqabelo, eno xükipivi gholo akighithi pesü veqalo,

⁶ akighithi gholo alikhi aghasükulu pesü veqalo, eno alikhi aghasükulu gholo kushuo puqhekulu pesü veqalo, kushuo puqhekulu gholo Alhou ithitoi keu pesü veqalo,

⁷ Alhou ithitoi keu gholo aküsami ivükile keu pesü veqalo, eno aküsami ivükile keu gholo kikimiye pesü veqalo.

⁸ Kughengu ameküapu hipaqo pesü nonguw shilu no kighishelu aye, nongu ye ni Mpeu Jisü Khristo kighithi lo khilemu qeinai eno amekühave monani.

⁹ Kughengu khunono ameküapu hipaqo küha keno pa ye anhetsü ikholo kehu püzüu xine shikimtheve tsükeu pishipuwo ithulu chemoe.

¹⁰ Tighenguno aküsamiqo, nongu kukulu eno kishekulu hu mtsüqhei lupe kepushi alau aghüthi küxü shilo, kughengu nongu no ameküapu hipaqo pepimhe aye nongu ye khilemu ikiqivemo nani.

¹¹ Kughengu hitoi shikeu lono nongu pelo ni Mpeu eno Xakuluu Jisü Khristow lhokta yekipe lo ilolu penike nongu ghenguno akulaghi ililai shi khaqhitsü nani.

¹² Ikehu nongu no tipaqo ithi ani eno kuchou ghili ikhiluve keu shou mtotoi xü acheni kemu I mlo lo alhokuthu thime hipaqo vehu nongu vilo pinishi che kehu ghutulu anike.

¹³ I ghengu ye I no xüake tivilo nongu ghutu ghi xukutho puthuni keu ye achipi ke,

¹⁴ kughengu ni Mpeu Jisü Khristo no mtsümishei I piyeve akeke I phimpi hipau liqhive kepu doye kighitheve nanie pi I no ithi anie.

¹⁵ Eno I no wuve kethiu mu nongu pelo kiukiu tüqhüdo lomu hipa vehuqo kümsüchilelu peniye ni ye ahe-agho pephepe mla nani.

Khristo Juküvü eno Tungkuptsa

¹⁶ Kughengu kughou nino ni Mpeu Jisü Khristo küka eno Pa ikighi ghili nongu lau kilethitsü keno, ningu ye mqümgha shi iqüphe keu küghakiche tsa papemoe, ikemu ningu ye Pa kükanguagha thopimi ke.

¹⁷ Kughou Apu Alhou no agigihu eno ajuküvü Pa tsü, eno ajuküvüpu kükanguagha sütsa huno, “Hi ye I Nu I qhuu, I mlokiqi Pa lau acheni,” ipi ashepe tsü keno,

¹⁸ ningu ampi no kungugha lono asütsa hipau pikeu athoshi chilue, kughengu ningu ye akimthe toghi lo Pa gholo ake.

¹⁹ Itaghi ningu ye mtsüqhei keu tungkuptsa aphie, tsütho ipeche kelo inaqhe yepu no nongu lolo yepüvü tsümoke dolo hi ye aküzü-a lo aküvü akeshi anike nongu no amlo tsüqhiyilu aye alo nani.

²⁰ Ikemu Kuchoyesü lo tungkuptsa lakhimu lüthüw pekibide lono kumo kepi atüghüshi ithilo.

²¹ Kughengu tungkuptsa ye timi gho-apulou lono ighi püamoe, ikemu Aghungu Kimthe vecheo Alhou no tsükeu tsape Paw akimthemi no pikeu ke.