2 Kor. 9 - Sumi Naga CL (Re-edited) Bible (BSI)

Khristomi Ghenguno Akukuphu

¹ Ni ye küpülümi lau mla kepu vehu pesü nongu lau yekepu kühae,

² kughengu nongu no kutope akeu I no ithi ani, tipau pesü I no Macedoniami vilo Achaiami ye khanikü no kutope anie pi I kijivile pike. Eno nongu zükini no panongu kutomo hakutho luvae.

³ Ikemu I no athiküzümiqo puwu ani, tishianguno nongu jupe ni kijivile akeu ye adou shive pemono I no pipüa ketoi nongu pelo kutope aghi peniye ke.

⁴ Tikumo aye Macedoniami khami no I gholo ighi no nongu no kuto mono akeu ithulu aye, nino nongu shou pükhübeke ghenguno—nonguu ye qhive no—nino kujove nani.

⁵ Ikehu nongu no agho tsünike piqhi püakeu kuto aghi penike azünatha ghi athiküzümi hakite masa kepi I no kümsülue, tishianguno ti ye tsüve keu theli lo lakuju kühano pulopinyi keu gho shi kuto peniye ke.

Qhaqhilei shi Tsükemi

⁶ Atsa ye hike: khuu no aghulo xusüni keno aghulo xolu nani, eno khuu no kutomo xusüni keno kutomo xolu nani.

⁷ Tsünishimo qhiyi momu tsülo pikeu lono kumono milakhi khino amlo lono xathalu keu kiqi lono tsülo, kughengu Alhou ye amlo qhaqhilei shino tsükemi kimiye cheni.

⁸ Eno Alhou ye kupukuno shi nongu kümghatsü kulupu ani, tishianguno ado kümtsü lo kiukiu lomu nongu no avehupu shikeu lukümkha shilu nani, eno akümla kivi kümtsü lo nongu ye ikoishelu nani.

⁹ Ishi yepüa ketoi, “Pa no kümsano kijetsü, Pa no kumlhomi tsüe, Pa mikucho ye alholo acheni.”

¹⁰ Khuu no apiti pesü apiti kiveu tsü eno asho pesü achuqupu shitsü keno, Pa no xusü kepu piti tsüno kughukotsü nani eno nongu mikucho ghile küghüsü tsü nani.

¹¹ Nongu pelo ala thokha lo tsü-jekinimi shi penike ala thokha lono kinikülü shilupe nani, eno ni vecheo nongu no Alhou shikimthilu nani.

¹² Kughengu hukuthu kümlapu hipau ye küpülümi vehupu lo tsülu keu likhi kumono Alhou lau shikimthi kütsü no qochili lukeu ghike.

¹³ Akümla hipau vecheo nongu no Khristo tsakiviu ikhilu no aghokulu shikeu lono Alhou juküvü shitsü eno puloniqhiyi timi kutomo sasü küsaje ke ghenguno kütami no Alhou sheqhe nani.

¹⁴ Ikehu Alhou no kimghi mlakeu küpükini nongu tsükeu ghenguno panongu no nongu ghenguno inikhu kelo nongu kimiyeqhiyi nani.

¹⁵ Alhouw pikha kümlapu gho ghenguno Pa shikimthilo!