2 Kor. 8 - Sumi Naga CL (Re-edited) Bible (BSI)

Khristomiw Tsükini

¹ Athiküzümi achelimiqo, Macedonia kukuhouqo lo Alhouw küpükini tsükeu nino nongu pelo ithi penishi ani,

² kughengu aghime kitikhi no peju kelo, panongu lokivi ye kije eno aqüagha no ihulo akeghi panow tsü-jekini yeliqole pephe piye ke.

³ Kughengu I no ashepe tsülu anike panongu no kutolu ke qhemi, eno tinguno alau ghi pano lolo no ipeghi no tsü,

⁴ eno küpülümi kuphulu kepu kümla shilu pelo pi puloniqhiyi ningu qhüiniju,

⁵ ike hi ye nino kümsümo mithekeu, ikemu panongu no pano ampi pesü Ampeu tsüve paghi ke, tishino Alhou pulou lono ningu lau tsüe.

⁶ Ikehu ningu no Titus vilo pa no huthuphe ketoi nongu gholo hi küpükini kümla ashehove tsülopi pa hakite ke.

⁷ Nongu no thokha lo akighiche shiche ketoi—aküpülü lo, atsapi lo, akighithi lo, puloniqhiyi keu lo, eno niw kikimiye nongu lau akeu lo—küpükini kümla hipau lo ghi nongu ye akighiche shinike pükapütsa lo.

⁸ I no hi pi akeu ye azakütsü lono kumoe, ikemu kütami no pulopinyi akeu vecheo nongu kikimiye ghi kuchou kepi piye niye ke.

⁹ Kughengu nongu no Ampeu Jisü Khristow küpükini ithi anike Pa ye kinimi shi akeghi nongu ghenguno kumlhomi shive ke, tishianguno Pa qüagha vecheo nongu pelo kinimi shilu peniye ke.

¹⁰ Eno hipa vehulo kiu no nongu la shilu nani keno Iw xakütha tsü ani: wovekeu mpe lo nongu paghino akümla hipau huthu tsüke likhi kumono hi shinike pulo tsüke.

¹¹ Ikehu itehi ye ti shikupuve tsülo, tishianguno nongu no aghikeu pesü ashehove tsükeu huno nongu lolo puloniqhiyi kutope akeu sasü kimshilu nani.

¹² Kughengu pulopinyi keu aghi aye, milakhi no kühakeu kumo püzü kiu ani keno ti ikhilutsü nani.

¹³ Ni ye kütami makho kümthüve tsüno nongu makho kimshive tsüniye ke kumoe, ikemu aghibiu shinike ghenguno

¹⁴ nongu no itodolo pofushi akeu huno panongu vehupu kumkhotsü kepue, tishikeu lono panongu no pofushi akelo nongu vehupu kumkho tsülü nani, eno aghibiu shilu nani.

¹⁵ Ishi yepüa ketoi, “Khunono kutomo kichekütsü keno kutomo kütü aghimoe, eno khunono kitila kichekütsü keno tülalo aghimoe.”

Titus Shekiqhe

¹⁶ Alhou shikimthie, Pa no Titus mlo lo I no nongu ghenguno alomsü chekeu atho sütsü ke.

¹⁷ Kughengu nino qhüiniju kelo pa no ikhilu tsüke likhi kumono pa ampi ghi puloniqhiyi shino pa kutoshino nongu lau chenike.

¹⁸ Pa gholono athiküzüu khuu atsakiviu pikülhake ghenguno akukuhou kümtsü lo ajekipi shi acheni keno ningu no pa puwu ani.

¹⁹ Tilikhi kumono athiküzüu ye ningu no Alhou juküvü ghenguno eno ni mlokütsü piyeni ke hi küpükini kümla shi akelo ni gholo kicheghüzü shipeniye akukuhouqo no süküsü shivae.

²⁰ Ningu no hi kümsa gho jukütsü akelo khuu pelomu ningu pülüpüsa pemo niye ke,

²¹ kughengu ningu kimji ye Alhou zülo likhi kumono timi zülo ghi gihuküzüpu shiniye ke.

²² Pama gholo ni thiküzüu lakhi khuu nino ghuthu kutomo pejuve no amlokütsü shi ithulu keno pa puwu ani, eno itehi pa ye nongu shou pülükibe kije akeu ghenguno alau amlo tsüqhiyi ani.

²³ Titus ye I tüna shino nongu vehupu ghenguno I gholo mlaküqha chekemi. Eno ni thiküzüu pama ye Khristo juküvüpu ghenguno akukuhouqo tsapemi ke.

²⁴ Ikehu timi hipaqo lau nonguw kikimiye eno nino nongu jupe qheza chekeu piyelo, tishianguno akukuhouqo pelo ti ithulu peni.