2 Kor. 7 - Sumi Naga CL (Re-edited) Bible (BSI)

¹ Kimiye chekemiqo, ningu lau pikiqhitsa hipaqo anike ghenguno ni phimpi eno aghungu shipixi chekeu kümtsü shikimtheve no Alhou sükümsa lono akimtheshi kupukülai luni nolo.

Paul Lokivi

² Nongu mlo ningu lau khaqhi tsülo. Ningu ye khumu pimi püamo, khumu külügho tsü püamo, ni vehupu shiniye akumou lono khumu peitha püamoe.

³ Ni ye akipimi nongu tsüniye hipa tsa piamoe, ti ye I no püzüu no pive ketoi, akithi mu aküxü mu ningu kümtsani ke nongu ye ni mlo lo anie.

⁴ Ni ye shoboi shi nongu vilo pi ani; ni ye nongu jupe shishe akijivile acheni; ni ye alokughuno shi anie. Aveküsa kümtsü lo ni ye alokivi no qochili acheni.

⁵ Macedonia lo ighive kethiu ghi ningu ye akulho qhimla no ala thokha lono ningu kijipüsa ke—ni lolo msaichi anamu ashou ye kütami sasü kumgho ke.

⁶ Ikemu amlo hauve kemi shikumto chekeu Lhou no Titus pelo ighilupe keu vecheo ningu shikumto tsü,

⁷ pa ikighi likhino kumoe ikemu nongu no kishi pa lokughunotsü keno tipa ghengu ghike, eno nongu no kiutoi I sasü kushoni shi, I ghenguno mloqa eno minemighei ani keno pa no ningu vilo pi kelo ni ye alau alovi kitheke.

⁸ Kughengu Iw yesü no nongu mlo ghujuve aghimu ni ye kümsüchile amoe—kuchou loye ni ghi kümsüchileve ke, ikemu I no ithi anike yesü tipau no nongu mlo ghuju tsükeu ye ado hami ghengu likhino ke.

⁹ Ikehu nongu mlo ghujuve ke ghenguno kumono nongu mloghuju lono xaidelu kehu ni ye alovi ani.

¹⁰ Kughengu Alhou küdau no amloghime peitha luve keu no aküxü xaidelu no xakulupu lo sawu cheni eno tile kümsüchile kepu kühae, ikemu ayeghilo mloghime no akithi süghi cheni.

¹¹ Alhou küdau no amloghime peitha luve keu no nongu lolo kiu iqüphevetsü akeno julo: nongu kipimi kühakeu piyeni ke alokümsü shikeu, pimive kemi shou axuide keu, alhoksa shou piqepuloi lukeu, khekulho shikeu, amlo tsüqhiyi keu, eno alhoksau ghime keu! Hi kümtsü lo nongu no pimi püamo keu piyevae.

¹² Ikehu I no nongu lau yesü ye kemu ti ye pimive kemi ghenguno kumo momu akumou lono imeve keu ghenguno mu kumoe, ikemu Alhou zülo nongu no ni ghenguno amlo tsüqhiyi chekeu pephe peniye ke.

¹³ Tighenguno ningu ye amlo mtotoivae. Ni mlo shikumto tsükeu gholo Titus lokivi ghenguno ningu ye alau alovivae, kughengu nongu kümtsü no pa ghüthi püxü tsüke.

¹⁴ I no pa vilo nongu ghili I qheküzapu shi pinamu I shikujove moe. Ikemu nino nongu vilo pikeu kümtsü kuchou ketoi, Titus zülo ni qheküzapu shi pikeu kümtsü kuchou shi aghive ke.

¹⁵ Nongu kümtsü no aghokulu shino msa khokhoshi pa ikhilu keu pa no kümsülu kelo pa ye nongu kimiye keu alau kije auvae.

¹⁶ I no nongu shou qhoi pükhübelu kehu ni ye alovi ani.