2 Kor. 6 - Sumi Naga CL (Re-edited) Bible (BSI)

¹ Pa gholo mlaküqha kemi shi nino nongu qhüiniju anike adou lono Alhouw küpükini ithulu kemi shi kevilo.

² Kughengu Pa no pi ani, “Ikhikulupu ghuloki lono I no nongu sütsa initsü, eno xakulupu tsala lono I no nongu kuphue.” Julo, itehi no ikhikulupu doke; itehi no xakulupu tsalae.

³ Timi khuu laghi lomu ningu ye lakükha qhitsü chemoe, tishianguno ni kümla lo akipimi kiumu phulu pemo niye ke,

⁴ ikemu Alhou qemi kehu alaghi thokha lo ningu ampi no kichekipiye shicheni: aghime lo, akijiksapu lo, amhekiqi lo shishe puqhekulu shicheni,

⁵ ghaqhi kelo, akughukishi lo, mtomshu ipeghi kelo, aghime lo, puthotsü züpemo kelo, amzü lo puqhekulu shino

⁶ akimthe, akighithi, kutuukulu, kimiyekini, Aghungu Kimthe, kuchou kikimiye lono

⁷ kuchou tsapi eno Alhou küka lono; au ajeu ngo piyiu amikucho ghünanu pesü;

⁸ ajekipi eno ajeküsa lo, thogha eno sheqhe keu kümtsü lo ningu no puqhe acheni. Pishikiqhimi toi ningu peitha cheni, ikeghi ningu no kuchoue;

⁹ ithi akeghi mtha ketoi ni kihi cheni, ikemu kuchou loye aqha kighithimi ke; kithimi toi, ikemu julo, ningu ye xüani; ghimeqhi akeghi pithive moe;

¹⁰ amloime ketoi anamu alhokuthu alovi cheni; kumlhomi toi anamu timi kutomo pesü kinimi shitsü cheni; kiumu küha ketoi keghi thokha kümtsü acheni.

¹¹ Corinthmiqo, nino nongu lau süchou no pivae; ni mlo ye khaqhi püani.

¹² Nongu ampi no now kikimiye hakhape ani kethono nino kumoe.

¹³ Ikehu, itehi ye (ni ye atianuli pütsa aketoi pi ani), nongu ghi ningu toi amlo xükholo.

Aküxüpu Lhou Chineki

¹⁴ Pülümokemi sasü kuokhasü pukümtsa kevilo. Kughengu amikucho ye kiu lono ayezah heküxa sasü kütünalu nani kea? Momu aküvü ye kiu lono aküzü sasü kuposhulu nani kea?

¹⁵ Khristo ye kiu lono tüghami sasü küqhalu nani kea? Momu küpülümi ye pülümokemi sasü kiu aqü shikulupu ani kea?

¹⁶ Alhou chineki ye ajulho sasü kiu lono pulokilelu kepu ani kea? Kughengu ningu ye aküxüpu Lhou chineki ke, ti ye Alhou no ishi pi ketoi, “I no panoqo gholo I kungoa shino pano gholo anani, I no panoqo Lhou shi nani, eno panongu no Iw timi shinani.

¹⁷ Ikehu panoqo launo ipevelo eno pano launo kütüta shivelo, ipi Ampeu no pi, eno mithekumo kiumu bu kevilo, tileno I no nongu ikhilu nani,

¹⁸ I no nongu Papu shinani, eno nongu no I pu-anga shinani, ipi Akughushu Mpeu no pi ani.”