2 Kor. 5 - Sumi Naga CL (Re-edited) Bible (BSI)

Kungugha lo Kungo-a

¹ Kughengu nino ithi akeu no tsala ayeghi lo ni kungo phiki huno shipüsave namu ningu ye au no shimokeu, lhokta atsütsü lo achekeu ki Alhou lau ani.

² Ningu ye kungughalo kungo nanu pepunishi kelauno ayeghi lo phiki lo akelo amloiju igha acheni,

³ kughengu ti pepuve aye, ningu phikümsa ithulumo nani.

⁴ Kughengu nino hipa phiki lo ake thaqhü loye amakho xapu igha acheni—ti ye ayeghi lo phimpi pheve nishi kelauno kumoe, ikemu kungughalo phimpi alau pepunishi kelauno ke, tishikeu lono akithipu huye aküxüpu no munove peniye ke.

⁵ Khuu no aghungu pesü ningu tsü püzü ningu ghenguno thime hipau kutokughoi qhitsü keno ti huye Alhou ke.

⁶ Ikehu ningu ye alhokuthu amlo kuloghi shicheni. Nino ithi akeu no ni phimpi kilo ake tiviloye Ampeu launo putosü ani,

⁷ kughengu ningu ye ithukulu lono kumono aküpülü lono checheni.

⁸ Iyei, ningu ye amlo kuloghi shi ani, eno aphimpi qhive püzü Ampeu gholo auveni keu pavi nani.

⁹ Ikehu aki lo na putosüu namu, ningu ye Pa pulou shini keu no ni kimji ke.

¹⁰ Kughengu ningu kümtsü Khristow küghakütha zülo puthugho masa nani, eno akivi na alhoksa namu pütüta no kiu mla püani keno tipau kiqi lono asaje ithulu nani.

Alupekikili Kümla

¹¹ Tighenguno, Ampeu sükümsa ye kiu keno ningu no ithi ani kehu nino timiqo züiza cheni. Ikemu nino kiu keno Alhou no ithi ani eno I no laju akeu no nongu ghi ni ithi aghi nani ke.

¹² Ningu ye ningu ampi sheqhe anike kumoe ikemu ningu jeku lono nongu pelo qhezalu peniye ke, tishianguno nongu pelo khunono amlo lo akeu jumono ashou aju akoghe jupe qheza cheni keno tipaqo khochilelu peniye ke.

¹³ Kughengu nino küghüzümi ghola shive aghi aye, ti ye Alhou ghenguno ke; ikemu ningu kükümsü achipilo aghi aye, ti ye nongu ghenguno ke.

¹⁴ Kughengu Khristo kikimiye no ningu bothape ani kehu ningu no ishi xathavae: milakhi no kümtsü ghenguno thive, ikehu kümtsü pa gholono thivae;

¹⁵ Pa no kümtsü ghenguno thive, ikehu khunoqo xüani keno panongu ye pütüta ghenguno kumono Khuu panongu ghenguno thive no xüputhuve keno Pa ghenguno xü peniye ke.

¹⁶ Ikehu hinguno hilau ye ningu ye timi khumu ashi gholau no ikhilu moae. Ghuthu lakhi lo ningu no ashi gholau no Khristo ikhilu püaghi namu itehi ye tishi movae.

¹⁷ Tighenguno khukhumu Khristo gholo xükime luve aye, pa ye lhoxü kithe shivae. Aqau ye wovae; julo, akitheu ighivae.

¹⁸ Hi kümtsü Alhou launo ke, Pa no Khristo vecheo ningu pesü Pa lau alupekili lupe eno alupekikili kümlapu ningu tsüe;

¹⁹ ti ye, Alhou no timi xine kihitsü mono Khristo küdau no ayeghiqha pesü Pa lau külashi ae, eno ningu shou alupekikili kümlapu piche tsüke.

²⁰ Ikehu ningu ye Khristo ghenguno lashikami, Alhou no ningu vecheo ghutu ake kumlhoke. Ningu no Khristo züqhushi nongu hakite anike Alhou sasü alupekili luvelo.

²¹ Khristo ye axine kühae, ikemu ni ghenguno Pa pesü axine kughulhove tsü, tishianguno Pa küdau no ningu pelo Alhou chipiu mikuchomi shilu peniye ke.