2 Kor. 4 - Sumi Naga CL (Re-edited) Bible (BSI)

Atsakiviu Küvü

¹ Tighenguno, Alhouw küpükini vecheo akümlapu saje hipau ningu tsü kehu, ningu ye amlo hauve chemoe.

² Ikemu ningu ye tuqho-tugho eno akukujopu kümla qhikhavae. Ningu ye mqümgha momu Alhou tsa süchighive chemo, ikemu pekiphe shi kuchou ghili pikeu vecheo ningu ye Alhou zülo ningu ampi pesü timiqo kiviküsa lokütsü zülo ikhiphetsü acheni.

³ Tsala ningu tsakiviu no nha püaghi namu, ti ye khunoqo pühauve chea keno tipaqo lau likhi küsüve ake.

⁴ Panongu ghengu ye hipa yeghi lo lhou no pülümokemi mlo kughupove tsüae, tishikeu lono panongu pelo Alhou jukimhiu Khristow ajuküvü tsakiviu küvü ithulu pemo niye ke.

⁵ Kughengu ningu ye ningu ampi sheshu chenike kumoe ikemu Jisü Khristo ye Ampeu kepi sheshu cheni eno Jisü ghenguno nongu qemi shi acheni.

⁶ Kughengu, “Aküzü lono aküvü vüipeghi lo,” ipikeu Lhou no Jisü Khristo gilo Alhou juküvü kighithi küvü tsünike ghenguno ni mlo lo yepüvü tsüke.

Alikoli lo Akini

⁷ Ikemu ningu ye akini hipau aghani likoli lono ani, ti ye aküka akiqheu ye Alhouw kethono niw kumoe piniye ke.

⁸ Alaghi thokha lono ningu tsadaqhi ikemu chunudave chemoe; phiküghüzü ikemu amlo hauve chemoe;

⁹ shikighime cheni ikemu pheve chemoe; hekuluqhi ikemu kütsave chemoe;

¹⁰ alhokuthu ni phimpi lo Jisü kithi xapu acheni, tishianguno Jisü küxü ghi ni phimpi lo ithulu peniye ke.

¹¹ Kughengu Jisü ghenguno alhokuthu ni küxü ye akithipu lo ikhiphetsü acheni, tishianguno pa küxü ghi ni phimpi lo ithulu peniye ke.

¹² Ikehu akithi no ni lolo mla ani, ikemu aküxüpu no nongu lolo mla anie.

¹³ Kuchoyesü lo “I no pülülu; tighenguno I no pivae,” ipi püani kehu ningu ghi aküpülü ghungu aphiphi akeu kiqi lono pülülu no pi anike,

¹⁴ ti ye ningu no ithi aketoi Alhou khuu Ampeu Jisü xüputhu keno, Pa no Jisü gholono ningu ghi xüputhu nani, eno ningu kümtsa Pa zülo saghi nani.

¹⁵ Hi kümtsü nongu ghenguno ke, tishianguno küpükini no timi lau alau ikowo kelo Alhou juküvüpu shi shikimthi kütsü ghi alau ikowo peniye ke.

¹⁶ Tighenguno ningu ye amlo hauve chemoe. Ni phiashi ye tsüma aya kemu ni lolo ye tsalakipetsü akithe shivetsü ani.

¹⁷ Kughengu hi ado ikhonhei aghimepu sholu akeu huno ningu ghenguno kiunomu kimghi mla keu lhokta juküvü kutotsü ani,

¹⁸ Ikehu ningu ye ithukulu thime shou kumono ithukümla thime shou jupuku acheni. Kughengu ithukulu thimeqo ye ado ikhonhei ghengu likhi, ikemu ithukümla thimeqo ye lhokta ghenguno ke.