2 Kor. 3 - Sumi Naga CL (Re-edited) Bible (BSI)

Puloshoqhi Akitheu Qemiqo

¹ Ningu ye itaghi ningu ampi shepe shithuve akeshea? Ikeo timi khami toi nongu lau ighini keu shepekütsü yesü momu nongu launo ti avehupu shi ani kea?

² Nongu ampi no niw ashepekütsü, ni mlo lo yepüa keu yesü, timi kümtsü no ithi eno phipeni keu ke.

³ Eno nongu ye Khristo launo ighi keu, ni vecheo pekiye süghi keu yesü ke, akiyezü no kumoe ikemu aküxüpu Lhou Ghungu no yekeu, atulupha lo kumoe ikemu timi mlo lo yepuku keu ke.

⁴ Khristo vecheo ningu no hitoi Alhou lau pükhükibe ani.

⁵ Ningu ampi no ningu ye hi shikulupu anie pi pükha amoe, ikemu nino shikulupu akeu ye Alhou launo ke,

⁶ Pa no ni pelo puloshoqhi akitheu qemi shilupe, ti ye akiye lono kumoe ikemu Aghungu lono ke. Kughengu akiye huye akithi ke ikemu Aghungu no aküxüpu tsü cheni.

⁷ Tsala akithi süghi keu kümlapu, ti ye atupha lo atsathi chitha puku keu thotsü ajuküvüpu shi ighi kehu Israelmi ye ado ikhonhei kemu Moses gilo jupuku mlave aghi aye,

⁸ Aghungu kümlapu loye tinguno alau ajuküvüpu shimoni keshea?

⁹ Kughengu akipimi kütsü kümlapu lo thotsü ajuküvü aghi aye, achipiu mikucho kümlapu loye tinguno alau ajuküvüpu shimasae.

¹⁰ Kuchou no hipa tsa loye, inahuu ajuküvü ache keu ye ajuküvü lakhiu no shoqave kehu ti ye ajuküvü kühavae.

¹¹ Kughengu ado ikhonhei ghenguno ighi kelo thotsü ajuküvüpu shi ighi püaghi aye, pülhapuju acheni keu loye ajuküvü alau anani.

¹² Ningu ye lajupu hitoi keu anike ghenguno amlo mtotoi acheni.

¹³ Ningu ye Moses toi moe, pa ye Israelmi pelo ajuküvü hailo chekeu ithulu pemoni ye agi künhaphi pesü pa gi küzüve che.

¹⁴ Ikemu panongu kükümsü ye shikümkave, kughengu ishi kutolo kughou panongu no Puloshoqhi Aqau phini keno, agi künhaphi tipau ye lhaphe mphie, kughengu Khristo vecheo likhino aphi hu ikhiluve nani.

¹⁵ Iyei, ishi kutolo kughou panongu no Moses Yezah phini keno, agi künhaphi tipau no panongu mlo küzüpe acheni.

¹⁶ Ikemu kughou milakhi no Ampeu lau tsüghü ighini keno, agi künhaphi ye ikhive cheni.

¹⁷ Ampeu ye Aghungu, eno khilehi Ampeu Ghungu ani keno tilehi kuqhokiphe ani.

¹⁸ Eno ningu khunoqo agi nhamo no Ampeu juküvü ithulu cheni keno, kümtsü ajuküvü lakhi lono lakhiu kutolo Pa jukimihi lo kilisüve tsü ani. Kughengu hi ye Ampeu khuu Aghungu keno, Pa launo ighi anike.