2 Kor. 2 - Sumi Naga CL (Re-edited) Bible (BSI)

¹ Ikehu ni ye amlo ghujushi nongu xuju idemoni ke xathavae.

² Kughengu I no nongu mlo ghujuve aghi namu nongu kumo aye I lopivi tsüni kemi khuu ani kea?

³ I no tishi yesü yeve, tishikeu lono kughou I no ighini keno, ni ye I lopivitsü kemi jupe I mloküsapü shimo niye ke, kughengu I lokivi ye nongu lokivi ghi kepi I no mtsüqheino nongu shou pülübelu ani.

⁴ Kughengu nongu mlo küsapu shitsüni ye kumono nongu pelo Iw kikimiye kupukuno nongu lau akeu ithi penike ni ye amlo ghime kije eno amlo ghuju ngo anhezü kipiji lono nongu lau yesü yepuwu ke.

Axinemi Kipimi Qhitsülo

⁵ Khuana no amlo küsapu shipüaghi aye, pa ye I lau shike kumoe, ikemu kuchou loye—mkamghai pimoni ye kethono—nongu kümtsü lau shike.

⁶ Timi tikithipu lau aqo akichiu no aghime hipau beve keu no lumkhavae,

⁷ ikehu itehi ye nongu no idewo pa kipimi peve tsüno pa lokughuno tsülo, tikumo aye amloksa no pa mhoqhive nosake.

⁸ Tighenguno I no nongu qhüiniju anike nonguw kikimiye pesü pa iqhikumto kithelo.

⁹ Kughengu nongu peju no nongu ye thokha lo aghokulu shiani kemo keno ithini ke ghenguno ni ye nongu lau yeke.

¹⁰ Nongu no timi kipimi pevetsü keno, ni ghi pa kipimi pevetsü ani. Kuchou no I no akipimi pevetsü püaghi aye, I no kiu pevetsü akeno, ti ye Khristo zülono nongu ghenguno ke,

¹¹ tishikeu lono Satan pelo ningu shoqave pemo niye ke; kughengu ningu ye pa mqü mthake kumoe.

Khristo lono Tokulu

¹² Kughou I no Troas lo Khristo tsakiviu pesü asheshuni ye ighi keno, Ampeu no I ghenguno ahukikha khaqhitsü kemu,

¹³ tile I thiküzüu Titus ithumlave kehu I mlo no aloino mlave. Ikehu ni ye panongu qhive no Macedonia lo wuve.

¹⁴ Ikemu Alhou shikimthi, Pa no Khristo gholono alhokuthu ningu sasü aghü tolu no shekujo woche keshi cheni eno ningu vecheo Khristo kighithi xokütsüngü aqha kümtsü lo veküpha cheni.

¹⁵ Kughengu khunoqo xaluve ani eno pühave ani keno, tipaqo gholo ningu ye Alhou lau Khristo xokütsüngü ke,

¹⁶ pühave akemi lau ningu ye akithipu xokütsüngü, xaluve akemi lau ningu ye aküxüpu axokütsüngü ke. Khuu no hipaqo shikulupu kupukülai ani kea?

¹⁷ Kughengu ningu ye timi kutomo no shiche ketoi, Alhou tsa jekuchumi kumoe, ikemu Alhou zülo amlo tsüqhiyi kemi, Alhou no puwu kemi kehu ningu ye Khristo pulou lono picheni.