2 Kor. 13 - Sumi Naga CL (Re-edited) Bible (BSI)

Ashekhau Ghutu

¹ Hi ghuthu aküthüu ni ye nongu lau cheni. Ngukukile keu kümtsü lo thopimi kini momu küthü no ashepe shitsü masae.

² I no ghuthu akiniu nongu lau ighi kelono ghutu ketoi, itehi ghi putou akelono ghutuve ani, ike püzüu axine shive keqo eno kütami kümtsü lau I no kütüghü anike I no itaghi ighi aye, ni ye panongu kipimi qhitsümo nani,

³ kughengu Khristo no I vecheo kiu pi ani keno nongu no thopi khu ani. Pa ye nongu peitha kelo miqemlei ke kumoe ikemu akumtoshi nongu gholo ani.

⁴ Kughengu Pa ye aphimpi loye miqemlei yedave, ikemu Alhou küka lono xüani. Ningu ghi Pa gholo miqemlei ke, ikemu nongu küdau ye Alhou küka vecheo ningu ye pa gholono xünani.

⁵ Nongu ye aküpülü tsüqüpe ani kemo keno nongu ampi chhejulo. Nongu ampi pejulo. Ikeo Jisü Khristo ye nongu lolo anipi kümsü mlano ani kea?—nongu no pekuju lo tomlave aghinike kumo aye tishimo kepue!

⁶ I no pülü ani, ningu ye pekuju lo tolue pi nongu no ithi nani.

⁷ Ikemu nongu pelo akumou shipemo nike nino Alhou vilo inikhu ani—ningu ye pekuju lo toluvae piniye ke kumoe, ikemu nino tomove ketoi aghimu kiu no achipi keno nongu pelo shipeniye ke.

⁸ Kughengu ningu ye kuchou shou kiumu shimlae, ikemu kuchou ghengu likhino shilu nani.

⁹ Kughou nino miqemlei anamu nongu no mtotoi ani keno, ningu ye alovi cheni. Nongu pelo kupukülailu peni keu no ni kighini ke.

¹⁰ Hi ghenguno I no nongu launo putou akelono hipaqo yelu anike, tishianguno I no ighi kelo ni ye Ampeu no xaleqhive peniye kumono shiqhe puku peniye kükagha I tsükeu nongu lau mkamghai peithamo nani.

Kishekha Petha

¹¹ Ashekhashi, athiküzü achelimiqo, alovilo. Kupukülai luni keu mijilo, lakhino lakhi lokughuno tsülo, lakhino lakhi sasü pulo küqhalo, külakishi lono xülo; kikimiye ngo aloino keu Lhou no nongu gholo anani.

¹² Akimthe kümüma pesü lakhino lakhi ikhilu kilelo.

¹³ Küpülümi kümtsü no petha nongu tsü ani.

¹⁴ Ampeu Jisü Khristow küpükini, Alhouw kikimiye eno Aghungu Kimthew kuposhukulu no nongu kümtsü gholo apeniu.