2 Kor. 12 - Sumi Naga CL (Re-edited) Bible (BSI)

Paulw Kungunhetsü eno Pa Sahu

¹ Ni ye aqheküza tsa pini aphi. Tino kiumu ala shimla kemu ni ye Ampeuw kungunhetsü ngo piyeküsü ghili pini aphi.

² Khristo timi lakhi I no ithi ani, khuu ampe chighibidi züu kungugha jolha aküthüu lo saikuve keno—pa phimpi no iku keo aphimpi pumono iku keno ni ye mthae, Alhou no ithi ani.

³ Eno I no ithi anike timi hipau ye kungugha lo saikuve—pa phimpi no iku keo aphimpi pumono iku keno ni ye mthae, Alhou no ithi ani—

⁴ atsa lono pimla kepu eno akichi lono pikümlapu tsa pa no chilu.

⁵ Timi hipau züqhushi I no qhezani, ikemu I kutokumo ghenguno kumo aye I ghenguu ye qhezamoe—

⁶ I no qhezani shiaye, ni ye küghüzümi shivemo nani, kughengu ni ye kuchou tsa pi nani; ikemu I no süchileve cheni, tishianguno khuu pelomu ni ithulu chekeu momu I ghili chilu chekeu nguno alau kümsü penishi moke.

⁷ Ike akümzapu piyeküsü I lau ighikeu pesü I no qhezauve nosa kehu I phimpi lo asahu qhusü tsüe, ti ye Satan ghinimi lakhishi I heqhi peniye, tishianguno I pelo qhezape moniye ke.

⁸ I no ghuthu küthü kutolo hipau ghenguno Ampeu qhüiniju.

⁹ Ikemu Pa no I vilo pi, “Iw küpükini ye o ghenguno lukümkhae, kughengu I küka ye miqemlei kelono kupukülailu cheni.” Tighenguno ni ye aloviqhiyi Iw miqemlei keu lo alau qhezani, tishianguno Khristo küka no I shou apeni.

¹⁰ Ikehu Khristo ghenguno miqemlei keu, thaigha keu, aghime, kijipüsa keu, eno amhekiqi sholu kelo ni ye aloqiqhiyi cheni. Kughengu kughou I no miqemlei ani keno, tileno ni ye mtotoilu cheni.

Corinthmi Ghenguno Alokümsü

¹¹ Ni ye küghüzümi shiauvae! Nongu no I sheqhe kepu kelaye anguka lono I pelo aghüzüu shivepe ae. Kughengu I no kiumu kumo namu ni ye kiu lonomu hu akighiche apostolmi ipi chekeqo nguno akuchuniu ye kumoe.

¹² Kuchou apostolmie pikeu michipu pephe ghi nongu gholo kutuokutuu amchipu ngo akümzapu eno akichiqhipu kümla shipüani.

¹³ Ni ampi no nongu pünamo keu kumo aye, kiu lono akukuhou kütauqo nguno akimkheu shi nongu peithave kea? I kipimi hi qhitsülo!

¹⁴ Hi ghuthu aküthüu ni ye nongu lau ighini ke kutope ani. Eno ni ye nongu ghimemo nani, kughengu ni ye nongu küakini kumono nonguu phucheni. Kughengu apuaza no atianuli ghenguno kiketsü cheni kethono atianuli no apuaza ghenguno kiketsü chemoe.

¹⁵ I no aghikeu eno I küxü ghi pesü nongu ngulho ghenguno alokivishi tsüve nani. I no alaushi nongu kimiye ke ghenguno nongu ye akimkheu shi I kimiyeni keshea?

¹⁶ Ni ye nongu pünaqhimo kepi nongu ghi pulotsü nani, ikemu itaghi nongu no ni ye amqükini eno akimki lono nongu meluve pike.

¹⁷ Ni ye nongu lau aghinimi puwukeu vecheo nongu launo ala shiluve keshea?

¹⁸ I no Titus vilo wulopi hakite eno pa gholo athiküzüu puwue. Titus ye adokivi luno kiuala ala shiluve keshea? Nikujo ye akükümsü lakhi lono mlake kumo? Nikujo ye apukhune lakhi shike kumo?

¹⁹ Ningu ye itehimu nongu zülo ningu ampi shokha anie pi nongu ye kümsü ani keshea? Kimiye chekeqo, ningu ye Alhou nhethe lo Khristo pulou lono picheni, eno ti kümtsü nongu shiqhe puku niye ke.

²⁰ Kughengu I no ighi kelo nongu ye I no shipenishi ketoi aghi move eno ni ghi nongu no shipenishi ketoi aghi move—tishikeu lono mtomshu, anhekushu, amlo kighide, aghükha, thokügha, xikishi, aqheküza, eno kübangü keu aghive nosa keu msa ani.

²¹ Kughou I no ighini keno I Lhou no itaghi nongu zülono I shikuchuni nikeu ni ye msa ani, eno khunono azüuno axine shive no mithekumo, kipti-toti dolo xine eno ghasü kümla xine shi püakeu lono xaidelu mphi keno panongu ghenguno mloqa masani cheni.