2 Kor. 11 - Sumi Naga CL (Re-edited) Bible (BSI)

Paul ngo Kichile Apostolmi

¹ Ni ye kitila aghüzü anikha shinia kemu nongu pelo kutuutsü penishi ani. I gholo kutuu tsülo!

² Ni ye aküpülü lono nongu ghenguno anheshu ani, kughengu athathelimi lakhi pesü akimi lau küsükha tsü keshi ni ye nongu sawo Khristo tsüniye shike.

³ Ikemu apighi no mqümgha shino Eve pishiqhive ketoi nongu kükümsü ghi mtsümishei eno tsaqütsalei Khristo lau amlotsü chekeu lono saküghüzüve nosake ni ye msa ani.

⁴ Kughengu khuana no ighi püzü nino nongu vilo pikülhave keu nguno kütau Jisü pikülha, nongu no aghungu ikhiluve keu nguno kütau ghungu ikhilu, momu nongu no atsakiviu ikhiluve keu nguno kütau tsakiviu ikhilu aye, nongu ye mlalei tipaqo gholo ilovae!

⁵ Kuchou no I no kümsüju kelo ni ye hu akighiche apostolmi ipi chekeqo nguno akuchuniu ye kumoe.

⁶ Ni ye atsapi lo shitsa shi aghimo namu akighithi loye tishimoe; kuchou no alaghi jeli eno thokha lono nino nongu lau pekiphe shi piyevae.

⁷ Ikeo nongu süqheni ye ni ampi kuchunive püzü ame lumono nongu lau Alhou tsakiviu pikülha keu no ni ye pimive kea?

⁸ Nongu huthu nike ghenguno I no akukuhou kütami launo akukuphu lukeu vecheo panongu pükaqhivae.

⁹ Kughou I no nongu gholo akeno kiuala avehupu namu ni ye khumu shipüna püamoe, kughengu Macedonia lono athiküzümi ighi keqo no I vehupu kümtsü kumkho tsü. Ikehu ni ye kiu lonomu nongu ghime püamo eno ghimemo nani.

¹⁰ Khristow kuchou I lolo anike Achaia cheaxü lomu I qheküzapu hipau ye inaqhoive monani.

¹¹ Kushiye kea? I no nongu kimiye chemo kehu keshea? Alhou no ithi anike ni ye nongu kimiye cheni!

¹² I no kiu mla ani keno ni ye tishi anani, tishianguno khunono pano kümla lo qheza ghi nino mla cheke toi pano ghi shichenie picheni keno tipaqo kümla shipühave tsüniye ke.

¹³ Kughengu timi titoi keqo ye kichile apostolmiqo, pishikiqhi kümlami, Khristow apostolmi ghilishi chekeqo ke.

¹⁴ Akümza akepu kühae, kughengu Satan ghi aküvü lo kungumi ghilishi cheni.

¹⁵ Tishiaye pa qemiqo no amikucho qemi ghilishi akeu ye akichiqhi akepu kühae. Ashekha lono panongu kümla qhemi ajume ithulu nani.

Apostol Paul Ghime

¹⁶ I no pikithe ani, khunomu ni ye küghüzümi kepi kümsü kevilo. Tsala nongu no tishi kümsü aghimu küghüzümi lakhishi ni ikhilu tsülo, tishianguno ni ghi kitila qheza luni.

¹⁷ I no aqheküza tsa kiu piani keno ti ye Ampeu pulou lono kumono küghüzümi toi piani.

¹⁸ Kutomo no ashi gholau no qheza cheni keke ni ghi qhezani.

¹⁹ Nongu ampi no alokütsümi kehu aloviqhiyi küghüzümi lau kutuulu anina!

²⁰ Kughengu khuana no nongu pesü aqüaxemi shive, nongu qhasü, nongu shou adokivi luve, nongu jukünatha, momu nongu gilo ghatsü namu, nongu ye kutuulu cheni.

²¹ Ni ye kujoqhiyi pi masavae, ningu ye titoi shinike ighono miqemleive kena! Ikemu kütami khuana no ighü mono qhezalu aghi aye—ni ye küghüzümi lakhi toi pi anike—ni ghi ighü mono qhezalu nani.

²² Panongu ye Hebrewmi keshea? Ni ghike. Panongu ye Israelmi kea? Ni ghike. Panongu ye Abraham polo kughukomi keshea? Ni ghike.

²³ Panongu ye Khristo qemi keshea? Niu no akiviue—ni ye izüuve kemi toi pi auvae—panongu nguno niu no alau aghime shipüani, ghuthu kutomo akughu shipüani, pikhakümla kitihe chupüani, eno ghuthu kutomo thiveni cheghi püani.

²⁴ Jewmi no akighikipili pesü ghuthu shighi tokuku hechighi chekeu ghuthu pungu I hepüani.

²⁵ Asüthalu pesü ghuthu küthü I hepüani. Atu pesü ghuthu lakhi I veqhi püani. Ghuthu küthü zükilu kubole püani; putho-pucho lakhi azüghi lo ngo püani;

²⁶ hijeje kicheghüzü lo chekelo kümsapu jeli hipaqo sholu püani: aghoki, süxakulumi, ni likhi niw timi, shiye kütami, mishighüna lono, asayeqha lono, azüghi lono, kichile thiküzümi;

²⁷ ghichheghime lo ghuthu kutomo zühu püamoe, amzü atüghü lo ghuthu kutomo achuqupu ithulu püamoe, akicheqho kühano aphikümsa shipe püani.

²⁸ Kütau kümtsü nguno alauno, akukuhouqo ghenguno kütakihi keu huno tsalakipetsü I choha acheni.

²⁹ Khuana no miqemlei animu I no miqemlei mono ani keshea? Khuana no ikiqi animu I pitipüza mono ani keshea?

³⁰ I no qheza kepushi aye, ni ye I kutokumo kichepiye keu lono qheza nani.

³¹ Ampeu Jisü Papu Alhou khuu alholo akümghapu keno, Pa no ithi anike ni ye miki amoe.

³² Damascus lo Akükau Aretas qholo Angh no I kügha luveni ye aphughi kheae,

³³ ikemu I pesü ashoghi lo süno aphughi liwo kighipe lono kighiti piqive eno ni ye pa u lono polue.