2 Kor. 10 - Sumi Naga CL (Re-edited) Bible (BSI)

Paul no Pa kümlapu Shokha

¹ Ni, Paul ampi no Khristo kümtsha küghüvü pesü nongu qhüiniju ani—kughou nongu sasü kinheqhe kusholuni keno ni ye ivünhei ikemu nongu launo putosüve aye mghachhoi!—

² I no nongu qhüiniju anike I no ighi kelo I pelo nongu lau mghachhoipe kevilo; kughengu timi khami khunoqo no ningu ye ashi gholau no checheni pi pülüpüsa cheni keno ni ye tipaqo lau mghachhoi nanike.

³ Ningu ye ashi lono xüaghi namu ashi gholau no aghüshi chemoe.

⁴ Kughengu ningu ghüshi nanu ye ashi ghünanu kumoe ikemu aliwo kumto kütsani keu Alhou launo ighikeu küka ghünanu ke.

⁵ Akikighe eno akükümsü qhemghai keu pesü Alhou kighithi lakha chekeu ghuthu ningu no tulavetsü cheni, eno akükümsü kümtsü tshü sawo Khristo gholupe cheni.

⁶ Nongu no thokha lo aghokulu shiluve kelono aghokulukumo ghimeni ke ningu ye kutope ani.

⁷ Nongu zülo kiu ani keno julo. Nongu gholo khuana no pa ye Khristow kepi thebei aghi aye, pa no Khristow kehutoi ningu ghi kepi pa ampi no pa ghutulu pelo.

⁸ Kughengu nongu kütsave penike kumono shiqhe puku penike Ampeu no kükagha ningu tsükeu pesü kitila qhezalove aghi namu ni ye kujovemo nani.

⁹ Ni ye Iw yesü pesü nongu shikümsave penishi amoe.

¹⁰ Kughengu khami no picheni, “Paw yesüqo ye mishishei eno mkamghai, ikemu pa ampi ye qeinai eno pa tsapi ye kiumu avehu kühae.”

¹¹ Timi tipaqo pelo nino putou akelo yesü lono kiu picheni keno ningu no ighi kelono ti shichenie pi ithi pelo.

¹² Ningu ye khunoqo alikhi ampi sheqhe cheni keno tipaqo sasü jokümtsa momu kimghi amoe. Ikemu kughou panongu no alikhi ampi mighiju eno kütami sasü jokümtsaju ani keno, panongu ye vethakulu kighithi kühae.

¹³ Ikemu ningu ye aqü kiyeve ghi qhezani chemoe; ningu ye Alhou no kotha tsükeu bocho dolono qheza nani, tipa bocho ye nongu ghi süküqha ani.

¹⁴ Nino nongu lau atsakiviu süghi püaghimo aye, ningu ghi hi kutolo qheza moni cheke. Kughengu ningu paghino nongu lau Khristo tsakiviu süghike.

¹⁵ Ningu ye aqü kiyeve ghi kütami no ichheime mla püakeu lo qheza chemoe. Ikemu nongu küpülü no thuwu keu gholono nino nongu gholo mla kepu lughi ghi shishe pekholu peni keu no niw lajupu ke,

¹⁶ tishikeu lono kütami kümla pasü lono qheza mono ningu ye nongu hechesü ayeghi kütau lo atsakiviu pikülha luniye ke.

¹⁷ “Khuu no qhezani keno, Ampeu küdau no qheza pelo.”

¹⁸ Kughengu khuu no pa ampi sheqheni keno, pa no achipiu ke kumoe, ikemu Ampeu no khuu sheqheni keno, pau noke.