2 Kor. 1 - Sumi Naga CL (Re-edited) Bible (BSI)

Pethakütsü

¹ Paul, Alhou pulou vecheo Khristo Jisüw apostol, eno ningu thiküzüu Timothy nikujo no, Corinth lo Alhou kukuhou eno Achaia qhalo küpülümi kümtsü lau yelu ani:

² Ni Pu Alhou eno Ampeu Jisü Khristo launo küpükini ngo aloino keu nongu tsü ani.

Alokughuno Kütsü Lhou

³ Ni Mpeu Jisü Khristo papu Alhou, kimiyekini Papu eno alokughuno kütsü Lhou sheqhelo,

⁴ Pa no ni ghime kümtsü lo ni lokughunotsü cheni, tishikeu lono Alhou no ni lokughuno tsükeu pesü khunono aghime sholu ani keno, pano lokughuno tsü peniye ke.

⁵ Kughengu ningu no Khristo ghime lo küsaje ketoi, ningu ye Khristo vecheo alokughuno ghi kupukuno shi küsaje ani.

⁶ Nino shiluküsa sholu aye, ti ye nongu lokughunopu eno nongu xakulupu ghenguno ke; eno nino alokughuno shi aye, ti ye nongu lokughunopu ghenguno ke, ti ye nongu no niw shiluküsa atho sholu kelo kutuu puqhelu keu lono ipeghi cheni.

⁷ Nongu shou niw lajupu akeu ye itha mono ani, kughengu ningu no ithi akeu no nongu no niw shiluküsa lo küsaje ketoi, ni lokughuno lo ghi küsaje nanie.

⁸ Athiküzümiqo, ningu no Asia lo aghime sholu keu nongu pelo mthano apenishi amoe. Kughengu shishe puqhe kümlapushi ningu ghimeve kehu ningu ye aküxü ghi pülü move.

⁹ Mtsüqheino ningu ye akithipu za ithuluvae pi kümsüve. Ikemu ti ye ni pelo ningu ampi shou kumono Alhou khuu kithimi xüputhu cheni keno, Pa shou pükhübe peniye ke.

¹⁰ Pa no akithipu kümsapu lono ningu xaphelue, eno ningu xaphelu nani. Pa no itaghi ningu xaphelu nanie pi ningu ye Pa shou niw lajupu bevae.

¹¹ Nongu ghi akighini lono ningu kuphutsü alo, tishianguno timi kutomo kighini vecheo kükümgha ni tsükeu huno itaghi timi kutomo no ni züqhushi Alhou shikimthi tsü nani.

Paul Kukughu Kilive

¹² Kughengu ni qheküzapu ye hi ke, ni lolo kiviküsa lotsü no ashepe tsü anike ningu ye ayeghi lo akikhi eno Alhou lau amlo tsüqhiyi shi, ayeghi lo lokütsü lono kumono Alhouw küpükini lono xücheni, eno akhoto no nongu lau tishi acheni.

¹³ Kughengu ningu ye nongu no philu eno vethalu chekeu nguno alau ye kumoe, eno nongu ye qhoi vethalu nani kepi I no pülü ani—

¹⁴ nongu no ningu vetha khamla no aphi kemu—Ampeu Jisü Tsala lo, nino nongu jupe akijivile ketoi nongu no ni jupe akijivile nani.

¹⁵ Ni ye hipau mtsüqhei ake ghenguno I no atüghüshi nongu lau ighini, tishino nongu pelo ghuthu akiniu Ampeuw küpükini puju shijulu penie pi kughu ae.

¹⁶ I no Macedonia lo wuche kelono nongu xuju no tilauno idechile nongu lau ighini, eno nongu pelo I no Judea lo wu chekelo I kuphu puwu penishi ake.

¹⁷ I no hitoi kughu keu ye lhelheive keshea? Ni ye ashi lono I kukughu shino, “Iyei, iyei” ipi pülaghi “Moe, moe” ipi cheni keshea?

¹⁸ Alhou ye pükhükulupu ke ningu ye nongu vilo ghuthu khavino Iyei eno Moe pi püamoe.

¹⁹ Alhou Nu Jisü Khristo khuu Silas, Timothy, eno ni küthü no nongu lau sheshu keno, Pa ye Iyei eno Moe kühae, ikemu Pa gholo ye alhokuthu Iyei ke.

²⁰ Kughengu Alhou shoqhi kümtsü Khristo lau no Iyei pilu cheni. Ikehu Pa vecheo nino Alhou lau Pa juküvüpu shi Amen ipi cheni.

²¹ Alhou no ningu eno nongu pesü Khristo gholo kütshükime lupe, Pa no ningu nukishe,

²² eno ningu shou Pa michipu sütsü no ningu tsüniye akeu tsütha ghi Pa Ghungu ningu mlo lo sütsüe.

²³ Alhou no thopi shitsü penike ku ani—I no Corinth lo ighi move keu ye nongu loshipüsü moniye ke.

²⁴ Nino nongu küpülü qhasüpe anike kumoe, ikemu nongu lokivipu ghenguno nino nongu sasü mlaitha cheni, kughengu nongu ye aküpülü lo mtotoi acheni ke.