2 John 1 - Sumi Naga CL (Re-edited) Bible (BSI)

Pethakütsü

¹ Alayeu no Alhouw kishekiphe atotiu eno li tianuli, khunoqo I no eno I likhi kumono kuchou ithi chekemi kümtsü no, kimiye cheni keno, panoqo lau yelu ani,

² ti ye ningu lolo kuchou akeu eno alholo ningu gholo acheni ke ghenguno ke.

³ Apu Alhou eno Pa Nu Jisü Khristo launo kuchou eno kikimiye lono tsükeu kimiyekini, küpükini, eno aloino keu huno ningu gholo apeniu.

Kuchou eno Kikimiye lo Chechelo

⁴ Apu no ningu azah tsüke toi nongu tianuli khami no kuchou küdau cheche keu ithulupe ni ye shishe alovivae.

⁵ Eno itehi ye I no o qhüiniju ani, kimiyekicheu atotiu—hi ye azakütsü kithe lakhishi I no o lau ye anike kumoe, ikemu abothu lono ningu no ikhiluve keu ke—ningu lakhino lakhi kimiye kileni nolo.

⁶ Kikimiye ye hipau ke: ningu ye Alhou zakütsü kiqi lono cheche masae. Nongu no abothu lono chiluve ketoi azakütsü hipau tsükeu ye nongu pelo tipau lo cheche peniye ke.

⁷ Kughengu ayeghiqha lo pishikiqhimi, khunoqo no Jisü Khristo ye ashi phimpi xapusü ighie pi ikhilu chemo keno, tipaqo kutomo ipeghivae. Titoi kemi no pishikiqhimi eno kichileu Khristo ke.

⁸ Nongu jukutolo, tishianguno nino nongu ghenguno kiu mla püani keno pühave mono nongu no asaxü qhoi ithulu nani.

⁹ Khuu no Khristo kükütsü lo kumono pa la kütashi wuveni keno, Alhou ye pa gholo kühae. Khukhumu Khristo kükütsü lo kimepe aghi keu ye Apu eno Anu kinikujo ani.

¹⁰ Khuana no nongu lau ighi kelo hipau kükütsü peighimo aye, nongu kilo pa sasü kevi, momu pa sasü pethamu shi kevilo,

¹¹ kughengu khuu no pa sasü petha shini keno pa kümla lhoksa lo küsaje auvae.

Kishekha Petha

¹² Nongu lau kutomo yelu kepu aghi namu kakupa ngo kiyezü peitha moveni. Tipa züqhulo ni ye nongu lau ighi no agi kinheqhe ghi küptsa kileni ke laju ani, tishianguno ningu lokivi kupulu peniye ke.

¹³ Alhouw kishekiphe o tsünipu tianuliqo no petha o tsü ani.