1 Tim. 6 - Sumi Naga CL (Re-edited) Bible (BSI)

¹ Khunono aqüaxe lo ani keno, pano mpemi ye qhoqhü küzü kepi kümsülu lo, tishianguno timi khuu pelomu Alhou je eno shiküka pipüsa pemonie.

² Khuno mpemi no küpülümi keno aküpülü lono athiküzümi shivae pi tipaqo phimo gihumo kevilo; tipa züqhulo akivishi panoqo qe masae, kughengu khunono pano kümla kivi vecheo avehupu shilu cheni keno, tipaqo ye küpülümi eno qhuivü chekemi ke. Thime hipaqo pesü shika eno kütü lo.

Kichile Kükütsümi eno Kuchou Lokiqi

³ Khuana no akülü kütau shika eno ni Mpeu Jisü Khristo no tsaqüi pikeu tsa ngo Alhou sümsani keu shiküka sasü kiyeqüve aye,

⁴ pa ye aqheküza no chhitoive no kiumu vethamlavae. Pa ye atsa ghenguno aküküpna eno kighekile nikeu no pa pulou, tishikeu lono anhekushu, küsüxa keu, thaigha keu, pülüküpsa,

⁵ eno küqha kümla no timi dolo auve cheni. Timi hipaqo kükümsü ye alau shipüsa kithe eno kuchou huno pano launo küsüve kehu, Alhou sükümsa küxü vecheo kinimi shilu nani küghashi cheni.

⁶ Ikemu aloqiqhiyi Alhou sükümsa lono xükeu lo ala kije ani,

⁷ kughengu ningu ye ayeghi lo kiumu pesü ighimoe eno ayeghi lono kiumu pewuni chemoe.

⁸ Ikemu achuqupu ngo aphimini aghi aye, ningu ye aloqiqhiyi nani.

⁹ Ikemu khunono kinimi shinikeu mine cheni keno, ghukuju lo ikiqi ilove cheni, akümsapu lichhe lo ikiqive no timi kütsave chekeu mbomzü kükümsü lo sünhe süve cheni

¹⁰ Kughengu pisa kikimiye no alhoksa jeli kümtsü kuhu-aghü ke. Hipau kimne lono timi khami ye aküpülü lono itsüsü wuvae eno amlo ghuju jeli no panongu jiqhi anie.

Akivishi Aküpülü Ghüshi Shilo!

¹¹ Ikemu, no Alhou timi, no ye hipaqo lono polulo. No ye amikucho, Alhou sükümsa, aküpülü, kikimiye, ithamokeu, akümtsha püzülo.

¹² Akivishi aküpülü ghüshi shilo. Lhokta küxü tsüqülu lo, thopimi kutomo zülono nono mtsüqhei piphe püakeu, o kulu keu kimji ye tike.

¹³ Thokha kümtsü aküxü tsükeu Lhou zülono, eno Pontius Pilate zülo pikiphe kije shi püakeu Khristo Jisü zülono I no azah o tsü ani,

¹⁴ ni Mpeu Jisü Khristo ipeghi ke tsala kutolo, ayezah tukutiye shimono eno nguku kepu qhimono papelo.

¹⁵ Pa ikighi tsala ye ado achipi lono Alhou no süghi nani, Pa ye akümghau eno Pa likhi no yepetou, kükami shou Akükau eno ampemi shou Ampeu,

¹⁶ Pa likhino thimoni keu küka ani, Pa ye aphivilo wumla keu küvü lo acheni, khunomu pa ithulu mphi eno Pa shou jupuku mlae. Agigihu eno lhokta kükaqha, Pa lau alo. Amen.

¹⁷ Ishi tiqheli lo kinimi vilo qheza kevilo pilo, momu mtsüqhei mokeu kini shou pano lajupu bekevilo pilo, ikemu alokiqipu shilu peniye thokha pofushi ningu tsü chekeu Lhou shou lajupu belo pilo.

¹⁸ Panongu ye akivi mla masae, akivi kümla lo nibonilei masa, tsükinimi shimasa eno küsajeni keu lo kutope khemasae.

¹⁹ Hitoi shikeu lono pano sala akini pekütsüpe hithiu ghenguno aboqha shimasae, tishikeu lono panongu ye kuchou küxü tsüqülu nani.

²⁰ O Timothy, o pelo jukuto peniye tsüpüa keu, khekuto lo. Alhou sümokeu tsapi eno kumomu “akighithi” ipi no kighekile chekeu launo putosülo.

²¹ Kughengu khami ye hipau saphu anipi aküpülü lono tsüghüsü wuvae. Küpükini nongu gholo apeniu.