1 Tim. 5 - Sumi Naga CL (Re-edited) Bible (BSI)

Akukuhou lau Akükütsütsa

¹ O nguno akichiu lomipi kevilo ikemu o pu toi pa shikumto lo, o nguno ayitiuqo no o thiküzümi toi peitha lo,

² topumiqo no o za toi eno ilimiqo no achepu toi mqhamqhiyi ikhilu lo.

³ Kuchou no chimemi shive keqo ikhilu lo.

⁴ Ikemu chimemi lakhino atianuli momu atilimi aghi aye, tipaqo pelo pano kibolomi lau paghi akümla kivi mla kepu ithi pelo, eno pano puaza lau akümla kivi mla chilelu pelo, kughengu hi no Alhou pulou ke.

⁵ Khuu no kuchou no chimemi shive akeno, li ye liw lajupu Alhou shou bepe auvae eno putho pucho tamono qhüiniju inikhu acheni.

⁶ Ikemu chimemi khuu no li küxü kilhekulhu xüni keno, li ye xü aphi lono kithimi shivae.

⁷ Akükütsü tsa hipaqo ghi pesü azah tsülo, tishianguno panoqo ye akipimi kiumu küha nani.

⁸ Ikemu khuu no abolomi tucho moni keno, eno akhotoshi pa kibolomi tucho moni keno, pa ye aküpülü phevae eno pülümokemi nguno alhoksau ke.

⁹ Chimemi ampe lhotsügho shive kemi no akimi lakhi kilo likhi küghüna püaghi aye, akukuphu ghenguno li pelo aje kihisülu pelo,

¹⁰ li ye akümla kivi hitoike ghenguno ajuaje kivi aghi masa: atianuli akivishi saputhu kemi, inami sasü kinimi, Alhou qemi pukhu qhutsü kemi, shiluküsami kuphu kemi, eno thokha lo akümla kivi shi kemi.

¹¹ Ikemu chimemi lhothe ye kihiküsü lo sü kevilo, kughengu pano shiaji pulou no pano sasü Khristo launo putosüve aye, külauve nishi cheni.

¹² Tishikeu lono pano küpülü atüghü lo achekeu hephove no ajuaje küsa shive cheni.

¹³ Tinguno alau panongu ye akipichimi shive no aki atsütsü iqhoiqi anikeu shikalu cheni, eno akipichi likhi kumono, adou lono mighimghai kütami xishi-jekuuve cheni.

¹⁴ Ikehu ni ye chimemi lhotheqo pelo külave no atianuli auve penishi eno akibo peithauve penishie, tishikeu lono ni ghümi no ni lhoksa pimo nani.

¹⁵ Kughengu khami ye Satan papesü idewovae.

¹⁶ Tsala küpülümi totimi khami no li kibo lo chimemi aghi aye, li ye tipaqo tucholo. Akukuhou pelo tipau makho pupe kevilo, tishianguno akukuhou ye kuchou no chimemi shiaghi keqo tuchomjolu nani.

¹⁷ Akukuho lo kichimi, akhoto no akükütsü eno shiküka lo ichheime chekeqo, khunono akivishi ayepe cheni keno, panongu ye ajume küghüsü no ithulu küzüe.

¹⁸ Kughengu Kuchoyesü no ishi pi püani, “Kughou amshitsü no athi qophe ani keno, akichi khavetsü kevilo,” eno “Akümlakishiu ye pa jume ithulu küzüe.”

¹⁹ Timi kini momu küthü no thopi tsüke thiuno kumo aye kichimi shou ngukube keu tsa ikhilutsü kevilo.

²⁰ Khunono axine lo acheni keno, mishi zülono sakiyi lo, tishianguno kütami no msave nani.

²¹ Alhou ngo Khristo Jisü eno kungumi kishekiphe zülono o pelo akükütsü tsa hipaqo pape penike I no o hakite ani. Khilemu kümsükuto mono küghathabe kevilo, agi jumono shilo.

²² Mighimghai sakiphemi kishephepe au betsü kevilo, eno kütami xine lo kuloji kevilo; o küghape mqhamqhiyi lo.

²³ (O po papashi süchekeu ghenguno azü likhi kumono atsaizü kititi kite no yelo.)

²⁴ Timi khami xine ye pekiphe shi pano züuno küghaküthapu lo wuve cheni; ikemu khami xine ye athiu no ipeghi cheni.

²⁵ Tihutoi akümla kivi ghi pekiphe shive cheni, eno pekiphe shi aghimo namu alhokuthu küsüve mla nani.