1 Tim. 4 - Sumi Naga CL (Re-edited) Bible (BSI)

Khami ye Aküpülü Iqeve nani

¹ Aghungu no mtsüqhei pikeu no hithiu timi khami ye pishikiqhi ghawuqo tsa ini eno tüghami shiküka lo amlo tsüuve keu lono aküpülü pheve nani.

² Hi ye kimkimi khuno kükümsü piti kushughipe tsaqüimo keno, pano vecheo ighi nani.

³ Panongu no külakupu lakha cheni eno achuqupu khikhi pülü luve no kuchou ithi kemi pelo shikimthikütsü lono ikhipe chu peniye Alhou no lhosü keno, tipaqo chukevilo picheni.

⁴ Kughengu Alhou no lhosü keu kümtsü akivi, eno shikimthikütsü lono ikhilu aye kiumu milive kepu kühae,

⁵ kughengu ti ye Alhou tsa ngo akighini pesü shikimthevae.

Khristo Jisü Qemi Kivi

⁶ Nono akükütsü hipaqo pesü athiküzümi lau tsülu aye, no ye Khristo Jisü qemi kivi lakhie, ti ye aküpülü tsa ngo akülü kuchou, nono pepimhe chekeu huno o qophe püakeu lono ke.

⁷ No ye Alhou sümokeu eno ameküküha küghakiche tsa launo putosülo. Ikemu Alhou lau amlo tsükeu küxü lono o qophe alo.

⁸ Aphimpi qokiphe lo ame hami acheni aye, Alhou lau amlo tsükeu ye ala kümtsü ame ani, kughengu tino hipa yeghi lo küxü eno ighini keu küxü ghengu ghi piqhi püatsü anie.

⁹ Akipitsa hi ye pükhübekulu eno qhoi ikhilu küzüpue.

¹⁰ Kughengu hi kutolo ningu ye ichheime mla acheni, ti ye ningu no aküxüpu Lhou, khuu timi kümtsüw eno akhoto no pülüluve kemiw Xakuluu keno, Pa shou niw lajupu bepe qhive akehu ke.

¹¹ Hipaqo pesü azah tsüno shikalo.

¹² Timi khuu pelomu no ye lhothemi kepi o jukünatha pekevilo, ikemu atsapi lo, ghushoghili lo, kikimiye lo, aküpülü lo eno mtsümishei keu küxü lo, küpülümi lau kichekipiye shilo.

¹³ I no ighi moke kutolo aqo gholo Kuchoyesü phisü, shikumto eno shiküka lo o mlo tsüqhiyi lo.

¹⁴ Layemi hoho no o shou au betsü kelo, tungkuptsa vecheo agho o tsükeu hu kughucho kevilo.

¹⁵ Hipaqo pepimhe no o küxü kümtsü tsülo, tishianguno kümtsü pelo no ye kiutoi thuwu ani keno ithulu pelo.

¹⁶ No ampi eno ow shiküka jukuto alo. Phekevi no pükapütsa alo, kughengu nono hipaqo shikeu lono no ampi eno o tsa chilu akemi xalu nani.