1 Tim. 3 - Sumi Naga CL (Re-edited) Bible (BSI)

Akukuho lo Sakiphemi

¹ Akipitsa hi ye pükhübe kulupue: Khukhumu akukuhou lo jukükütsümi shinishi aye, pa ye agigihupu kümla shinike pulo ani.

² Kughengu akukuho lo sakiphemi ye akipimi kükühami shimasae, anipu lakhi akemi shimasa, tsükhüi kemi, alikhi aghasülu kemi, gihuküzümi, inami sasükinimi, eno shikathi kemi shimasae,

³ shokümzümi shimoni, mtomshu kemi shimoni, ikemu ivünhei masa, eno pisa kimnemi shimoni.

⁴ Pa ye thokha lo akivishi pa kibo peithalu kemi shimasa eno pa tianuli no pa gihulu chekemi shimasae.

⁵ Kughengu timi lakhi no pa kibo peitha mtha aye, kishino Alhou kukuhou tucho luni kea?

⁶ Pa ye anileshi Khristo chineye lukemi shimoni, tikumo aye pa ye aqheküza lono kumobeive no tüghami gholo küghaküthapu lo ikiqive nani.

⁷ Tinguno alau, pa ye akukuhomi kumo kemi ghi pa kivi pi kemi shiaghi masae, tishianguno pa ye ajuaje küsa lo ikiqimo nani eno tüghami lichhe lo ilomo nani.

Deaconmi Ghenguno Bekütha

⁸ Tihutoi deaconmi ye mtsümishei kemi shimasa, amili shoba moni, aji shomoni; momu alakimnemi shimoni.

⁹ Panongu ye hi tuqhou küpülü, akükümsü tsüghükhüi shino tsüqüpe masa.

¹⁰ Panongu pesü puju paghi masae; tishino achipishi kethiuno deacon kümla shipe masae.

¹¹ Titoi pano nipuqo ghi mtsümishei kemi shimasa, kütami pipüsa kemi shimoni, ikemu tsükhüi kemi eno thokha lo pükhükulupu shimasae.

¹² Deaconmi ye anipu lakhi likhi akemi shimasa, eno pano tianuli ngo akibo akivishi peitha lukemi shimasae.

¹³ Kughengu deaconmi khunono hukuthu kümla akivishi shini keno, pano ghenguno akivi qelu cheni eno Khristo Jisü lau xükimepe akeu küpülü lo mtotoi mtupe ngolu cheni.

Achineye lo Tuqhou

¹⁴ Ni ye kushuo kumo lo nongu lau ighi nike laju ani, ikemu I no nongu lau hipaqo yepuwu ani, tishianguno

¹⁵ I no munuve kepu shinamu, nongu pelo Alhou kibo lo kishi mlaitha kepu keno ithi peniye ke; hi no aküxüpu Lhou kukuhou, kuchou tsükucho eno aboqha ke.

¹⁶ Achineye lo tuqhou ningu no piphe chekeu ye kuchou no kije ke: Pa ye timi phi-ashi shi ighi, Aghungu no ashe petsü, kungumi no ithulu, shiyeqo gholo sheshu püani, ayeghi lono pa pülü, ajuküvü lono pa saikuve.